গুৱাহাটী : কংগ্ৰেছৰ তীব্ৰ বিৰোধিতাৰ মাজতে বিজেপি নেতৃত্বাধীন অসম চৰকাৰে প্ৰস্তাৱিত এডভাণ্টেজ অসম ২.০ ৰ বাবে প্ৰস্তুতি তীব্ৰতৰ কৰি তুলিছে । ইয়াৰ অংশ হিচাপে সোমবাৰে মুম্বাইত এক ৰোড শ্ব' অনুষ্ঠিত কৰে ৷ উল্লেখ্য যে মুখ্যমন্ত্ৰী ডঃ হিমন্ত বিশ্ব শৰ্মাই বিগত তিনিদিন ধৰি মুম্বাইত টাটা গ্ৰুপৰ অধ্যক্ষ নোৱেল টাটা, আদানি গ্ৰুপৰ সঞ্চালক জিত আদানি আৰু মহিন্দ্ৰা গ্ৰুপৰ অধ্যক্ষ আনন্দ গোপাল মহিন্দ্ৰা আদিকে ধৰি শীৰ্ষ উদ্যোগপতিসকলক সাক্ষাৎ কৰি আছে ৷
"আজি মুম্বাইত অনুষ্ঠিত এডভাণ্টেজ অসম ২ ৰোড শ্ব'ত মই অসমক ঔদ্যোগিক ৰাজ্য হিচাপে পৰিণত কৰা আৰু ২৫,০০০ কোটি টকাৰ পি এল আই আঁচনি আৰু তেওঁলোকৰ বাবে অনুকূল ইনচেণ্টিভৰ সৈতে আমাৰ চৰকাৰৰ দৃষ্টিভংগী নিৰ্ধাৰণ কৰি উদ্যোগসমূহৰ বাবে ৰেড কাৰ্পেট পাৰি দিছোঁ । ২৫ আৰু ২৬ ফেব্ৰুৱাৰীত গুৱাহাটীত আমাৰ সৈতে যোগদান কৰক ।" সোমবাৰে সন্ধিয়া মুখ্যমন্ত্ৰীয়ে নিজৰ এক্স হেণ্ডেলত কয় ।
At the #AdvantageAssam2 Roadshow in Mumbai today, I laid down our Govt's vision of turning Assam as an industrialised State and laying the red carpet for industries with a ₹25,000cr PLI scheme and customised incentives on offer.
— Himanta Biswa Sarma (@himantabiswa) January 6, 2025
Join us on 25th and 26th February in Guwahati. pic.twitter.com/5THiqxLQWg
আনহাতে, ৰোড শ্ব'ত দৰ্শকসকলক সম্বোধন কৰি মুখ্যমন্ত্ৰী মহন্ত বিশ্ব শৰ্মাই অসমৰ দ্ৰুত পৰিৱৰ্তনক এক আগশাৰীৰ বিনিয়োগ গন্তব্যস্থানলৈ পৰিৱৰ্তনৰ ওপৰত গুৰুত্ব আৰোপ কৰি ব্যৱসায়-অনুকূল পৰিৱেশ গঢ়ি তোলাৰ বাবে চৰকাৰৰ প্ৰতিশ্ৰুতিৰ কথা উল্লেখ কৰে ।
তেওঁ উল্লেখ কৰে, "অসম কৌশলগতভাৱে সুবিধাজনক স্থানত অৱস্থিত আৰু গুৱাহাটীৰ পৰা ৩ ঘণ্টাৰ উৰণ সময়ৰ ভিতৰত, উদ্যোগসমূহে প্ৰায় ১৪ খন দেশৰ বিশ্বৰ জনসংখ্যাৰ ৩০ শতাংশ লোকক সংযোগ কৰিব পাৰে । সেয়েহে, অসমক বাণিজ্য আৰু সাংস্কৃতিক বিনিময়ৰ বাবে এক আদৰ্শ কেন্দ্ৰ হিচাপে গঢ়ি তুলিব পাৰি । ই হৈছে ভাৰতৰ আটাইতকৈ শান্তিপূৰ্ণ গন্তব্যস্থানসমূহৰ ভিতৰত এটা, যি এক বৰ্ধিত জি এছ ডি পিৰ সৈতে উচ্চ বিকাশৰ মাজেৰে আগবাঢ়ি গৈ আছে ।"
অৱশ্যে এই বিনিয়োগ সন্মিলনৰ দ্বিতীয় সংস্কৰণ অনুষ্ঠিত কৰাৰ অসম চৰকাৰৰ উচ্চাভিলাষী পৰিকল্পনাই বিৰোধী কংগ্ৰেছৰ পৰা সমালোচনাৰ সন্মুখীন হৈছে । কংগ্ৰেছে শেহতীয়াকৈ ২০১৮ চনত অসমত অনুষ্ঠিত এডভাণ্টেজ অসমৰ প্ৰথম সংস্কৰণৰ সফলতাৰ ওপৰত এখন শ্বেতপত্ৰও দাবী কৰিছে ।
"যদিও এডভাণ্টেজ অসম গোলকীয় বিনিয়োগকাৰী সন্মিলনৰ প্ৰথম সংস্কৰণৰ সময়ত প্ৰায় ১ লাখ কোটি মূল্যৰ বুজাবুজি চুক্তি স্বাক্ষৰিত হৈছিল, কিন্তু আঠটা উদ্যোগত মাত্ৰ ৬,৫৭৫.৮৪ কোটি টকাহে বাস্তৱায়িত হৈছে ।" বিৰোধী দলৰ দলপতি দেৱব্ৰত শইকীয়াই কয় ।
"আমি এই দ্বিতীয় সংস্কৰণ অনুষ্ঠিত কৰাৰ পূৰ্বে এডভাণ্টেজ অসম ১.০ ৰ ফলাফলৰ ওপৰত চৰকাৰৰ পৰা এখন শ্বেতপত্ৰ বিচাৰোঁ ।" তেওঁ কয় যে স্বাক্ষৰিত বুজাবুজি চুক্তিৰ পৰা কিমান শতাংশ বিনিয়োগ লাভ কৰা হৈছে সেয়া চৰকাৰে ৰাজ্যবাসীক নিশ্চিতভাৱে জনাব লাগিব ।
"এডভাণ্টেজ অসম ১.০ ৰ পূৰ্বে অসম কেবিনেটৰ মন্ত্ৰীসকলে গ্ৰহণ কৰা বিদেশ ভ্ৰমণৰ কথা সকলোৰে মনত আছে । চৰকাৰে জনসাধাৰণক জনাব লাগিব যে এই সন্মিলন আৰু মন্ত্ৰী আৰু বিধায়কসকলে বিদেশ ভ্ৰমণত কিমান খৰচ কৰা হৈছিল ?" দেৱব্ৰত শইকীয়াই লগতে কয় ।
উল্লেখ্য যে এডভাণ্টেজ অসমৰ দ্বিতীয় সংস্কৰণ অহা ২৪ আৰু ২৫ ফেব্ৰুৱাৰীত অনুষ্ঠিত কৰিবলৈ তাৰিখ নিৰ্ধাৰণ কৰা হৈছে ।
অসমত বিজেপি নেতৃত্বাধীন চৰকাৰে এডভাণ্টেজ অসম 2.0 ৰ দ্বিতীয় সংস্কৰণক চৰকাৰৰ দ্বাৰা সৰ্ববৃহৎ বিনিয়োগ প্ৰচাৰ আৰু সুবিধা প্ৰচেষ্টা হিচাপে প্ৰচাৰ কৰি আছে । লগতে ৰাজ্যখনৰ ভূ-কৌশলগত সুবিধা আৰু বিনিয়োগৰ এক মুখ্য গন্তব্যস্থান হিচাপেও ইয়াৰ সম্ভাৱনাৰ ওপৰত আলোকপাত কৰিছে । দক্ষিণ-পূব এছিয়াৰ কেইবাখনো ৰাষ্ট্ৰৰ ওচৰত ৰাজ্যখনৰ কৌশলগত অৱস্থান থকাৰ কথা উল্লেখ কৰি চৰকাৰে কৃষি, খাদ্য প্ৰক্ৰিয়াকৰণ, হস্তশিল্প, পৰ্যটন আৰু তথ্য-প্ৰযুক্তিৰ দৰে ক্ষেত্ৰত ৰাজ্যখনৰ সম্ভাৱনাক প্ৰচাৰ কৰি আছে ।
