কংগ্ৰেছৰ প্ৰাৰ্থী তালিকাৰ পাচতে বিৰোধী ঐক্য মঞ্চত অসন্তুষ্টি

বিৰোধী ঐক্য মঞ্চৰ আসন দাবীদাৰ দলক উপেক্ষা কৰি কংগ্ৰেছে প্ৰকাশ কৰিলে ১২ টা সমষ্টিৰ প্ৰাৰ্থী তালিকা । একমাত্ৰ ডিব্ৰুগড় সমষ্টি এৰি দিলে মিত্ৰদল অসম জাতীয় পৰিষদৰ সভাপতি লুৰীণজ্যোতি গগৈক । ঘোষণা কৰিবলৈ বাকী আছে লখিমপুৰ সমষ্টিৰ প্ৰাৰ্থীৰ নাম । বৰপেটাত নিৰ্বাচন খেলিব বিৰোধী ঐক্য মঞ্চৰ চি পি আই এম দলে । কাইলৈ প্ৰকাশ কৰিব প্ৰাৰ্থী তালিকা । নিজৰ প্ৰাৰ্থী তালিকা প্ৰকাশৰ বাবে সাজু আপ, তৃণমূল কংগ্ৰেছ ।

গুৱাহাটী, ১২ মাৰ্চ :বহু জল্পনা-কল্পনাৰ অৱসান ঘটাই অৱশেষত কংগ্ৰেছ দলে ঘোষণা কৰিলে ১২টা সমষ্টিৰ প্ৰাৰ্থী তালিকা । ১৬টা বিৰোধী ৰাজনৈতিক দলৰে গঠিত বিৰোধী ঐক্য মঞ্চক প্ৰাধান্য নিদি কংগ্ৰেছ দলে নিজাকৈ ১২টা সমষ্টিত প্ৰাৰ্থী দিয়াৰ ঘোষণা কৰি মঙলবাৰে সন্ধিয়া প্ৰকাশ কৰিলে ১২টা সমষ্টিৰ প্ৰাৰ্থীৰ তালিকা । লখিমপুৰ সমষ্টিৰ প্ৰাৰ্থীৰ নাম এতিয়াও ঘোষণা কৰা নাই ।

বিৰোধী ঐক্য মঞ্চত অসন্তুষ্টি

ইফালে ডিব্ৰুগড় সমষ্টিটো মিত্ৰদল অসম জাতীয় পৰিষদৰ সভাপতি লুৰীণজ্যোতি গগৈক এৰি দিয়াৰ কথা ইতিমধ্যে কংগ্ৰেছ দলে ঘোষণা কৰিছে । একমাত্ৰ অসম জাতীয় পৰিষদৰ বাহিৰে মিত্ৰদলৰ কোনো এটা দলকে এখনো আসন নিদিলে কংগ্ৰেছ দলে । কংগ্ৰেছ দলে আজি প্ৰকাশ কৰা ১২টা সমষ্টিৰ প্ৰাৰ্থী তালিকাৰ পাচতে বিৰোধী ঐক্য মঞ্চত দেখা দিছে অসন্তুষ্টিয়ে । অৱশ্যে বিৰোধী ঐক্য মঞ্চত আসনকেন্দ্ৰিক অসন্তুষ্টি বহু আগৰে পৰা আছিল যদিও আসন বুজাবুজিক লৈ আলোচনা অব্যাহত আছিল । কিন্তু আজি তালিকা প্ৰকাশৰ পাচতে সকলো কথা স্পষ্ট হৈ পৰিল ।

বিৰোধী ঐক্য মঞ্চৰ আসন বিচৰা দলসমূহক এলাগী কৰি কংগ্ৰেছে প্ৰকাশ কৰিলে প্ৰাৰ্থী তালিকা । উল্লেখ্য যে চি পি আই এম দলে একপ্ৰকাৰ আৰম্ভণিৰ পৰাই বৰপেটা সমষ্টি বিচাৰি আহিছিল । আনকি তেওঁলোকে কংগ্ৰেছ দলক লিখিত আকাৰেও নিজৰ অভিব্যক্তি প্ৰকাশ কৰিছিল । বৰপেটা সমষ্টিত চি পি আই এমৰ বৰ্ষীয়ান নেতা মনোৰঞ্জন তালুকদাৰৰ নামটো চৰ্চিত হৈ আহিছে । কিন্তু তাৰ পাচতো চি পি আই এম দলক উপেক্ষা কৰি কংগ্ৰেছ দলে বৰপেটা সমষ্টিত কংগ্ৰেছৰ প্ৰাৰ্থী হিচাপে দ্বীপ বায়নক প্ৰক্ষেপ কৰে ।

কংগ্ৰেছে আজি প্ৰকাশ কৰা তালিকা সন্দৰ্ভত প্ৰতিক্ৰিয়া প্ৰকাশ কৰি চি পি আই এমৰ ৰাজ্যিক সম্পাদক সুপ্ৰকাশ তালুকদাৰে কয় যে বৰ্তমান বিৰোধী ঐক্য মঞ্চ বুলি একো নাই । চি পি আই এম নিজৰ স্থিতিত অটল আছে বুলি সদৰী কৰি তেওঁ কয় যে তেওঁলোকে বৰপেটা সমষ্টিত নিৰ্বাচন খেলাটো নিশ্চিত । কাইলৈ তেওঁলোকে প্ৰাৰ্থীৰ নাম ঘোষণা কৰাৰ সম্ভাৱনা আছে । অৱশ্যে তেওঁলোকে কেইখন আসনত প্ৰতিদ্বন্দ্বিতা কৰিব সেয়া নিশ্চিত কৰা নাই যদিও বৰপেটাত খেলাটো খাটাং ।

ইফালে চি আই এম দলেও কেইবাখনো আসনত প্ৰতিদ্বন্দ্বিতা কৰাৰ বাবে সাজু হৈ আছে । আনহাতে তৃণমূল কংগ্ৰেছে ইতিমধ্যেই চাৰিখন আসনত প্ৰতিদ্বন্দ্বিতা কৰাৰ কথা ঘোষণা কৰিছে । সেইদৰে আম আদমী দলেও মিত্ৰতা নাথাকিলে ১৪খন আসনতে খেলাৰ বাবে সাজু হৈ আছে । তেনেস্থলত বিৰোধী ঐক্য মঞ্চৰ অস্তিত্বক লৈ প্ৰশ্ন উত্থাপন হৈছে । আগন্তুক দিনত যে বিৰোধী ঐক্য মঞ্চৰ সংখ্যা কমিব সেয়া নিশ্চিত ।

লগতে পঢ়ক :অসমত কংগ্ৰেছে কাক কাক দিলে প্ৰাৰ্থিত্ব ? ৰাজ্যৰ ১২ খন আসনৰ প্ৰাৰ্থী ঘোষণা