নিউজ ডেস্ক, 10 জুলাই: মঙলবাৰে হোৱাইট হাউছে কয় যে ৰাছিয়াৰ সৈতে ভাৰতৰ সম্পৰ্কই ইউক্ৰেইনৰ সংঘাতৰ অন্ত পেলাবলৈ ৰাছিয়াৰ ৰাষ্ট্ৰপতি ভ্লাদিমিৰ পুটিনক আহ্বান জনোৱাৰ ক্ষমতা প্ৰদান কৰিছে । ইউক্ৰেইনৰ সংঘাতৰ সমাধান যুদ্ধক্ষেত্ৰত নহয়, আলোচনাতহে নিহিত হৈ আছে বুলি প্ৰধানমন্ত্ৰী মোদীয়ে ৰাষ্ট্ৰপতি পুটিনক জোৰ দিয়াৰ পিচত এই বিবৃতি প্ৰকাশ কৰিছে হোৱাইট হাউছে ।
প্ৰেছ ব্ৰিফিঙত ভাষণ দি হোৱাইট হাউছৰ প্ৰেছ সচিব কেৰিন জিন পিয়েৰে ভাৰতক আমেৰিকাৰ “কৌশলগত অংশীদাৰ” বুলি অভিহিত কৰে, যাৰ সৈতে আমেৰিকাই ভাৰত আৰু ৰাছিয়াৰ চুক্তিকে ধৰি “সম্পূৰ্ণ আৰু অকপট আলোচনা” কৰে । ইউক্ৰেইনৰ কথা আহিলে ভাৰতকে ধৰি সকলো ৰাষ্ট্ৰই স্থায়ী শান্তি বাস্তৱায়িত কৰাৰ প্ৰচেষ্টাক সমৰ্থন কৰাটো অতি গুৰুত্বপূৰ্ণ বুলিও তেওঁ কয় ।
পুটিনৰ সৈতে প্ৰধানমন্ত্ৰী মোদীৰ সাক্ষাৎকাৰ সন্দৰ্ভত সোধাত জিন-পিয়েৰে কয়, "ভাৰত এনে এক কৌশলগত অংশীদাৰ যাৰ সৈতে আমি ৰাছিয়াৰ আৰু তেওঁলোকৰ সম্পৰ্ককে ধৰি সম্পূৰ্ণ আৰু অকপট আলোচনাত লিপ্ত হওঁ ৷ আমি এই বিষয়ে আগতেও কথা পাতিছো । গতিকে আমি ভাবো যে এই সকলোবোৰ অতি জটিল । ভাৰতকে ধৰি দেশসমূহে ইউক্ৰেইনৰ ক্ষেত্ৰত স্থায়ী আৰু ন্যায্য শান্তি উপলব্ধি কৰাৰ প্ৰচেষ্টাক সমৰ্থন কৰে ।"
লগতে পঢ়ক:মোদীৰ ৰাছিয়া ভ্ৰমণে চিন্তাত পেলাইছে আমেৰিকাক ! - america on India Russia Ties
"আমি এইটোও বিশ্বাস কৰোঁ যে ৰাছিয়াৰ সৈতে ভাৰতৰ দীৰ্ঘদিনীয়া সম্পৰ্কই ৰাষ্ট্ৰপতি পুটিনক ইউক্ৰেইনৰ বিৰুদ্ধে তেওঁৰ নিৰ্মম আৰু এক অপ্ৰৰোচিত যুদ্ধৰ অন্ত পেলাবলৈ আহ্বান জনোৱাৰ ক্ষমতা প্ৰদান কৰিছে । ই ৰাষ্ট্ৰপতি পুটিনৰ বাবে শেষৰ খন যুদ্ধ । ৰাষ্ট্ৰপতি পুটিনে যুদ্ধ আৰম্ভ কৰিছিল, আৰু তেওঁ শেষ কৰিব পাৰে ।" ৰাছিয়াৰ ৰাষ্ট্ৰপতি পুটিনৰ সৈতে হোৱা দ্বিপাক্ষিক আলোচনাৰ সময়ত প্ৰধানমন্ত্ৰী নৰেন্দ্ৰ মোদীয়ে সংঘাতৰ সময়ত শিশু হত্যাৰ বিষয়টো উত্থাপন কৰি নিৰীহ শিশুৰ মৃত্যু হোৱাটো “হৃদয় বিদাৰক” বুলি কোৱাৰ পিচতে জিন পিয়েৰে এই মন্তব্য কৰে । প্ৰধানমন্ত্ৰীয়ে কয় যে কোনোৱে প্ৰাণ হেৰুৱালে মানৱতাক বিশ্বাস কৰা প্ৰতিজন ব্যক্তিয়ে আঘাত পায় ।
শেহতীয়াকৈ কিয়েভৰ এখন শিশু চিকিৎসালয়ত ক্ষেপণাস্ত্ৰ আক্ৰমণৰ ফলত ৩৭ টা শিশুৰ মৃত্যু হোৱাৰ পিচতে এই কথা প্ৰকাশ পাইছে ।
"যুদ্ধই হওক, সংঘাতেই হওক বা সন্ত্ৰাসবাদী আক্ৰমণেই হওক; মানুহে প্ৰাণ হেৰুৱালে মানৱতাক বিশ্বাস কৰা প্ৰতিজন ব্যক্তিয়ে যন্ত্ৰণা পায় । কিন্তু যেতিয়া নিৰীহ শিশুক হত্যা কৰা হয়, যেতিয়া আমি নিৰীহ শিশুৰ মৃত্যু হোৱা দেখিবলৈ পাওঁ, তেতিয়া ই হৃদয় বিদাৰক হয় । সেই যন্ত্ৰণা অপৰিসীম । মই এই সন্দৰ্ভত আপোনালোকৰ সৈতেও বিশদ আলোচনা কৰিছিলোঁ ।’’ বৈঠকৰ সময়ত এইদৰে কয় প্ৰধানমন্ত্ৰী মোদীয়ে ।
প্ৰধানমন্ত্ৰী নৰেন্দ্ৰ মোদীয়ে যুদ্ধক্ষেত্ৰত কোনো সমাধান নাই বুলি উল্লেখ কৰি লগতে কয় যে বোমা, বন্দুক আৰু গুলীৰ মাজত শান্তি আলোচনা সফল নহয় ।