চিটাৰা ডেস্ক, 27 মে’ : শ্বাহৰুখ খান আৰু জুহি চাওলাৰ আই পি এল দল কলকাতা নাইট ৰাইডাৰ্ছে দেওবাৰে ফাইনেলত হায়দৰাবাদ ছানৰাইজাৰ্ছক ৮ উইকেটত পৰাস্ত কৰি বিজয়ী খিতাপ দখল কৰে । এই ঐতিহাসিক জয়ৰ পিচত শ্বাহৰুখৰ কন্যা সুহানা খান, শ্বানায়া কাপুৰ আৰু অনন্যা পাণ্ডেই ইনষ্টাগ্ৰামৰ জৰিয়তে এই জয়ৰ প্ৰতি থকা উত্তেজনা শ্বেয়াৰ কৰে । তদুপৰি বলীউডৰ ছুপাৰষ্টাৰ শ্বাহৰুখৰ পত্নী গৌৰী খান আৰু অন্যান্য চেলেব্ৰিটীসকলে নিজৰ ছ’চিয়েল মিডিয়াৰ হেণ্ডেলৰ জৰিয়তে দলটোক শুভেচ্ছা আৰু অভিনন্দন জনায় ।
কে কে আৰে আই পি এলত জয়লাভ কৰাৰ পিচত শ্বাহৰুখ খানে পত্নী গৌৰী খান, কন্যা সুহানা খান, পুত্ৰ আৰিয়ান আৰু আব্ৰামৰ সৈতে পাৰিবাৰিক ফটোৰ বাবে পোজ দিয়ে । নিজৰ দল বিজয়ী হোৱাৰ সুখত শ্বাহৰুখে পত্নী গৌৰীক আলিংগন কৰি কপালত চুমা যাচে লগতে সুহানা, আৰিয়ান আৰু আব্ৰামকো উষ্ম আলিংগন দিয়া পৰিলক্ষিত হয় ।
আনহাতে, কলকাতা নাইট ৰাইডাৰ্ছে ট্ৰফী হাতত তুলি লোৱাৰ লগে লগে সুহানা, শ্বানায়া কাপুৰ আৰু অনন্যা পাণ্ডেই নিজৰ আনন্দৰ ছবি শ্বেয়াৰ কৰে ৷
আৰ্চিছৰ অভিনেত্ৰীগৰাকীয়ে তেওঁৰ ইনষ্টাগ্ৰাম ষ্ট’ৰীত বিশাল পৰ্দাৰ এখন ফটো পোষ্ট কৰে য’ত লিখা আছিল “কে কে আৰ ৮ উইকেটত জয়ী”। এই ছবিখনৰ লগতে সুহানাই লিখিছে, "কোনোবাই মোক চিকুটি দিয়ক" ৷ দেউতাকৰ পুৰণি ফটো এখনো শ্বেয়াৰ কৰে সুহানাই ৷