আন্তঃৰাষ্ট্ৰীয় ডেস্ক, ২১ জানুৱাৰী : দেওবাৰে পুৱা আফগানিস্তানৰ বাদাখশান প্ৰদেশৰ কুৰাণ-মুঞ্জন আৰু জিবাক জিলাৰ কাষৰ টোপখানা পৰ্বতমালাত মৰক্কোত পঞ্জীভুক্ত এখন ডিএফ-১০ বিমান দুৰ্ঘটনাগ্ৰস্ত হয়। আফগানিস্তানস্থিত এটা ব্যক্তিগত প’ৰ্টেলে দাবী কৰিছিল যে দুৰ্ঘটনাত পতিত হোৱা বিমানখন ভাৰতীয় যাত্ৰীবাহী বিমান আছিল ৷
ইয়াৰ পিচতে দেশৰ বিমান সেৱাৰ শীৰ্ষ নিয়ন্ত্ৰক অসামৰিক বিমান পৰিবহন সঞ্চালকালয়ৰ (ডিজিচিএ) এজন বিষয়াই নিশ্চিত কৰে যে দুৰ্ঘটনাত পতিত হোৱা বিমানখন ভাৰতীয় বিমান নহয় ৷ ডিজিচিএৰ বিষয়াজনে কয়, "বাদাখশান প্ৰদেশৰ কুৰাণ-মুঞ্জন আৰু জিবাক জিলাৰ সমীপৰ টপখানা পৰ্বতমালাত দুৰ্ঘটনাগ্ৰস্ত হোৱা বিমানখন মৰক্কোৰ পঞ্জীভুক্ত ডিএফ-১০ বিমান আছিল । দুৰ্ঘটনাটোত জড়িত বিমানখনৰ সন্দৰ্ভত আমি এয়াৰ ট্ৰেফিক কণ্ট্ৰ’ল আৰু অন্যান্য বিমান সংস্থাৰ পৰা নিশ্চিত তথ্য লাভ কৰিছো । এই বিমানখন মৰক্কোৰ পঞ্জীভুক্ত ডিএফ-১০ বিমান হিচাপে চিনাক্ত কৰা হৈছে ৷"
স্থানীয় বাসিন্দাসকলৰ উদ্ধৃতি দি আফগান প’ৰ্টেলে জনাই যে, দেওবাৰে পুৱতি নিশা বিমানখন দুৰ্ঘটনাগ্ৰস্ত হয় । প্ৰাৰম্ভিক তথ্য অনুসৰি, কিৰণ আৰু মিঞ্জন জিলা আৰু বাদাখশানৰ জেবাক জিলাকে পাহাৰীয়া অঞ্চলত এখন যাত্ৰীবাহী জেট বিমান দুৰ্ঘটনাগ্ৰস্ত হৈছে । প্ৰদেশৰ নিৰাপত্তা বিষয়াসকলে কোৱা অনুসৰি বিমানখনত থকা যাত্ৰীৰ সংখ্যা এতিয়াও নিৰ্ধাৰণ কৰা হোৱা নাই।