স্পৰ্টছ ডেস্ক, 13 জুলাই : হাৰাৰে স্প’ৰ্টছ ক্লাবত যশস্বী জয়ছোৱাল আৰু অধিনায়ক শুভমন গীলৰ বেটিং বিক্ৰমৰ সহায়ত ভাৰতে জিম্বাব’ৱেক চতুৰ্থ T-২০ত ১০ উইকেটত পৰাস্ত কৰে। ভাৰতৰ হৈ অ’পেনিং বেটছমেন শুভমন গীল আৰু যশস্বী জয়ছোৱালে অপৰাজিত অৰ্ধশতক অৰ্জন কৰে।
153 ৰাণৰ লক্ষ্য অনুসৰণ কৰি ভাৰতীয় দলে শুভমন গীল আৰু যশস্বী জয়ছোৱালৰ অৰ্ধ শতকৰ সহায়ত 15.2 অভাৰত এটাও উইকেট নেহেৰুৱাকৈ বিজয় সাব্যস্ত কৰে ৷ যশস্বী জয়ছোৱালে মাত্ৰ 53 টা বলতে 93 ৰাণৰ এক দৰ্শনীয় ইনিংছ খেলে ৷ তেওঁ 13 টা চিৰা আৰু দুটা ছয়ৰে নিজৰ ইনিংছ সজায় ৷ মাত্ৰ 7 ৰাণৰ বাবে শতক বঞ্চিত হয় যুৱ খেলুৱৈজন ৷ ইফালে জয়ছোৱালক সংগ দি অধিনায়ক শুভমন গীলে 39 টা বলত 58 ৰাণৰ বৰঙণি আগবঢ়ায় ৷ গীলে 2 টা ছয় আৰু 6 টা চাৰিৰে ব্যক্তিগত 58 ৰাণত অপৰাজিত হৈ থাকে ৷ এই জয়েৰে পাঁচখনীয়া মেচৰ শৃংখলাটোত ভাৰতে 3-1 ব্যৱধানত অগ্ৰগতি লাভ কৰিছে ৷ যশস্বী জয়ছোৱাল প্লেৱাৰ অব দ্য মেচ বিবেচিত হয় ৷
উল্লেখ্য যে, প্ৰথমখন মেচত জিম্বাব'ৱেৰ বিৰুদ্ধে পৰাজয়ৰ পিচত ভাৰতীয় দলটোৱে শৃংখলাত বৃহৎ প্ৰত্যাৱৰ্তন ঘটাই অগ্ৰগতি লাভ কৰিছে ৷ দ্বিতীয় আৰু তৃতীয় T-২০ মেচত টিম ইণ্ডিয়াই সহজেই জয়লাভ কৰে ৷
ইফালে হাৰাৰে স্পৰ্টছ ক্লাবত অনুষ্ঠিত হোৱা আজিৰ মেচখনত টছত জিকি প্ৰথমে ফিল্ডিঙৰ সিদ্ধান্ত লয় ভাৰতে ৷ প্ৰথমে বেটিঙৰ আমন্ত্ৰণ লাভ কৰি জিম্বাব’ৱে দলটোৱে নিজৰ ইনিংছ আৰম্ভ কৰি নিৰ্ধাৰিত 20 অভাৰত 7 টা উইকেটৰ বিনিময়ত 152 ৰাণ সংগ্ৰহ কৰিছে ৷ দলটোৱে শক্তিশালী আৰম্ভণিৰে ভাৰতৰ সন্মুখত 153 ৰাণৰ লক্ষ্য বান্ধি দিছে ৷ জিম্বাব’ৱেৰ হৈ অধিনায়ক তথা জ্যষ্ঠ খেলুৱৈ ছিকন্দৰ ৰাজাই 46 ৰাণৰ এক ইনিংছ খেলে ৷ 28 টা বলতে প্ৰবীণ খেলুৱৈজনে এই স্ক’ৰ সংগ্ৰহ কৰি তুষাৰ দেশপাণ্ডেৰ বলত পেভিলিয়নমুখী হয় ৷ অ’পেনাৰ ৱেছলী মাধেভেৰে (25) আৰু টাদিৱানাশে মাৰুমণি (32) এ দলক এক শক্তিশালী আৰম্ভণি দিয়ে ৷