জেৰুছালেম, 7 অক্টোবৰ:আশংকা আৰু উদ্বেগৰ সমান্তৰালকৈ হামাছৰ যুদ্ধংদেহী মনোভাৱ আৰু ইজৰাইল তৰফৰ পৰা উগ্ৰপন্থী গোটটোৰ আঘাতক প্ৰতিৰোধ কৰাৰ প্ৰতিশ্ৰুতিয়ে ৭ অক্টোবৰৰ আক্ৰমণৰ বৰ্ষপূৰ্তিৰ পৰিস্থিতিক উত্তেজনাময় কৰি তুলিছে।
হামাছৰ ৭ অক্টোবৰৰ আক্ৰমণৰ বৰ্ষপূৰ্তিৰ সময়ত ইজৰাইল সষ্টম হৈ থকাৰ সময়তে ইৰাণৰ সৰ্বোচ্চ নেতা আয়াতুল্লাহ খোমেনিয়ে দেওবাৰে সতৰ্ক কৰি দিছে যে প্ৰয়োজন হ'লে ইৰাণে পুনৰ ইজৰাইলৰ বিৰুদ্ধে আক্ৰমণ চলাব। লক্ষণীয়ভাৱে ইজৰাইলী সামৰিক বাহিনীয়ে দেওবাৰে গাজাৰ সীমান্তৱৰ্তী দক্ষিণৰ সম্প্ৰদায় আৰু অঞ্চলসমূহৰ সুৰক্ষাৰ বাবে অধিক সৈন্য মোতায়েন কৰিছে।
"আইডিএফৰ (সেনা) গাজা শাখাক কেইবাটাও প্লাটুনৰ দ্বাৰা শক্তিশালী কৰা হৈছে, যিসমূহক সাধাৰণ জনতা আৰু সীমান্ত অঞ্চল, দুয়োৰে সুৰক্ষাৰ বাবে সষ্টম কৰি ৰখা হৈছে। স্থানীয় নিৰাপত্তা বাহিনীৰ সৈতে সমন্বয় ৰাখি অঞ্চলটোক সুৰক্ষা দিবলৈ সৈন্যসকল সম্পূৰ্ণৰূপে সুসজ্জিত," ইজৰাইলী সামৰিক বাহিনীয়ে এক বিবৃতিত এইদৰে কয়।
আনহাতে, পেলেষ্টাইনী সশস্ত্ৰ গোট হামাছে দেওবাৰে, দক্ষিণ ইজৰাইলত চলা মাৰাত্মক ধ্বংসলীলাৰ প্ৰথম বাৰ্ষিকীৰ পূৰ্বে জাৰী কৰা এটা ভিডিঅ' বাৰ্তাত, ইজৰাইলৰ ওপৰত বিগত বৰ্ষৰ ৭ অক্টোবৰৰ আক্ৰমণক লৈ গৌৰৱ কৰে যিয়ে গাজাত যুদ্ধৰ সূত্ৰপাত কৰিছিল।
কাটাৰস্থিত হামাছ সদস্য খলিল আল-হায়াই এক ভিডিঅ' বিবৃতিত কয়, "অক্টোবৰৰ ৭ তাৰিখৰ গৌৰৱময় ঘটনাই শত্ৰুৱে নিজৰ বাবে সৃষ্টি কৰা সেইবোৰ ভ্ৰম ভাঙি পেলাইছিল, যিবোৰৰ ওপৰত ভিত্তি কৰি দেশখনে বিশ্ব আৰু অঞ্চলটোক ইয়াৰ শ্ৰেষ্ঠতা আৰু সামৰ্থ্যৰ বিষয়ে বিশ্বাস কৰোৱাই আহিছিল।"
স্মৰ্তব্য যে যোৱা বছৰ ৭ অক্টোবৰত হোৱা আক্ৰমণৰ ফলত ১০০০ তকৈও অধিক লোকৰ মৃত্যু হৈছিল, যাৰ বেছিভাগ আছিল সাধাৰণ লোক। হামাছ পৰিচালিত গাজাৰ স্বাস্থ্য মন্ত্ৰালয়ে প্ৰদান কৰা তথ্য অনুসৰি যুদ্ধ আৰম্ভ হোৱাৰ পিছৰে পৰা গাজা ষ্ট্ৰিপত ইজৰাইলৰ সামৰিক অভিযানত অতি কমেও ৪১,৮৭০ জন পেলেষ্টাইনী নাগৰিক নিহত হৈছে, যাৰ ভিতৰত বেছিভাগ সাধাৰণ লোক। ৰাষ্ট্ৰসংঘইয়ো এই পৰিসংখ্যাবোৰ নিৰ্ভৰযোগ্য বুলি স্বীকাৰ কৰিছে।
৭ অক্টোবৰৰ আক্ৰমণৰ এবছৰ পিছত, হামাছ নেতা আল-হায়াই সদৰী কৰিছে, "সমগ্ৰ পেলেষ্টাইন, বিশেষকৈ গাজা আৰু আমাৰ পেলেষ্টাইনী লোকসকলে তেওঁলোকৰ প্ৰতিৰোধ, তেজ আৰু স্থিৰতাৰে এক নতুন ইতিহাস লিখি আছে"।
আনহাতে ইজৰাইলে ৭ অক্টোবৰৰ আক্ৰমণ বাৰ্ষিকী উদযাপন কৰিছে জব্দ কৰা হামাছ শস্ত্ৰৰ প্ৰদৰ্শনীৰ জৰিয়তে ৷
তাৰ মাজতে ইজৰাইলৰ প্ৰধানমন্ত্ৰী বেঞ্জামিন নেতান্য়াহুৱে দেওবাৰে বিজয় অৰ্জনৰ প্ৰতিশ্ৰুতি দি কয় যে হামাছৰ ৭ অক্টোবৰৰ আক্ৰমণৰ পিছত, তেওঁৰ দেশৰ সামৰিক বাহিনীয়ে "বাস্তৱতাক সম্পূৰ্ণৰূপে পৰিৱৰ্তন" কৰিছে, যিয়ে দেশখনক দুখন যুদ্ধলৈ ঠেলি দিছিল। নেতান্য়াহুৱে সৈন্যসকলক আশ্বস্ত কৰি কয় যে ইজৰাইল "বিজয়ী হ’ব" কিয়নো গাজা সংঘৰ্ষৰ সুত্ৰপাত ঘটোৱা হামাছ উগ্ৰপন্থীৰ অভূতপূৰ্ব আক্ৰমণৰ প্ৰায় এবছৰ পিছতো ই গাজা ষ্ট্ৰিপ আৰু লেবানন দুয়োটা স্থানত উগ্ৰপন্থীৰ সৈতে যুঁজ দি আছে আৰু ইৰাণত আক্ৰমণ কৰিবলৈও প্ৰস্তুত ।
ইজৰাইলৰ সেনা প্ৰধান লেফটেনেণ্ট জেনেৰেল হাৰ্জি হালেভিয়ে লগতে কয় যে, এবছৰ ধৰি, "আমি হামাছৰ সামৰিক শাখাক পৰাজিত কৰিছো"।
যোৱা অক্টোবৰত যুঁজ আৰম্ভ হোৱাৰ লগে লগে নেতান্য়াহুৱে উগ্ৰপন্থীসকলক “দমন আৰু ধ্বংস” কৰা বুলি দাবী কৰিলেও ইজৰাইলী সৈন্যবাহিনীয়ে কিন্তু পূৰ্বে হামাছৰ বিৰুদ্ধে অভিযান চলোৱা গাজাৰ কেইবাটাও অঞ্চললৈ উভতি আহি, উগ্ৰপন্থীসকলক পুনৰ একত্ৰিত হোৱা দেখিবলৈ পাইছে।
ছেপ্টেম্বৰৰ শেষৰ ফালে ইজৰাইলে দেশৰ উত্তৰৰ দিশে মনোনিবেশ কৰে আৰু ইৰাণ সমৰ্থিত হিজবুল্লাহৰ বিৰুদ্ধে সামৰিক পদক্ষেপ তীব্ৰতৰ কৰে, যিয়ে নিয়মীয়াকৈ হামাছৰ সমৰ্থনত লেবানন সীমান্তৰ ওপৰেৰে ইজৰাইলৰ ভূমিত ৰকেট নিক্ষেপ কৰি আহিছে।
তেওঁৰ কাৰ্যালয়ৰ মতে নেতান্য়াহুৱে লেবানন সীমান্ত ভ্ৰমণৰ সময়ত কয়, "এবছৰ আগতে আমি এক ভয়ংকৰ আঘাত পাইছিলো। যোৱা ১২ মাহত আমি বাস্তৱতাক সম্পূৰ্ণৰূপে পৰিৱৰ্তন কৰিছো ৷ "
হামাছৰ নিজ আক্ৰমণক “গৌৰৱময়” আখ্যা
দেওবাৰে হামাছে ৭ অক্টোবৰৰ আক্ৰমণক "গৌৰৱময়" বুলি অভিহিত কৰে আৰু কয় যে পেলেষ্টাইনীসকলে "তেওঁলোকৰ প্ৰতিৰোধৰ দ্বাৰা এক নতুন ইতিহাস লিখি আছে"।
ইজৰাইলৰ চৰকাৰী পৰিসংখ্যাৰ ওপৰত আধাৰিত এএফপিৰ এক তালিকা অনুসৰি তেওঁলোকৰ আক্ৰমণৰ ফলত ১,২০৫ জন লোকৰ মৃত্যু হৈছে, বেছিভাগ সাধাৰণ লোক, য'ত বন্দী অৱস্থাত নিহত সকলো অন্তৰ্ভুক্ত । আন কেইবাশতাধিক এতিয়াও বন্দী হৈ আছে।
দেওবাৰে তেল আভিভত মমবাতি, প্ৰাৰ্থনা আৰু সংগীতেৰে নেগেভ মৰুভূমিৰ নোভা ৰেভ নামৰ এটা অঞ্চলৰ কেৱল এটা স্থানত নিহত হোৱা ৩৭০ জন লোকক স্মৰণ কৰা হয়।
উত্তৰ গাজাত, সামৰিক বাহিনীয়ে কৈছিল যে এবছৰৰ বিমান আক্ৰমণ আৰু যুঁজৰ পিছতো হামাছে তাত পুনৰ নিৰ্মাণ কৰি থকাৰ ইঙ্গিত পোৱাৰ পিছত তেওঁলোকে জাবালিয়া অঞ্চলটো ঘেৰি ধৰিছিল।
ইজৰাইলৰ হত্যা লীলা