ইণ্টাৰনেশ্যনেল ডেস্ক, 10 জুলাই:ৰাছিয়াৰ সৈতে ভাৰতৰ সম্পৰ্ক সন্দৰ্ভত আমেৰিকা চৰকাৰৰ স্থিতি পুনৰবাৰ স্পষ্ট কৰি আমেৰিকাৰ বিদেশ মন্ত্ৰণালয়ৰ মুখপাত্ৰ মেথিউ মিলাৰে কয় যে তেওঁলোকে এই বিষয়ে যথেষ্ট স্পষ্টভাৱে প্ৰকাশ কৰিছে আৰু সেইবোৰ ব্যক্তিগতভাৱে অৱগত কৰা হৈছে আৰু আগলৈও কৰিব ।
দেশখনৰ বিদেশ মন্ত্ৰণালয়ৰ মুখপাত্ৰ মেথিউ মিলাৰে কয়, "ৰাছিয়াৰ সৈতে ভাৰতৰ সম্পৰ্কক লৈ আমি আমাৰ উদ্বেগ স্পষ্টকৈ প্ৰকাশ কৰি আহিছো । আমি সেইবোৰ ব্যক্তিগতভাৱে, পোনপটীয়াকৈ ভাৰত চৰকাৰৰ আগত প্ৰকাশ কৰিছো ।"
প্ৰধানমন্ত্ৰী মোদীৰ মস্কো ভ্ৰমণ, শক্তি আৰু তেলৰ সৈতে জড়িত কিছুমান ঘোষণা সন্দৰ্ভত সোধা এক প্ৰশ্নৰ উত্তৰত মিলাৰে উত্তৰ দিয়ে যে আমেৰিকাই ভাৰত চৰকাৰক নিজৰ উদ্বেগ প্ৰকাশ কৰিছে আৰু প্ৰকাশ কৰে যে এই বিষয়ত কূটনৈতিক কথা-বতৰা বিগত 24 ঘণ্টা ধৰি হৈয়েই আছে ।
সংবাদ মাধ্যমক সম্বোধন কৰি মিলাৰে কয়, "বিগত 24 ঘণ্টাত আমি দেশখনৰ সৈতে কথা-বতৰা পাতিছো ।’’
তদুপৰি, প্ৰধানমন্ত্ৰী মোদীৰ শেহতীয়া ৰাছিয়া ভ্ৰমণ আৰু এই সন্দৰ্ভত আমেৰিকাৰ স্থিতিৰ বিষয়ে সোধাত সংবাদ মাধ্যমৰ আগত মিলাৰে কয়, "আমি ভাৰতক ইউক্ৰেইনৰ শান্তিপূৰ্ণ সমাধানৰ প্ৰচেষ্টাক সমৰ্থন কৰিবলৈ আহ্বান জনাই আহিছো । আমি ভাৰতক শান্তিৰ গুৰুত্ব উপলব্ধি কৰাৰ প্ৰচেষ্টাক সমৰ্থন কৰিবলৈ আহ্বান জনাইছো । ইউক্ৰেইনৰ ভূখণ্ডীয় অখণ্ডতা আৰু ইয়াৰ সাৰ্বভৌমত্ব ৰক্ষাৰ ওপৰত ভিত্তি কৰি ৰাষ্ট্ৰসংঘৰ চনদ নীতিৰ ভিত্তিত ইউক্ৰেইনত চিৰস্থায়ী আৰু ন্যায্য শান্তি স্থাপন কৰিবলৈ আহ্বান জনাইছো, আৰু সেয়া অব্যাহত থাকিব ।"
শেহতীয়াকৈ মস্কোলৈ আনুষ্ঠানিক ভ্ৰমণৰ বাবে যোৱা প্ৰধানমন্ত্ৰী নৰেন্দ্ৰ মোদীয়ে মঙলবাৰে ৰাছিয়াৰ ৰাষ্ট্ৰপতি ভ্লাদিমিৰ পুটিনৰ সৈতে সাক্ষাৎ কৰি অশুল্ক বাণিজ্যিক বাধাসমূহ দূৰ কৰি 2030 চনৰ ভিতৰত 100 বিলিয়ন মাৰ্কিন ডলাৰৰ ওপৰৰ পাৰস্পৰিক বাণিজ্যৰ পৰিমাণ লাভ কৰাৰ তেওঁলোকৰ লক্ষ্যৰ ৰূপৰেখা দাঙি ধৰে ৷
ৰাষ্ট্ৰীয় মুদ্ৰা ব্যৱহাৰ কৰি দ্বিপাক্ষিক নিষ্পত্তি ব্যৱস্থা গঢ়ি তোলা আৰু পাৰস্পৰিক নিষ্পত্তিৰ বাবে ডিজিটেল বিত্তীয় যন্ত্ৰৰ ধাৰাবাহিক প্ৰৱৰ্তনৰ ওপৰতো কাম কৰাৰ সিদ্ধান্ত গ্ৰহণ কৰে ।