স্প’ৰ্টছ ডেস্ক: অমীমাংসিতভাৱে সামৰণি পৰে বৰ্ডাৰ-গাভাস্কাৰ ট্ৰফীৰ তৃতীয়খন টেষ্ট ৷ ব্ৰীছবেনৰ গাব্বা ষ্টেডিয়ামত অনুষ্ঠিত টেষ্ট মেচখনৰ অন্তিম দিনটোত বৰষুণে প্ৰভাৱ পেলোৱা দেখা যায় ৷
খেলখনৰ শেষৰ দিনা এক উত্তেজনাপূৰ্ণ পৰিস্থিতিৰ মাজতে অষ্ট্ৰেলিয়াই দ্বিতীয় ইনিংছত ভাৰতক 275 ৰাণৰ লক্ষ্য নিৰ্ধাৰণ কৰি দিছিল ৷ কিন্তু খেলখন শেষ হ’বলৈ 50 অভাৰতকৈও অধিক অভাৰ বাকী থকা অৱস্থাত বৰষুণে বিধি-পথালি দিয়ে ৷
ভাৰত-অষ্ট্ৰেলিয়াৰ মাজৰ তৃতীয়খন টেষ্ট ড্ৰ
বৰষুণে মেচখনত প্ৰভাৱ পেলোৱাৰ পিছত দুয়োটা দলৰ অধিনায়কে খেলখন সমাপ্ত কৰাৰ সিদ্ধান্ত গ্ৰহণ কৰে ৷ খেলখনৰ সমাপ্তি যথেষ্ট হতাশাজনক আছিল, কিন্তু অপ্ৰত্যাশিত নাছিল ।
অন্তিমটো দিনৰ পুৱা ভাৰতীয় বলাৰৰ আধিপত্য
গাব্বা টেষ্টৰ পঞ্চম তথা অন্তিমটো দিনৰ পুৱা ভাৰতীয় বলাৰসকলৰ আধিপত্য দেখা যায় ৷ ভাৰতীয় বলাৰসকলৰ আক্ৰমণাত্মক দৃষ্টিভংগীৰ বাবে অতি কম সময়ৰ ব্যৱধানতে বহুকেইটা উইকেটৰ পতন ঘটিছিল অষ্ট্ৰেলিয়াৰ । অৱশেষত অষ্ট্ৰেলিয়াই 18 অভাৰৰ পিছত 89/7 ৰাণত ইনিংছ ঘোষণা কৰে আৰু ভাৰতক 275 ৰাণৰ লক্ষ্য প্ৰদান কৰে ।
দুয়োটা দলৰ দৃষ্টি ফাইনেলৰ ওপৰত
গাব্বা টেষ্টৰ সামৰণিৰ পিছত শৃংখলাটো 1-1 ত টাই হৈ ৰৈছে । অৱশ্যে এতিয়াও বাকী আছে শৃংখলাৰ আন দুখন ৰোমাঞ্চকৰ মেচ ৷ দুয়োটা দলে বিশ্ব টেষ্ট চেম্পিয়নশ্বিপৰ ফাইনেলত স্থান লাভ কৰাৰ ওপৰত দৃষ্টি ৰাখিছে ৷
আন্তঃৰাষ্ট্ৰীয় ক্ৰিকেটৰ পৰা অৱসৰ অশ্বিনৰ
গাব্বা টেষ্টৰ সামৰণিৰ পিছতে ভাৰতীয় বলাৰ ৰবিচন্দ্ৰন অশ্বিনে ক্ৰিকেটক বিদায় জনায় ৷ ক্ৰিকেটাৰগৰাকীৰ এনে আকস্মিক সিদ্ধান্তত সতীৰ্থসকলৰ লগতে অনুৰাগীসকলো আবেগিক হৈ পৰে ৷
অশ্বিনে 106 খন টেষ্ট মেচত ভাৰতক প্ৰতিনিধিত্ব কৰি 537 টা উইকেট দখল কৰিছে ৷ আনহাতে, খেলুৱৈগৰাকীৰ নামত আছে 3,503 ৰাণ ৷ ভাৰতীয় ক্ৰিকেটলৈ তেওঁৰ এই অৱদান এই অবিশ্বাস্য পৰিসংখ্যাতকৈ বহু বেছি ৷ ক্ৰিকেট জগতত এক সুকীয়া স্থান দখল কৰি থৈছে অশ্বিনে ৷
2014 ৰ পৰা 2019 চনৰ ভিতৰত টেষ্ট ক্ৰিকেটত ভাৰতৰ শীৰ্ষস্থানত উপনীত হোৱাৰ যাত্ৰাত অশ্বিনৰ ভূমিকা আছিল অনবদ্য ৷ কেৱল বলৰ সৈতে নহয়, বেটৰ সৈতেও খেলুৱৈগৰাকীয়ে আগবঢ়াইছিল গুৰুত্বপূৰ্ণ অৱদান ৷ 2020 চনত ছিডনী ক্ৰিকেট গ্ৰাউণ্ডত (এছ চি জি) অষ্ট্ৰেলিয়াৰ বিৰুদ্ধে তেওঁৰ ইনিংছ সদায় স্মৰণীয় হৈ থাকিব ।
লগতে পঢ়ক:এটা যুগৰ অন্ত ! আন্তঃৰাষ্ট্ৰীয় ক্ৰিকেটক চিৰবিদায় ভাৰতীয় ক্ৰিকেটাৰ ৰবিচন্দ্ৰন অশ্বিনৰ
