উদয়পুৰ: ভাৰতৰ শীৰ্ষ শ্বাটলাৰ পি ভি সিন্ধুৱে দেওবাৰে হ্ৰদৰ চহৰখ্যাত উদয়পুৰৰ বিলাসী ৰিজ’ৰ্ট ৰাফেলছত ভেংকট দত্ত সাইৰ সৈতে বিবাহপাশত আবদ্ধ হয় । ২৪ ডিচেম্বৰত সিন্ধুৰ গৃহ চহৰ হায়দৰাবাদত নৱবিবাহিত দম্পতীয়ে আয়োজন কৰিব এক বিশাল অভ্যৰ্থনা অনুষ্ঠান । ২০ ডিচেম্বৰত সংগীত আৰু পিছদিনা হালধি আৰু মেহেন্দিৰ পৰম্পৰা অনুষ্ঠিত হয় ।
এই ৰাজকীয় বিবাহ অনুষ্ঠানত ৰাজনীতি আৰু ক্ৰীড়াৰ সৈতে জড়িত বিশিষ্ট ব্যক্তি আৰু দক্ষিণ ভাৰতৰ ছবি উদ্যোগৰ তাৰকাসকলৰ অংশগ্ৰহণৰ সম্ভাৱনা আছিল যদিও ২৪ ডিচেম্বৰ মঙলবাৰে পি ভি সিন্ধুৰ গৃহ চহৰ হায়দৰাবাদত অনুষ্ঠিত হ’বলগীয়া বিশাল অভ্যৰ্থনা অনুষ্ঠানটোতহে অধিকাংশ বিশিষ্ট ব্যক্তিয়ে অংশগ্ৰহণ কৰিব ।
পিভি সিন্ধুৱে প্ৰধানমন্ত্ৰী নৰেন্দ্ৰ মোদী, শচীন তেণ্ডুলকাৰ, কেন্দ্ৰীয় গৃহমন্ত্ৰী অমিত শ্বাহ, শিৱৰাজ সিং চৌহান, বৈদেশিক পৰিক্ৰমা মন্ত্ৰী এছ জয়শংকৰ, বিত্তমন্ত্ৰী নিৰ্মলা সীতাৰমণ, কিৰেন ৰিজিজু, তেলেংগানাৰ মুখ্যমন্ত্ৰী ৰেৱন্ত ৰেড্ডীৰ লগতে বহুকেইজন চলচ্চিত্ৰ তাৰকাক নিমন্ত্ৰণ জনাইছে ।
কেন্দ্ৰীয় পৰ্যটন মন্ত্ৰী গজেন্দ্ৰ সিং শ্বেখাৱটে X ত এটা পোষ্ট কৰি কয়, ‘‘উদয়পুৰত অনুষ্ঠিত বেডমিন্টন চেম্পিয়ন পিভি সিন্ধু আৰু ভেংকট দত্ত সাইৰ বিবাহ অনুষ্ঠানত উপস্থিত থাকিবলৈ পাই আনন্দ অনুভৱ কৰিছোঁ ৷ দুয়োকে নতুন জীৱনৰ বাবে শুভকামনা জনালোঁ ৷’’
পি ভি সিন্ধুৰ স্বামী ভেংকট দত্ত সাই কোন ?
পি ভি সিন্ধুৰ স্বামী ভেংকট দত্ত সাই হায়দৰাবাদৰ ব্যৱসায়ী প’ছিডেক্স টেকন’লজিছৰ কাৰ্যবাহী সঞ্চালক । ক্ৰীড়াৰ প্ৰতি তেওঁৰ বিশেষ আগ্ৰহ আছে । তেওঁ মটৰ স্প’ৰ্টছৰ প্ৰতি আকৰ্ষিত । প্ৰায়ে ডাৰ্ট বাইকিং আৰু মটৰ ট্ৰেকিঙত অংশগ্ৰহণ কৰে । তেওঁৰ ওচৰত বহুকেইখন ছুপাৰ বাইক আৰু স্প’ৰ্টছ গাড়ী আছে । জিন্দাল ছাউথ ৱেষ্ট (জে এছ ডব্লিউ)ৰ সৈতে পেছাদাৰী কেৰিয়াৰ আৰম্ভ কৰা সাইয়ে জে এছ ডব্লিউৰ সহ-মালিকত্ব থকা দিল্লী কেপিটেলছ দলৰ কাম-কাজো চোৱাচিতা কৰিছে ।
ভেংকট দত্ত সাইৰ শিক্ষা জীৱন
সাইয়ে ফাউণ্ডেশ্যন অৱ লিবাৰেল এণ্ড মেনেজমেণ্ট এডুকেচনৰ পৰা লিবাৰেল আৰ্টছ এণ্ড চাইন্সেছ/লিবাৰেল ষ্টাডিজত ডিপ্ল’মা কৰিছিল । ২০১৮ চনত FLAME ইউনিভাৰ্চিটিৰ বিজনেছ এডমিনিষ্ট্ৰেচনত বিবিএ একাউণ্টিং এণ্ড ফাইনেন্স সম্পূৰ্ণ কৰাৰ পিছত বেংগালুৰুৰ আন্তঃৰাষ্ট্ৰীয় তথ্য প্ৰযুক্তি প্ৰতিষ্ঠানৰ পৰা ডাটা ছায়েন্স আৰু মেচিন লাৰ্নিঙত স্নাতকোত্তৰ ডিগ্ৰী লাভ কৰে ।
ইতিমধ্যে উদয়পুৰত বহু ৰাজকীয় বিবাহ অনুষ্ঠিত হৈছে
বলীউড অভিনেতা আমিৰ খানৰ কন্যা ইৰা খানে বছৰৰ আৰম্ভণিতে উদয়পুৰত প্ৰেমিক নুপুৰ শিখৰেৰ সৈতে বিবাহপাশত আবদ্ধ হয় । ইয়াৰ পিছত ছানী দেওলৰ ভতিজী নিকিতা চৌধাৰীৰ বিবাহো ইয়াতেই হৈছিল । একে সময়তে উদয়পুৰৰ হাৱালাত অৱস্থিত এখন ফাইভ ষ্টাৰ হোটেলত বলীউডৰ কণ্ঠশিল্পী নীতিন মুকেশৰ কনিষ্ঠ পুত্ৰৰ বিবাহ সংঘটিত হয় । আনহাতে, যোৱা বছৰ ক্ৰিকেটাৰ হাৰ্দিক পাণ্ডিয়াই মহানগৰীৰ এখন হোটেলত বলীউডৰ অভিনেত্ৰী নাটাছাৰ সৈতে পুনৰ বিবাহপাশত আৱদ্ধ হৈছিল । পৰিনীতি চোপ্ৰা আৰু ৰাঘৱ চাধাৰৰ বিয়াও ইয়াতেই হৈছিল । লগতে ২০১৮ চনত উদয়পুৰত মুকেশ আম্বানীৰ কন্যা ঈশাৰ বিবাহৰ পূৰ্বৰ অনুষ্ঠানো অনুষ্ঠিত হৈছিল ।
পিভি সিন্ধুৰ কেৰিয়াৰ
শেহতীয়াকৈ লক্ষ্ণৌত অনুষ্ঠিত ছৈয়দ মোদী ইণ্ডিয়া আন্তঃৰাষ্ট্ৰীয় বেডমিণ্টন প্ৰতিযোগিতাৰ ফাইনেলত সিন্ধুৱে বেডমিণ্টন ৱৰ্ল্ড ফেডাৰেচনৰ (বি ডব্লিউ এফ) ৱৰ্ল্ড ট্যুৰত একেৰাহে দুখন খেলত ২১-১৪, ২১-১৬ ত জয়ী হৈছিল । ২০২২ চনৰ জুলাই মাহত ছিংগাপুৰ অ’পেন খিতাপৰ পিছত সিন্ধুৰ এইটোৱেই আছিল প্ৰথম বি ডব্লিউ এফ ৱৰ্ল্ড ট্যুৰ খিতাপ ।
২০২৩ চনত আৰু এইবাৰ স্পেইন মাষ্টাৰ্ছ আৰু মালয়েছিয়া মাষ্টাৰ্ছৰ ফাইনেলত প্ৰৱেশ কৰিছিল যদিও খিতাপ দখল কৰাত ব্যৰ্থ হৈছিল । বিখ্যাত কেৰিয়াৰৰ সময়ছোৱাত সিন্ধুৱে বি ডব্লিউ এফ বিশ্ব চেম্পিয়নশ্বিপত পাঁচটা পদক লাভ কৰিছে ৷ চীনৰ জাং নিঙৰ উপৰিও এই কৃতিত্ব অৰ্জন কৰা আনগৰাকী মহিলা সিন্ধু ।
২০১৬ চনৰ ৰিঅ’ অলিম্পিকত তেওঁ অলিম্পিকৰ ফাইনেলত প্ৰৱেশ কৰা প্ৰথমগৰাকী ভাৰতীয় বেডমিণ্টন খেলুৱৈ হিচাপে পৰিগণিত হয় । সিন্ধুৰ এই কৃতিত্বই বেডমিণ্টনৰ এগৰাকী আগশাৰীৰ ব্যক্তি হিচাপে তেওঁৰ মৰ্যাদাক জিলিকাই তুলিছে তথা ভাৰত আৰু বিশ্বৰ অগণন যুৱ খেলুৱৈক অনুপ্ৰাণিত কৰিছে ।
লগতে পঢ়ক:২২ ডিচেম্বৰত বিবাহপাশত আৱদ্ধ হ'ব পি ভি সিন্ধু
