নিউজ ডেস্ক, 14 জুলাই: পেনচিলভেনিয়াত নিৰ্বাচনী সমাৱেশৰ সময়ত আমেৰিকাৰ প্ৰাক্তন ৰাষ্ট্ৰপতি ড’নাল্ড ট্ৰাম্পৰ ওপৰত গুলীচালনা ৷ এই গুলীচালনাৰ ঘটনাত আঘাতপ্ৰাপ্ত হয় আমেৰিকাৰ প্ৰাক্তন ৰাষ্ট্ৰপতি তথা ৰিপাব্লিকান দলৰ ৰাষ্ট্ৰপতি পদৰ প্ৰাৰ্থী ড’নাল্ড ট্ৰাম্প । প্ৰশাসনিক বিষয়াই জনোৱা মতে, নিৰ্বাচনী প্ৰচাৰৰ স্থানত গুলীচালনা কৰা সন্দেহযুক্ত লোকজনক আমেৰিকাৰ ছিক্ৰেট চাৰ্ভিচে গুলীয়াই হত্যা কৰে ।
পেনচিলভেনিয়াত নিৰ্বাচনী সমাৱেশৰ সময়ত ট্ৰাম্পৰ ওপৰত আক্ৰমণৰ বাতৰি প্ৰকাশ পোৱাৰ মাজতে তেওঁৰ মুখপাত্ৰই এক বিবৃতিত কয় যে ট্ৰাম্প ভালেই আছে আৰু স্থানীয় চিকিৎসালয় ষ্টিভেন চেউঙত তেওঁক ভৰ্তি কৰা হৈছে । সোঁহাতখন ডিঙিৰ ফালে আগবঢ়াই দিওঁতে ট্ৰাম্পৰ মুখ আৰু কাণত তেজ দেখা গ’ল । একাধিক সংবাদ মাধ্যমৰ বাতৰি অনুসৰি ট্ৰাম্পে ৰেলীত ভাষণ দি থকাৰ সময়ত কেইবাটাও বন্দুকৰ গুলীৰ শব্দ শুনা গৈছিল ।
লগে লগে প্ৰাক্তন ৰাষ্ট্ৰপতিগৰাকীক এস্কৰ্ট কৰি বাহিৰলৈ উলিয়াই আনি নিৰাপদ স্থানলৈ লৈ যোৱা ছিক্ৰেট চাৰ্ভিচে কয় যে তেওঁ নিৰাপদ । ছিক্ৰেট চাৰ্ভিচে তেওঁক এস্কৰ্ট কৰি উলিয়াই অনাৰ সময়তে ট্ৰাম্পে শূন্যলৈ হাতৰ মুঠিটো উঠোৱা দেখা গৈছিল, উপস্থিত লোকসকলৰ মাজতো হাহাকাৰ লাগিছিল । ১৩ জুলাইৰ সন্ধিয়া পেনচিলভেনিয়াত ট্ৰাম্পৰ এক সমাৱেশত সংঘটিত হয় এক ঘটনা । গোপন সেৱাই সুৰক্ষামূলক ব্যৱস্থা ৰূপায়ণ কৰিছে আৰু প্ৰাক্তন ৰাষ্ট্ৰপতিগৰাকী নিৰাপদ বুলি জনাইছে । এতিয়া ঘটনা সন্দৰ্ভত সক্ৰিয় ছিক্ৰেট চাৰ্ভিচৰ তদন্ত আৰু অধিক তথ্য উপলব্ধ হ’লে প্ৰকাশ কৰা হ’ব বুলি ছিক্ৰেট চাৰ্ভিচৰ মুখপাত্ৰ এণ্টনি গুগ্লিয়েলমিয়ে জনায় ।
প্ৰশাসনীয় সংস্থাৰ এক সূত্ৰই ফক্স নিউজক জনোৱা মতে, গুলীচালনা কৰা লোকজনৰ মৃত্যু হৈছে আৰু অতিৰিক্ত দুজন লোকক পিটচবাৰ্গ চিকিৎসালয়লৈ লৈ যোৱা হৈছে । ৰাষ্ট্ৰপতি জ’ বাইডেন আৰু উপ-ৰাষ্ট্ৰপতি কমলা হেৰিছ দুয়োকে এই কাণ্ডৰ বিষয়ে অৱগত কৰা হৈছে, দুয়োৱে এই ঘটনাক তীব্ৰ গৰিহণা দিছে ।
ৰিপাব্লিকান দলৰ প্ৰতিদ্বন্দ্বী তথা পূৰ্বৰ ৰাষ্ট্ৰপতি ড’নাল্ড ট্ৰাম্পৰ ওপৰত হোৱা ঘাতক আক্ৰমণক গৰিহণা দি বাইডেনে কয় যে আমেৰিকাত এই ধৰণৰ হিংসাৰ কোনো স্থান নাই । ‘‘জিল আৰু মই তেওঁক নিৰাপদ স্থানলৈ লৈ যোৱাৰ বাবে ছিক্ৰেট চাৰ্ভিচৰ ওচৰত কৃতজ্ঞ । আমেৰিকাত এই ধৰণৰ হিংসাৰ ঠাই নাই । ইয়াক গৰিহণা দিবলৈ আমি একদেশ হিচাপে একত্ৰিত হ’ব লাগিব’’ বুলিও তেওঁ কয় ।