এডভেন্সাৰ, শান্তি আৰু সাংস্কৃতিক গভীৰতাৰ সংমিশ্ৰণ বিচৰা বিশ্বৰ পৰ্যটকসকলে ইণ্ডোনেছিয়াক প্ৰায়ে তেওঁলোকৰ প্ৰথম অগ্ৰাধিকাৰৰ এক গন্তব্য স্থান হিচাপে গণ্য কৰে । দেশখনৰ কৌশলগত অৱস্থানৰ বাবে ই বিশ্বজনীন স্থিতিক প্ৰভাৱিত কৰিছে ।
ইণ্ডোনেছিয়া এসময়ত ডাচ্চসকলৰ এক লাভজনক উপনিবেশ আছিল । দ্বিতীয় বিশ্বযুদ্ধৰ পিছত 1945 চনত দেশখনে নিজৰ স্বাধীনতাৰ ওপৰত জোৰ দিয়ে । এই স্বৰ্গভূমিৰ নাম দুটা গ্ৰীক শব্দ 'ইণ্ডাছ', যাৰ অৰ্থ হৈছে সিন্ধু নদী আৰু 'নেচোছ' যাৰ অৰ্থ হৈছে দ্বীপ, তাৰ পৰা উৎপত্তি হৈছে । ইণ্ডোনেছিয়াৰ আক্ষৰিক অৰ্থ 'ভাৰতীয় দ্বীপ' হিচাপে ভাৰতীয় উপ-মহাদেশৰ সৈতে ইয়াৰ ঐতিহাসিক সম্পৰ্কক সূচায় ।
অতি জটিল ভাস্কৰ্যৰে নিৰ্মিত মন্দিৰ (ETV Bharat Assam) জাভা, যাক জাৱা হিচাপেও উচ্চাৰণ কৰা হয়, হৈছে ইণ্ডোনেছিয়াৰ বৃহত্তৰ সুণ্ডা দ্বীপপুঞ্জৰ ভিতৰত এটা । ই ভাৰত মহাসাগৰ আৰু জাভা সাগৰৰ মাজত অৱস্থিত । এই দ্বীপটো মালয়েছিয়াৰ দক্ষিণ-পূব আৰু সুমাত্ৰাত অৱস্থিত । ইয়াৰ অৱস্থান হৈছে ব'ৰ্নিঅ'ৰ (কালিমন্তন) দক্ষিণে আৰু বালিৰ পশ্চিমে ।
জাভা হৈছে এই দ্বীপপুঞ্জটোৰ চতুৰ্থ বৃহত্তম দ্বীপ । এই দ্বীপটোৱে ইণ্ডোনেছিয়াৰ সাংস্কৃতিক, ৰাজনৈতিক আৰু অৰ্থনৈতিক কেন্দ্ৰ হিচাপে কাম কৰে । বিশ্বৰ আটাইতকৈ জনবহুল দ্বীপ হিচাপে ইয়াৰ স্থিতিৰ পৰা আৰম্ভ কৰি এক অতি মনোৰম দৃশ্যাৱলী, সুউচ্চ আগ্নেয়গিৰি, চিত্তাকৰ্ষক ধাননি আৰু সংস্কৃতিৰ এক সমৃদ্ধ ভঁৰাললৈকে জাভাই অন্বেষণকাৰীসকলৰ বাবে বিৰল অভিজ্ঞতাৰ এক সমৃদ্ধ সম্পদ নিশ্চিত কৰে ।
জাভাত সক্ৰিয় আৰু সুপ্ত দুয়ো প্ৰকাৰৰ আগ্নেয়গিৰি আছে । যেনে মাউণ্ট মেৰাপি আৰু মাউণ্ট ব্ৰোমো । এই দুটা আগ্নেয়গিৰিয়ে ইয়াৰ ভূতাত্ত্বিক আৰু কৃষিভূমিক গভীৰভাৱে প্ৰভাৱিত কৰিছে । ধানখেতি হৈছে জাভাৰ অৰ্থনীতিৰ আধাৰশিলা । ইয়াৰ ধাননি পথাৰৰ সেউজ-সোণালী দলিচা সঁচাকৈয়ে এক মনোমোহা দৃশ্য ।
জাভাৰ পৰ্যটন
সূৰ্যাস্তৰ মনোৰম দৃশ্য (ETV Bharat Assam) জাভাৰ বিভিন্ন দৃশ্যাৱলী, সাংস্কৃতিক আৰু ঐতিহ্যক্ষেত্ৰবোৰে বিভিন্ন পৰ্যটকক হাত বাউলি মাতে । লগতে সকলো বয়সৰে পৰ্যটকক মনোৰম উপহাৰ আগবঢ়ায় । মধ্য জাভাৰ মাগেলাঙত অৱস্থিত ২,৬৭২ টা জটিল ভাস্কৰ্য আৰু বুদ্ধৰ ৫০৪ টা মূৰ্তিৰে সজ্জিত নৱম শতিকাৰ বড়োবুদুৰ মন্দিৰটোৱে এক ৰাজকীয় সূৰ্যোদয়ৰ সাক্ষী প্ৰদান কৰে আৰু ইয়াৰ দৃশ্য চাবলগীয়া । ই ইউনেস্কোৰ বিশ্ব ঐতিহ্যক্ষেত্ৰও । এক বৈকল্পিক সূৰ্যোদয় কেন্দ্ৰৰ বাবে মেৰাপি মেৰবাবু পৰ্বতৰ দ্বাৰা আৱৰি থকা পাহাৰ পুন্থুক চেটুম্বুৰ এক বিবেচনাৰ বিষয় ।
পাদাৰ দ্বীপ, পিংক বীচ দ্বীপ, কোমোডো দ্বীপ, লোহ লিয়াং কোমোডো ৰাষ্ট্ৰীয় উদ্যান, টাকা মাকাচাৰ দ্বীপ আৰু মাণ্টা পইণ্ট হৈছে ওচৰতে অৱস্থিত আন কেইটামান মুখ্য আকৰ্ষণ । ইয়াৰ চমৎকাৰ সোণালী আৰু ৰূপৰ সূৰ্যোদয়ৰ বাবে বিখ্যাত ডিয়েং মালভূমি হৈছে হিন্দু আৰু বৌদ্ধ পৰম্পৰাৰ বাবে এক অতি শ্ৰদ্ধাৰ স্থান । ইয়াৰ আধ্যাত্মিক গুৰুত্বৰ বাবে মালভূমিটোক 'আকাশৰ পৰিসীমাৰ বাহিৰৰ ভূমি' বুলিও কোৱা হয় ।
জাভাৰ আগ্নেয়গিৰি (ETV Bharat Assam) অৰ্জুন মন্দিৰ, চিকিদাং ক্ৰেটাৰ, টাম্বি চাহ খেতি, বেদাকাহ হ্ৰদ, মেঞ্জাৰ হ্ৰদ আৰু বিমছ ৱাটাৰ স্প্ৰিং হৈছে সাংস্কৃতিক চহৰ যোগ্যাকাৰ্তা বা যোগজাত ভ্ৰমণ কৰিবলগা আন কেইখনমান ঠাই । ইয়াৰ জীৱন্ত কলাত্মক দৃশ্য, পৰম্পৰাগত বজাৰ আৰু সুস্বাদু স্থানীয় ৰন্ধনপ্ৰণালীৰ বাবে ই জনাজাত ।
জোম্বলাং গুহা দুৰ্বল হৃদস্পন্দনৰ ব্যক্তিৰ বাবে নহয়, কিয়নো বিশেষ ৰোপ ৱে ব্যৱস্থা ব্যৱহাৰ কৰি গুহাৰ মাজেৰে ৯০ মিটাৰ তললৈ অৱতৰণ কৰাটো যথেষ্ট কঠিন হ'ব পাৰে । কিন্তু গুহাটোত সূৰ্যাস্তৰ আশ্চৰ্যকৰ দৃশ্যটো চাবলগীয়া । ভ্ৰমণত একেদিনাই সামৰি ল'ব পৰা ঠাইবোৰ হৈছে মালিওবৰো, বেৰিংহাৰ্জো মাৰ্কেট, চুলতান পেলেচ (ৱিনোংগো নদী আৰু কোড নদীৰ মাজত অৱস্থিত), যোগজা পেলেচ (য'ত জাভানিজ স্থাপত্যৰ একক শৈলী দেখুওৱা হৈছে), বাটিক গৃহ উদ্যোগ আৰু কোটাগেড (ৰূপৰ খনিকৰসকলৰ অনন্য কামবোৰ চাবলৈ আৰু ক্ৰয় কৰিবলৈ) ।
টেংগাৰ পৰ্বতমালাত অৱস্থিত মাদাকাৰীপুৰা জলপ্ৰপাত, যাক ইটাৰ্ণেল জলপ্ৰপাত বুলিও কোৱা হয়, হৈছে এক লুকাই থকা ৰত্ন যিয়ে স্পৰ্শ নোহোৱাকৈ থকা প্ৰকৃতিৰে আৱৰি থকা ঝৰ্ণাৰ পানীৰ এটা গম্বুজ প্ৰদান কৰে । 2,782 মিটাৰ (9,127 ফুট) উচ্চ পানাঞ্জাকান পৰ্বত, সুপ্ৰতিষ্ঠিত মাউণ্ট ব্ৰোমো (এটা গহ্বৰৰ সৈতে এক ৰাজকীয় আগ্নেয়গিৰি) আৰু চাৰিওফালৰ আগ্নেয়গিৰিৰ দৃশ্যপটৰ এক মনোৰম আভা প্ৰদান কৰে ।
জাভাৰ আগ্নেয়গিৰি (ETV Bharat Assam) জাভানিজ সংস্কৃতিৰ গভীৰতা
জাভা হৈছে এক বিগলিত সাংস্কৃতিক পাত্ৰ । দক্ষিণ-পূব এছিয়াৰ আটাইতকৈ প্ৰভাৱশালী জাভানিজ সংস্কৃতি হৈছে মালয়, জাভানী আৰু অন্যান্য জাতিগত প্ৰভাৱৰ এক অবিশ্বাস্য মিশ্ৰণ । তেওঁলোকৰ পৰম্পৰা, কলা, ৰন্ধনপ্ৰণালী আৰু গভীৰ আধ্যাত্মিক বিশ্বাসৰ বিচিত্ৰতা থকা সত্ত্বেও অঞ্চলটোত বিভিন্ন ধৰ্ম যেনে হিন্দু, বৌদ্ধ ধৰ্মৰ লোকৰ সৈতে প্ৰধান ধৰ্ম ইছলামধৰ্মী লোকসকলে যি অতি বিশ্বাসেৰে সহৱস্থান কৰি আছে সেয়া সঁচাকৈয়ে লক্ষণীয় ।
প্ৰায়ে হিন্দু মহাকাব্যৰ ওপৰত ভিত্তি কৰি আৰু গেমলান সংগীতৰ সৈতে ছাঁ পুতলা প্ৰদৰ্শন জাভানি সংস্কৃতিৰ আধাৰশিলা । গেমলান হৈছে গং, জাইলোফোন আৰু অন্যান্য বাদ্যযন্ত্ৰৰে গঠিত এক পাৰকাচনৰ সংমিশ্ৰণ ।
জাভাত পৰিয়ালৰ সৈতে নিবন্ধকাৰ (ETV Bharat Assam) বাটিক কলাৰ সাংস্কৃতিক গুৰুত্ব আছে । দৰাচলতে কাপোৰত ৰং কৰা এই জটিল কৌশলটো জাভানিজ পৰিচয়ৰ প্ৰতীক । এই কলাৰ আৰ্হিবোৰে প্ৰায়ে প্ৰকৃতি, পৌৰাণিক কাহিনী বা সামাজিক বিষয়বস্তু প্ৰদৰ্শন কৰে । ভাৰতত বাটিক কলাৰ এই আন্দাজ অজন্তা আৰু ইলোৰা গুহাৰ প্ৰাচীন ভাস্কৰ্য চিত্ৰবোৰত লগাব পাৰি । শেহতীয়া দশকবোৰত বাটিকৰ প্ৰতি এক নতুন আগ্ৰহ দেখা গৈছে । শিল্পী আৰু ডিজাইনাৰসকলে নতুন কৌশলৰ সৈতে পৰীক্ষা-নিৰীক্ষা কৰিছে আৰু সমসাময়িক ডিজাইনৰ সৈতে পৰম্পৰাগত শৈলীৰ সংমিশ্ৰণ কৰিছে ।
ইণ্ডোনেছিয়ানসকলৰ মাজত এক সাধাৰণ বৈশিষ্ট্য হৈছে তেওঁলোকৰ সাংস্কৃতিক, ধৰ্মীয় বা ভাষিক পটভূমি নিৰ্বিশেষে পৰ্যটকসকলৰ প্ৰতি তেওঁলোকৰ আতিথ্য আৰু সন্মান । ইণ্ডোনেছিয়ালৈ যোৱা যিকোনো লোকে সঁচাকৈয়ে সংস্কৃত শ্লোক 'অতিথি দেৱ ভৱ' অনুভৱ কৰিব পাৰে । যাৰ অৰ্থ হৈছে অতিথিসকলক পৰম সন্মান আৰু শ্ৰদ্ধাৰে ব্যৱহাৰ কৰা ।
উত্তৰ-পূব ভাৰত আৰু ইণ্ডোনেছিয়াৰ পৰ্যটনৰ তুলনামূলক বিশ্লেষণ
যদিও ভাৰত আৰু ইণ্ডোনেছিয়া দ্ৰুতগতিত বিকশিত অৰ্থনীতি, কিন্তু ভাৰতৰ সামগ্ৰিকভাৱে এক বৃহত্তৰ অৰ্থনীতি আছে আৰু আমাৰ জনমূৰি জিডিপি অধিক । কিন্তু পৰ্যটনৰ ওপৰত ইণ্ডোনেছিয়াৰ কৌশলগত গুৰুত্বই ইয়াৰ অৰ্থনৈতিক বিকাশত এক গুৰুত্বপূৰ্ণ গতি প্ৰদান কৰিছে, যিটো লক্ষণীয় ।
দুয়োখন দেশে পৰ্যটনৰ ক্ষেত্ৰত বিভিন্ন অভিজ্ঞতা আগবঢ়ায় । কিন্তু ভাৰতৰ উত্তৰ-পূবৰ ৰাজ্যসমূহৰ তুলনাত ইণ্ডোনেছিয়াই ইয়াৰ পৰ্যটনৰ ক্ষেত্ৰত অতি গুৰুত্বপূৰ্ণ স্থিতিৰে থিয় দিছে, বিশেষকৈ পেছাদাৰী সেৱাক ব্যক্তিগত স্পৰ্শৰ সৈতে একত্ৰিত কৰি । ইণ্ডোনেছিয়াৰ আন্তঃগাঁথনি, যাতায়াত, বাসস্থান আৰু পৰ্যটন সুবিধাকে ধৰি বিভিন্ন ক্ষেত্ৰই মনোমোহা দৃশ্যাৱলী, বিবিধ উদ্ভিদ আৰু প্ৰাণী আৰু সমৃদ্ধ আৰু অনন্য সাংস্কৃতিক ঐতিহ্য থকা সত্ত্বেও উত্তৰ-পূবক অতিক্ৰম কৰিছে ।
ইণ্ডোনেছিয়াৰ কৰ্মচাৰীৰ সময়ানুৱৰ্তিতা, অনুশাসন, পৰিচ্ছন্নতা, আতিথ্য আৰু ইতিবাচক মনোভাবে দেশখনৰ পৰ্যটন ক্ষেত্ৰত যি আবেদন, তাত গুৰুত্বপূৰ্ণ অৰিহণা যোগাইছে । 'সাক্ষাৎ আৰু অভিবাদন' তেওঁলোকৰ পৰ্যটন খণ্ডৰ এক আশ্চৰ্যকৰ অংশ । পৰ্যটকসকলক আগমনৰ পিচত আৰু তেওঁলোকৰ দেশৰ পৰা প্ৰস্থান নোহোৱালৈকে উষ্ম আদৰণি জনোৱা হয় আৰু তেওঁলোকৰ সৈতে আন্তৰিক বাৰ্তালাপ কৰা হয় ।
আনহাতে, উত্তৰ-পূবৰ বিপৰীতে তেওঁলোকৰ ইংৰাজীত সীমিত দক্ষতা থকা সত্ত্বেও পৰ্যটকসকলৰ সৈতে কাৰ্যকৰী যোগাযোগ কেতিয়াও ইণ্ডোনেছিয়ানসকলৰ বাবে এক ডাঙৰ প্ৰত্যাহ্বান নহয় । আনকি ইণ্ডোনেছিয়াৰ কেবচালকসকলেও পৰ্যটক গাইডৰ দৰে তেওঁলোকৰ সংস্কৃতি আৰু ঐতিহাসিক স্থানবোৰৰ গভীৰ জ্ঞান ৰাখে আৰু তেওঁলোকে স্বেচ্ছাই কৌতুহলী পৰ্যটকৰ সৈতে তথ্যপূৰ্ণভাৱে বাৰ্তালাপ কৰে ।
অতি বন্ধুত্বপূৰ্ণ স্থানীয় লোকসকলে পৰ্যটকসকলক স্বাগতম জনায় আৰু তেওঁলোকক ঘৰুৱা পৰিৱেশৰ অনুভৱ কৰায় । আনহাতে, তেওঁলোকৰ সুস্বাদু স্থানীয় ৰন্ধনপ্ৰণালীও আন এক আকৰ্ষণৰ বস্তু । তেওঁলোকৰ আছে উৎকৃষ্ট বিমান আৰু পথ সংযোগ, যাৰ দ্বাৰা আৰামদায়ক আৰু সুৰক্ষিত ভ্ৰমণৰ অভিজ্ঞতা নিশ্চিত কৰা হয় । আমাৰ সমৃদ্ধ ইতিহাস আৰু সংস্কৃতিৰ বিষয়ে শিশুসকলক আৰু নিজকে সৃষ্টিশীলভাৱে শিক্ষিত কৰি, অনুশাসন, সময়ানুৱৰ্তিতা আৰু আতিথ্যৰ দৰে মূল্যবোধ গঢ়ি তুলি আৰু পৰ্যটন আন্তঃগাঁথনিত অধিক বিনিয়োগ কৰি, চমুকৈ ক'বলৈ হ'লে পৰ্যটক-অনুকূল হৈ উত্তৰ-পূৰ্বাঞ্চলৰ ৰাজ্যসমূহক অৰ্থনৈতিকভাৱে স্বাৱলম্বী কৰাৰ পথ প্ৰশস্ত কৰিব পাৰি ।
মোৰ সমগ্ৰ জীৱনজুৰি এই দ্বীপটোৰ অনন্য সংস্কৃতিত মই নিজকে নিমজ্জিত কৰাৰ স্মৃতিবোৰ কঢ়িয়াই লৈ ফুৰিম । পাৰিলে এবাৰ যাওক আৰু জাভাৰ প্ৰশান্তিত নিজকে এবাৰ বিলীন কৰি দিয়ক ।
