স্পৰ্টছ ডেস্ক, 1 আগষ্ট : চলি থকা পেৰিছ অলিম্পিক 2024ত বুধবাৰে 10 মিটাৰ এয়াৰ পিষ্টল দলীয় প্ৰতিযোগিতাত তুৰ্কীৰ এয়াৰ পিষ্টল শ্বুটাৰ ইউছুফ ডিকেকে ৰূপৰ পদক লাভ কৰে ৷ কিন্তু ডিকেক ৰাতিটোৰ ভিতৰতে জনপ্ৰিয় হৈ পৰিল যেতিয়া তেওঁৰ ছবি আৰু ভিডিঅ’ ছ’চিয়েল মিডিয়াত ভাইৰেল হৈ পৰিল ৷ য'ত দেখা গৈছে যে, তেওঁ উন্নত সঠিকতা, চকু আৰু কাণৰ সুৰক্ষাৰ বাবে খেলুৱৈসকলে পিন্ধা সকলো প্ৰয়োজনীয় সঁজুলি পৰিধান কৰা নাছিল ৷
শ্বুটাৰসকলে খেলৰ সময়ত বহুতো সঁজুলি পিন্ধে, য’ত আছে উন্নত সঠিকতাৰ বাবে আৰু চকুৰ কোনো ধৰণৰ ক্ষতি হোৱাৰ পৰা হাত সাৰিবলৈ বিশেষ চশমা আৰু শব্দ কম কৰিবলৈ কাণৰ সুৰক্ষা সঁজুলি ৷ কিন্তু ডিকেকে কোনো গেজেট পৰিধান নকৰাকৈ পুৰুষৰ 10 মিটাৰ এয়াৰ পিষ্টল ইভেণ্টৰ ফাইনেলত অংশগ্ৰহণ কৰি দেশৰ হৈ ৰূপৰ পদক লাভ কৰি নিজৰ প্ৰতিভা প্ৰদৰ্শন কৰে ৷
এই ঘটনাই শ্বুটিং অনুৰাগীৰ দৃষ্টি আকৰ্ষণ কৰাৰ লগতে 51 বছৰীয়া ডিকেকৰ ছবি ছ’চিয়েল মিডিয়াত ভাইৰেল হ’বলৈ ধৰে ৷ 10 মিটাৰ এয়াৰ পিষ্টল দলীয় প্ৰতিযোগিতাত ডিকেক আৰু তেওঁৰ সতীৰ্থ সেৱাল ইলায়দা তৰ্হানে দ্বিতীয় স্থান লাভ কৰি ৰূপৰ পদক অৰ্জন কৰে ৷