গোলাঘাট, ১৬ এপ্ৰিল:অহা ১৯ এপ্ৰিলত ৰাজ্যৰ পাঁচটা লোকসভা সমষ্টিত প্ৰথম পৰ্যায়ৰ নিৰ্বাচন অনুষ্ঠিত হ'ব । দেশৰ অষ্টাদশ লোকসভা নিৰ্বাচনৰ প্ৰথম পৰ্যায়ৰ ভোটগ্ৰহণলৈ মাজত মাত্ৰ তিনি দিন । "আকৌ এবাৰ মোদী চৰকাৰ" ধ্বনিৰে আজি মুখৰিত হ'ল গোলাঘাটৰ অসম-নাগালেণ্ড সীমান্ত । বিত্ত তথা মহিলা আৰু শিশু কল্যাণ মন্ত্ৰী অজন্তা নেওগে আজি লোকসভা নিৰ্বাচনত কাজিৰঙা সমষ্টিৰ মিত্ৰজোঁটৰ প্ৰাৰ্থী কামাখ্যা প্ৰসাদ তাছাৰ সমৰ্থনত গোলাঘাট বিধানসভা সমষ্টিৰ সীমান্তৰ পঞ্চায়তত প্ৰচাৰ চলায় ।
জয়পুখুৰী মিনি ষ্টেডিয়ামত অনুষ্ঠিত জনসভাত শিশু কল্যাণ মন্ত্ৰী অজন্তা নেওগে দেশত উন্নয়নৰ গতি অব্যাহত ৰখাৰ স্বাৰ্থত পুনৰ প্ৰধানমন্ত্ৰী নৰেন্দ্ৰ মোদীক দিল্লীৰ শাসনৰ গাদীত বহুৱাবলৈ ৰাইজক আহ্বান জনায় । তেওঁ কয় "প্ৰধানমন্ত্ৰী নৰেন্দ্ৰ মোদীৰ আমোলত সমাজৰ সকলো শ্ৰেণীৰ মানুহৰ সমান বিকাশ হৈছে । সাধাৰণ লোকে চৰকাৰী আঁচনিৰ দ্বাৰা পোনপটীয়াকৈ উপকৃত হৈছে । আপোনালোকৰ ভৱিষ্যতৰ স্বাৰ্থতে প্ৰধানমন্ত্ৰী নৰেন্দ্ৰ মোদীক শাসনত ৰাখিব লাগিব ।"