আৰ্টিকেল ৩৭০ ক অপপ্ৰচাৰমূলক ছবি বুলি কোৱা সমালোচকক উভতি ধৰিলে য়ামীয়ে

Article 370: আদিত্য ধৰৰ পৰিচালিত য়ামী গৌতম অভিনীত ‘আৰ্টিকেল ৩৭০’ ছবিখনৰ ট্ৰেইলাৰ মুক্তি পোৱাৰ পিচতে বাতৰিৰ শিৰোনাম দখল কৰি আহিছে । ট্ৰেইলাৰটো বহুতে ভাল পাইছে যদিও একাংশই ইয়াক অপপ্ৰচাৰমূলক ছবি বুলিও অভিহিত কৰিছে । এতিয়া ছবিখনক সমালোচনা কৰা সকলক উপযুক্ত উত্তৰ দিছে য়ামী গৌতমে ।

চিটাৰ ডেস্ক, ১৬ ফেব্ৰুৱাৰী: বলীউডৰ অভিনেত্ৰী য়ামী গৌতমৰ আগন্তুক ছবি ‘আৰ্টিকেল ৩৭০’এ এইকেইদিন বাতৰিৰ শিৰোনাম দখল কৰিছে । শেহতীয়াকৈ এই ছবিখনৰ ট্ৰেইলাৰ মুকলি কৰা হৈছে ৷ অৱশ্যে ছবিখনৰ ট্ৰেইলাৰ বহু লোকে ভাল পাইছে যদিও আন একাংশই ছবিখনত অপপ্ৰচাৰমূলক ছবি বুলি অভিহিত কৰিছে । এতিয়া য়ামীয়ে এই সন্দৰ্ভত ছবিখনক লৈ সমালোচনা কৰা লোকসকলক উভতি ধৰিছে ।

য়ামী গৌতমৰ স্বামী আদিত্য ধৰৰ নিৰ্দেশনাত নিৰ্মিত ‘আৰ্টিকেল ৩৭০’ ত দেখুওৱা হ’ব যে ৩৭০ অনুচ্ছেদ আঁতৰোৱাৰ পূৰ্বে কাশ্মীৰত কেনেধৰণৰ কাম-কাজ চলিছিল । ইয়াৰ পিচত তাত কেনেধৰণৰ পৰিৱেশ দেখা গৈছিল সেই সকলোবোৰ দেখুওৱা হ’ব ৷

সমালোচকসকলক কি ক’লে য়ামীয়ে ?

উল্লেখ্য যে, য়ামী গৌতমৰ এই ছবিখন লোকসভা নিৰ্বাচনৰ পূৰ্বে মুক্তি পাবলৈ গৈ আছে । এতিয়া অলপতে পিটিআইক দিয়া এক সাক্ষাৎকাৰত য়ামী গৌতমে কয় যে তেওঁৰ ‘আৰ্টিকেল ৩৭০’ ছবিখনৰ উদ্দেশ্যক ৰাইজৰ সন্মুখত ন্যায্যতা প্ৰদান কৰি লাভ নাই, য’ত ইতিমধ্যে মনত এটা ধাৰণা আছে যে ই এখন অপপ্ৰচাৰমূলক ছবি ।

য়ামীয়ে কয়, ‘‘যদি ইয়াক অপপ্ৰচাৰ আৰু অন্ধ জাতীয়তাবাদ বুলি অভিহিত কৰা হয়, তেন্তে যিসকলে এই ধাৰণা লৈ ছবিগৃহলৈ ছবি চাবলৈ যাব, তেওঁলোকে এই ছবিখন উপভোগ কৰিব নোৱাৰিব বা অনুভৱ কৰিব নোৱাৰিব ৷ তেওঁলোকৰ বাবে ছবিখনক ন্যায্যতা প্ৰদান কৰি লাভ নাই । এই ছবিখন দৰ্শকৰ বাবে নিৰ্মাণ কৰা হৈছে আৰু আমি কেৱল দৰ্শকৰ বাবেই ছবি নিৰ্মাণ কৰোঁ ।’’

ইয়াৰ উপৰিও অভিনেত্ৰীগৰাকীয়ে কয়,‘‘মই অনুভৱ কৰিছো যে ইয়াক চিনেমাত সজীৱ কৰি তুলিব লাগে । মই এগৰাকী ব্যক্তি যিয়ে মোৰ প্ৰথম প্ৰবৃত্তিৰ ওপৰত ভিত্তি কৰি বহুত কাম কৰো । যদি মই কাহিনী বা চিত্ৰনাট্যৰ সৈতে সংযোগ স্থাপন নকৰো তেন্তে মই চেষ্টা নকৰো আৰু নিজকে সেইটো কৰিবলৈ বাধ্য নকৰাও । যেতিয়াই চিত্ৰনাট্য পঢ়ি মোৰ ভাল লাগে তেতিয়া মই ভাৱো দৰ্শকে মোক কেতিয়াও নিৰাশ নকৰে ।’’

উল্লেখ্য যে, এই ছবিখন ২৩ ফেব্ৰুৱাৰীত চিনেমাগৃহত মুক্তি পাব ।

লগতে পঢ়ক:ভক্ষকত উৎকৃষ্ট অভিনয়ৰ বাবে মাতৃয়ে ভূমিক দিলে এক বিশেষ উপহাৰ