ইণ্টাৰনেচনেল ডেস্ক, ২৪ ফেব্ৰুৱাৰী :ইৰাণৰ সামৰিক বাহিনীয়ে জইছ আল-আদল (ন্যায়ৰ সেনা) সন্ত্ৰাসবাদী গোটৰ জ্যেষ্ঠ কমাণ্ডাৰ ইছমাইল শ্বাহবাখশ আৰু তেওঁৰ কিছু সঙ্গীক পাকিস্তানত হত্যা কৰে । ইৰাণৰ চৰকাৰী সংবাদ মাধ্যমৰ উদ্ধৃতি দি ইৰাণ ইণ্টাৰনেচনেল ইংৰাজ কাকতে প্ৰকাশ কৰিছে ।
উল্লেখ্য যে ইৰাণ আৰু পাকিস্তানে দুয়োখন দেশৰ ওপৰত চলোৱা বিমান আক্ৰমণৰ এমাহ পিছত ইৰাণিয়ান বাহিনীয়ে এক সশস্ত্ৰ সংঘৰ্ষত এটা সন্ত্ৰাসবাদী গোটৰ ওপৰত আক্ৰমণ চলায় ।
আল আৰাবিয়া নিউজৰ বাতৰি অনুসৰি, ২০১২ চনত গঠন হোৱা আৰু ইৰাণে 'সন্ত্ৰাসবাদী' সংগঠন হিচাপে মনোনীত কৰা জইছ আল-আদল হৈছে ইৰাণৰ দক্ষিণ-পূব প্ৰদেশ চিস্তান-বেলুচিস্তানত সক্ৰিয় এটা চুন্নী সন্ত্ৰাসবাদী গোট ।
বিগত বছৰবোৰত জইছ আল-আদলে ইৰাণৰ নিৰাপত্তা বাহিনীৰ ওপৰত যথেষ্ট আক্ৰমণ চলাই আহিছে । আল আৰাবিয়া নিউজৰ বাতৰি অনুসৰি, ডিচেম্বৰত জইছ আল-আদলে চিস্তান-বেলুচিস্তানৰ এখন আৰক্ষী থানাত হোৱা আক্ৰমণৰ দায়িত্ব স্বীকাৰ কৰে । এই ঘটনাত কমেও ১১ গৰাকী আৰক্ষীয়ে প্ৰাণ হেৰুৱাইছিল ।