নেশ্যনেল ডেস্ক,১৫ ফেব্ৰুৱাৰী :আগন্তুক লোকসভা নিৰ্বাচনত প্ৰতিদ্বন্দ্বিতা নকৰে কংগ্ৰেছৰ প্ৰাক্তন সভানেত্ৰী ছোনিয়া গান্ধীয়ে । গান্ধীয়ে সমাজিক মাধ্যমৰ জৰিয়তে এই কথা ঘোষণা কৰে । বৃহস্পতিবাৰে উত্তৰ প্ৰদেশৰ তেওঁৰ ৰায়বৰেলী সমষ্টিৰ ভোটাৰসকলক উদ্দেশ্যি কয় যে স্বাস্থ্য আৰু বয়স বৃদ্ধি হোৱাৰ প্ৰতি লক্ষ্য ৰাখি তেওঁ আগন্তুক লোকসভা নিৰ্বাচনত প্ৰতিদ্বন্দিতা নকৰাৰ সিদ্ধান্ত লৈছে ।
২০০৪ চনৰ পৰা প্ৰতিনিধিত্ব কৰা ৰায়বৰেলী সমষ্টিৰ ভোটাৰসকলক উদ্দেশ্যি দিয়া আৱেগিক পোষ্টটোত ৭৭ বছৰীয়া ছোনিয়া গান্ধীয়ে ৰায়বৰেলী সমষ্টিত তেওঁৰ পৰিয়ালৰ কোনো সদস্যৰ সম্ভাৱ্য প্ৰৱেশৰো সূক্ষ্ম ইংগিত দিয়ে ।
সামাজিক মাধ্যমৰ পোষ্টটোত তেওঁ লিখিছে, "মই গৌৰৱান্বিত যে মই আজি যিয়েই নহওঁক, মই আপোনাৰ বাবে আৰু মই সদায় আপোনাৰ বিশ্বাসক সন্মান জনোৱাৰ বাবে যথাসাধ্য চেষ্টা কৰি আহিছো । এতিয়া স্বাস্থ্য আৰু বয়সৰ সমস্যাৰ বাবে, মই পৰৱৰ্তী লোকসভা নিৰ্বাচনত প্ৰতিদ্বন্দিতা নকৰো । এই সিদ্ধান্তৰ পিচত, মই আপোনাক পোনপটীয়াকৈ সেৱা কৰাৰ সুযোগ নাপাম কিন্তু মোৰ হৃদয় আৰু আত্মা সদায় আপোনাৰ সৈতে থাকিব । মই জানো যে আপুনি ভৱিষ্যতে মোৰ আৰু মোৰ পৰিয়ালৰ কাষত থিয় দিব, ঠিক যেনেদৰে আপুনি অতীতত আছিল ।"
শেহতীয়াকৈ কংগ্ৰেছ নেত্ৰীগৰাকীয়ে ৰাজস্থানৰ পৰা ৰাজ্যসভাৰ আসনৰ বাবে মনোনয়ন দাখিল কৰিছে । তাৰ পিচতে ছোনিয়া গান্ধীয়ে তেওঁৰ ৰায়বৰেলী সমষ্টিৰ ভোটাৰসকলক উদ্দেশ্যি এই বাৰ্তাটো প্ৰেৰণ কৰিছে । অনুমান কৰা হৈছে যে ছোনিয়া গান্ধীৰ কন্যা প্ৰিয়ংকা গান্ধী ভাদ্ৰাই এইবাৰ ৰায়বৰেলী লোকসভা সমষ্টিৰ পৰা প্ৰতিদ্বন্দ্বিতা আগবঢ়াব পাৰে ।
লগতে পঢ়ক :ৰাজস্থানৰ পৰা ৰাজ্যসভাৰ মনোনয়ন দাখিল ছোনিয়া গান্ধীৰ
