অমৃতসৰ: আমেৰিকাৰ নতুন ৰাষ্ট্ৰপতি ড'নাল্ড ট্ৰাম্প ক্ষমতাত অহাৰ লগে লগে দেশখনলৈ অবৈধ প্ৰব্ৰজনকাৰীৰ বিৰুদ্ধে কঠোৰ হৈ পৰিছে । তাৰেই অংশ হিচাপে ইতিমধ্যে দেশখনৰ পৰা বিতাড়ন কৰা ২০৫ জন ভাৰতীয় বুধবাৰে ভাৰতত উপস্থিত হ'ব । আমেৰিকাৰ সামৰিক বিমান চি-১৭ অমৃতসৰ বিমানবন্দৰত অৱতৰণ কৰিব ।
বিমানখনে মঙলবাৰে আবেলি ছান এণ্টনিঅ'ৰ পৰা অমৃতসৰৰ শ্ৰীগুৰু ৰামদাস আন্তঃৰাষ্ট্ৰীয় বিমানবন্দৰলৈ ৰাওনা হৈছে । ইফালে বিমানখনে আমেৰিকাৰ পৰা উৰা মৰাৰ পিছতে অমৃতসৰ বিমানবন্দৰত ভিৰ যথেষ্ট বৃদ্ধি পাইছে । উল্লেখ্য যে পূৰ্বতে বিমানখন অমৃতসৰ বিমানবন্দৰত অৱতৰণৰ সময় পুৱা ৯ বজাত নিৰ্ধাৰণ কৰা হৈছিল যদিও বৰ্তমান বিমানখন দুপৰীয়া ১ বজাৰ ভিতৰত বিমানবন্দৰত উপস্থিত হ'ব ।
ইতিমধ্যে নিৰ্বাসিত ভাৰতীয়সকলৰ পৰিয়ালৰ সদস্যসকল বিমানবন্দৰত উপস্থিত হ'বলৈ আৰম্ভ কৰিছে । তথ্য অনুসৰি, আমেৰিকাৰ পৰা অহা বিমানখনত 11 জন ক্ৰু সদস্য আৰু 45 জন আমেৰিকান বিষয়া আছে । তেওঁলোকে অমৃতসৰ বিমানবন্দৰত 205 গৰাকী ভাৰতীয়ক অৱতৰণ কৰাই উভতি যাব । অৱশ্যে পঞ্জাবৰ বাহিৰে আন ৰাজ্যৰ পৰা কিমানগৰাকী ভাৰতীয়ক বিতাড়ন কৰা হৈছে সেয়া এতিয়াও স্পষ্ট হোৱা নাই । ইফালে ভাৰতীয় সুৰক্ষা সংস্থাসমূহক অমৃতসৰ বিমানবন্দৰত মোতায়েন কৰা হৈছে ।
অপৰাধমূলক পটভূমি পৰীক্ষাৰ বাবে সতৰ্ক সুৰক্ষা সংস্থা
সূত্ৰৰ পৰা পোৱা তথ্য অনুসৰি, আমেৰিকান বিমানখনত অহা সকলো লোকৰ নথিপত্ৰ অমৃতসৰ বিমানবন্দৰত পৰীক্ষা কৰা হ'ব । ইমিগ্ৰেচন আদিৰ উপৰি এই লোকসকলৰ সমগ্ৰ পটভূমি, বিশেষকৈ অপৰাধৰ তথ্যও পৰীক্ষা কৰা হ'ব । যদি কাৰোবাৰ অপৰাধমূলক ৰেকৰ্ড আছে, তেন্তে তেওঁক বিমানবন্দৰতে গ্ৰেপ্তাৰ কৰা হ'ব । তথ্য অনুসৰি, আমেৰিকাৰ পৰা বিতাড়িত এই ভাৰতীয়সকলৰ ভিতৰত এনে কিছু লোকো থাকিব পাৰে যিয়ে ভাৰতত অপৰাধ কৰাৰ পিছত আমেৰিকালৈ পলাই গৈছিল ।
ট্ৰাম্পৰ বিতাড়ন পৰিকল্পনা
উল্লেখ্য যে আমেৰিকাৰ ৰাষ্ট্ৰপতি ড'নাল্ড ট্ৰাম্পে তেওঁৰ নিৰ্বাচনী প্ৰতিশ্ৰুতি অনুসৰি গণ 'বিতাড়ন পৰিকল্পনা'ৰ অধীনত অবৈধ ভাৰতীয় অনুপ্ৰৱেশকাৰীসকলৰ বিৰুদ্ধে ব্যৱস্থা গ্ৰহণ আৰম্ভ কৰিছে । ট্ৰাম্প প্ৰশাসনে বিশেষকৈ নথিভুক্ত অনুপ্ৰৱেশকাৰীসকলৰ বিৰুদ্ধে কঠোৰ ব্যৱস্থা গ্ৰহণ কৰিছে । ইয়াৰ পিছত টেক্সাছৰ পৰা 205 গৰাকী ভাৰতীয় নাগৰিকক লৈ আমেৰিকাৰ সামৰিক বিমানখন ভাৰতলৈ আহি আছে ।
1.5 নিযুত অবৈধ অনুপ্ৰৱেশকাৰীক চিনাক্ত আমেৰিকাৰ
আনহাতে, সংবাদ মাধ্যমৰ প্ৰতিবেদন অনুসৰি প্ৰায় ১.৫ নিযুত লোকক বিতাড়নৰ বাবে ইতিমধ্যে চিনাক্ত কৰা হৈছে । ইয়াৰ ভিতৰত আছে ১৮,০০০ ভাৰতীয়ও । তেওঁলোকৰ তালিকা ইতিমধ্যে প্ৰস্তুত কৰা হৈছে । তাৰে ভিতৰত 205 গৰাকী ভাৰতীয় নাগৰিকক লৈ প্ৰথমখন চি-17 সামৰিক বিমান ভাৰতলৈ আহি আছে । আনহাতে, বিমানখনত আৰোহণ কৰা সকলো লোকক ইতিমধ্যে ভাৰত চৰকাৰে পৰীক্ষা কৰিছে । উল্লেখ্য যে ট্ৰাম্পৰ এই গণ বিতাড়নৰ পৰিকল্পনাৰ দ্বাৰা আমেৰিকাত বাস কৰা বৃহৎসংখ্যক ভাৰতীয় লোক প্ৰভাৱিত হ'ব ।
