বেংগালুৰু: ভাৰত আৰু নিউজীলেণ্ডৰ মাজত বাংগালোৰৰ এম চিন্নাস্বামী ষ্টেডিয়ামত অনুষ্ঠিত হৈ থকা প্ৰথমখন টেষ্টৰ চতুৰ্থ দিনা উদীয়মান তাৰকা বেটছমেন ছৰফৰাজ খানে চমকপ্ৰদ প্ৰদৰ্শনৰ জৰিয়তে ভাৰতক এক সৱল স্থিতিত উপনীত কৰোৱাইছে। শনিবাৰে ছৰফৰাজ খানে টেষ্ট ক্ৰিকেটত কেৰিয়াৰৰ প্ৰথমটো শতক অৰ্জন কৰে ৷ ছৰফৰাজে এই শতকীয় ইনিংছটোত কিৱি বলাৰকসকলৰ বিৰুদ্ধে আক্ৰমণাত্মক ৰূপ ধাৰণ কৰি খেলপথাৰৰ চাৰিওদিশে বাউণ্ডেৰী আৰু ছয় কোবায় আৰু নিউজীলেণ্ডৰ দলটোক ব্যতিব্যস্ত কৰি তোলে।
ছৰফৰাজ খানৰ অভিষেক শতক
ছৰফৰাজ খানে নিউজীলেণ্ডৰ বিৰুদ্ধে প্ৰথম টেষ্টত তেওঁৰ শক্তিশালী বেটিং দক্ষতা প্ৰদৰ্শন কৰি এক সুন্দৰ শতক অৰ্জন কৰে। চাপ স্বত্বেও, ছৰফৰাজে সুন্দৰ খেলৰ নমুনা দেখুৱায় আৰু নিউজীলেণ্ডৰ বলাৰসকলৰ ওপৰত আধিপত্য বিস্তাৰ কৰে, যাৰ ফলত তেওঁৰ কেৰিয়াৰৰ প্ৰথম টেষ্ট শতক আৰু প্ৰথম আন্তৰ্জাতিক শতক দুয়োটা অৰ্জন কৰিবলৈ সক্ষম হয়। তেওঁ মাত্ৰ 110 টা বলৰ সন্মুখীন হৈ এটা দুৰ্দান্ত শতক অৰ্জন কৰে ৷ তেওঁৰ প্ৰথম টেষ্ট শতক অৰ্জন কৰাৰ বাটত আছিল 13 টা চাৰি আৰু 3 টা বিশাল ছয়।
টেষ্ট ক্ৰিকেটত ছৰফৰাজ খানৰ আকৰ্ষণীয় প্ৰদৰ্শন অব্যাহত
26 বছৰীয়া মধ্যক্ৰমৰ বেটছমেনজনৰ এই বছৰৰ আৰম্ভণিতে ইংলেণ্ডৰ বিৰুদ্ধে টেষ্ট অভিষেক ঘটিছিল আৰু তেতিয়াৰে পৰা তেওঁ নিজৰ উৎকৃষ্ট ফৰ্ম বজাই ৰাখিছে। বেংগালুৰুত নিজৰ চতুৰ্থ টেষ্টত অৱতীৰ্ণ হোৱা ছৰফৰাজৰ পৰিসংখ্যা যথেষ্ট আকৰ্ষণীয়। এই পৰ্যন্ত খেলা 4 খন টেষ্টৰ 7 টা ইনিংছত, তেওঁ 61.20 গড়ে মুঠ 306 ৰাণ সংগ্ৰহ কৰিছে। তেওঁ ইয়াৰ পূৰ্বে 3 টা অৰ্ধ-শতক অৰ্জন কৰিছিল। আজি, নিজৰ দৃঢ় বেটিং শৈলীৰ পৰিচয় দাঙি ধৰি এক উজ্জ্বল শতক অৰ্জনেৰে তেওঁৰ সকলোৰে মনোযোগ আকৃষ্ট কৰিবলৈ সক্ষম হয় ।
টীম ইণ্ডিয়াক সংকটৰ পৰা উদ্ধাৰ
বেংগালুৰু টেষ্টত ভাৰতে প্ৰথম ইনিংছত শোচনীয় প্ৰদৰ্শন কৰি মাত্ৰ 46 ৰাণত অল আউট হয়। ইয়াৰ উত্তৰত নিউজীলেণ্ডে তেওঁলোকৰ প্ৰথম ইনিংছত 402 ৰাণ সংগ্ৰহ কৰি আৰু ভাৰতৰ বিৰুদ্ধে 356 ৰাণৰ গুৰুত্বপূৰ্ণ অগ্ৰগতি লাভ কৰে। দ্বিতীয় ইনিংছত অধিনায়ক ৰোহিত শৰ্মা (52 ৰাণ) আউট হোৱাৰ পিছত ছৰফৰাজ খানে এক চাপৰ পৰিস্থিতিত বেটিং কৰিবলৈ আহে আৰু প্ৰথমটো শতক অৰ্জন কৰে, যাৰ ফলত তেওঁ টীম ইণ্ডিয়াক সংকটজনক স্থিতিৰ পৰা উদ্ধাৰ কৰাত সহায় কৰে। শনিবাৰে বৰষুণে খেলত বাধা দিয়াৰ পূৰ্বে ভাৰতে 3 উইকটৰ বিনিময়ত 344 ৰাণ সংগ্ৰহ কৰিছে ৷ ছৰফৰাজ খান (125 ৰাণ) আৰু ঋষভ পন্ত (53 ৰাণ) ক্ৰীজত অপৰাজিত হৈ আছে। এই সময়লৈকে ভাৰত নিউজীলেণ্ডৰ পৰা মাত্ৰ 12 ৰাণত পিছ পৰি আছে।
লগতে পঢ়ক:দলৰ সংকটৰ মাজতে টেষ্ট ক্ৰিকেটত 9000 ৰাণ সম্পূৰ্ণ বিৰাট কোহলীৰ
