'কা'ৰ বিৰুদ্ধে সমগ্ৰ দেশত আন্দোলনৰ পৰিকল্পনা উত্তৰ-পূব ছাত্ৰ সংগঠনৰ

North East Student Organisation : নৰ্থ ইষ্ট ষ্টুডেণ্ট অৰ্গেনাইজেচনৰ (এনইএছঅ') বিত্ত সচিব জন দেৱবাৰ্মাই কয় যে তেওঁলোকে নাগৰিকত্ব সংশোধনী আইনৰ (চিএএ) বিৰুদ্ধে তেওঁলোকৰ আন্দোলনত যোগদান কৰিবলৈ উত্তৰ-পূৰ্বাঞ্চলৰ বাহিৰেও আন ৰাজ্যৰ ছাত্ৰ সংগঠনসমূহৰ কাষ চাপিবলৈ পৰিকল্পনা কৰি আছে । নেছ'ৰ অধ্যক্ষ চেমুৱেল জিৰৱাই কয় যে তেওঁলোকে চিএএ কোনো কাৰণতে গ্ৰহণ নকৰে আৰু তেওঁলোকে আইনখন ৰূপায়ণৰ বিৰুদ্ধে তেওঁলোকৰ প্ৰতিবাদ অব্যাহত ৰাখিব ।

নিউজ ডেস্ক, ১৪ মাৰ্চ :নাগৰিকত্ব সংশোধনী আইন (চিএএ) চমুকৈ 'কা'ৰ বিৰুদ্ধে প্ৰতিবাদ অব্যাহত ৰাখিছে উত্তৰ-পূব ছাত্ৰ সংগঠনে । লগতে নৰ্থ ইষ্ট ষ্টুডেণ্টছ অৰ্গেনাইজেচন (এনইএছঅ') চমুকৈ নেছ'ৱে সমগ্ৰ ভাৰতত ছাত্ৰ সংগঠনসমূহক একত্ৰিত কৰি এই আন্দোলনক এক সমগ্ৰ ভাৰতজোৰা আন্দোলন হিচাপে গঢ়ি তোলাৰ সিদ্ধান্ত লৈছে ।

ইটিভি ভাৰতৰ আগত এই কথা প্ৰকাশ কৰি নেছ'ৰ বিত্ত সচিব জন দেৱবাৰ্মাই কয় যে তেওঁলোকৰ আন্দোলনত যোগদান কৰিবলৈ আন ৰাজ্যৰ ছাত্ৰ সংগঠনসমূহৰ কাষ চাপিবলৈ তেওঁলোকে পৰিকল্পনা কৰি আছে ।

"আমি শীঘ্ৰেই নেছ'ৰ এখন বৈঠক অনুষ্ঠিত কৰিম । তাত আমি আমাৰ ভৱিষ্যতৰ কাৰ্যপন্থা নিৰ্ধাৰণ কৰিম । এই আইনখন নিজেই অসাংবিধানিক, কিয়নো ধৰ্মৰ ভিত্তিত নাগৰিকত্ব দিয়াটো আমাৰ দেশৰ ধৰ্মনিৰপেক্ষ চৰিত্ৰৰ বিৰোধী ।" ত্ৰিপুৰা ষ্টুডেণ্ট ফেডাৰেচনৰ (টিএছএফ) উপ-সভাপতি দেৱবাৰ্মাই কয় । তেওঁ কয় যে উত্তৰ-পূবৰ ৰাজ্যসমূহৰ সকলো ছাত্ৰ সংগঠনে ইয়াৰ কাৰ্যকৰীকৰণৰ বিৰুদ্ধে প্ৰতিবাদ হিচাপে চিএএ-ৰ প্ৰতিলিপি দাহ কৰি আছে ।

"ত্ৰিপুৰাতো আমি 'কা'ৰ প্ৰতিলিপি জ্বলাই দিছোঁ ।" দেৱবাৰ্মাই লগতে কয় । তেওঁ কয় যে এই আইনে কেৱল জনগাঁথনিগত পৰিৱৰ্তনেই যে আনিব তেনে নহয়, কিন্তু ই দেশৰ প্ৰকৃত নাগৰিকসকলকো প্ৰভাৱিত কৰিব ।

একেই দৃষ্টিভংগীৰ প্ৰতিধ্বনি কৰি নেছ'ৰ অধ্যক্ষ চেমুৱেল জিৰৱাই কয় যে কেন্দ্ৰীয় চৰকাৰে বলপূৰ্বকভাৱে চিএএ জাপি দিব নোৱাৰে । নেছ' হৈছে উত্তৰ-পূবৰ বিভিন্ন ছাত্ৰ সংগঠনৰ এক সমাবেশ । "আমি 'কা' কোনো প্ৰকাৰে গ্ৰহণ নকৰোঁ । আমি আইনখন ৰূপায়ণৰ বিৰুদ্ধে আমাৰ প্ৰতিবাদ অব্যাহত ৰাখিম ।" জিৰৱাই কয় ।

তেওঁ কয় যে চিএএ-ৰ পৰিৱৰ্তে কেন্দ্ৰীয় চৰকাৰে খিলঞ্জীয়া জনজাতিৰ সুৰক্ষাৰ বাবে উত্তৰ-পূবৰ ৰাজ্যসমূহক ইনাৰ লাইন পাৰ্মিট প্ৰদান কৰিব লাগিছিল । "উত্তৰ-পূৰ্বাঞ্চলৰ ৰাজ্যসমূহে এককভাৱে বাস কৰিব নোৱাৰে । যদিও ষষ্ঠ অনুসূচীত আৰু ইনাৰ লাইন পাৰ্মিট (আইএলপি) এলেকাসমূহক আইনখনৰ আওতাৰ পৰা ৰেহাই দিয়া হৈছে, অসম আৰু উত্তৰ-পূবৰ অন্যান্য ৰাজ্যসমূহৰ কেইবাটাও অংশক আইনখনৰ পৰা ৰেহাই দিয়া হোৱা নাই ।" জিৰৱাই কয় ।

তেওঁ কয় যে আনকি ষষ্ঠ অনুসূচীও উত্তৰ-পূবৰ ৰাজ্যসমূহত অবৈধ প্ৰব্ৰজন বন্ধ কৰাৰ এক নিখুঁত পদ্ধতি নহয় । "চিএএ-ৰ বিৰুদ্ধে উচ্চতম ন্যায়ালয়ত ইতিমধ্যে এটা গোচৰ বিচাৰাধীন হৈ আছে । আমি এই সন্দৰ্ভত ন্যায়পালিকাৰ পৰা ন্যায় পাব বুলি আশা কৰিছোঁ ।" এই কথা উল্লেখ কৰি তেওঁ লগতে কয়, "আমি শীঘ্ৰেই চিএএ নিয়ম আৰু ইয়াৰ কাৰ্যকৰীকৰণক প্ৰত্যাহ্বান জনাই আন এখন নতুন আবেদন দাখিল কৰিম ।"

ইফালে কেন্দ্ৰীয় গৃহ মন্ত্ৰালয়ে চিএএ নিয়মৰ অধিসূচনা ঘোষণাৰ পিছত উদ্ভৱ হোৱা পৰিস্থিতিৰ ওপৰত তীক্ষ্ণ নিৰীক্ষণ কৰি আছে । "উত্তৰ-পূবৰ কেইখনমান ৰাজ্যৰ পৰা বিশেষকৈ অসম, মেঘালয় আৰু ত্ৰিপুৰাত আন্দোলনৰ কিছু খবৰ পোৱা গৈছে । আন ৰাজ্যতো কিছুমান ঠাই আছে য'ৰ পৰা একে ধৰণৰ প্ৰতিবেদন আহি আছে । "আমি ৰাজ্যিক ব্যৱস্থাক সেই অনুসৰি পৰিস্থিতি নিয়ন্ত্ৰণ কৰিবলৈ কৈছোঁ ।" গৃহ মন্ত্ৰালয়ৰ সূত্ৰই কয় ।

সূত্ৰত লগতে প্ৰকাশ যে গৃহ সচিব অজয় কুমাৰ ভাল্লাই বুধবাৰে কেইখনমান ৰাজ্যৰ পৰিস্থিতিৰ বিষয়ে প্ৰধানমন্ত্ৰী কাৰ্যালয়ক (পিএমঅ') অৱগত কৰে । ইফালে গৃহ মন্ত্ৰালয়ে শীঘ্ৰেই চিএএ-2019ৰ অধীনত ভাৰতীয় নাগৰিকত্বৰ আবেদনকাৰীসকলক সহায় কৰিবলৈ এটা হেল্পলাইন নম্বৰ আৰম্ভ কৰিছে ।

গৃহ মন্ত্ৰালয়ে কয় যে আবেদনকাৰীসকলে ভাৰতৰ যিকোনো স্থানৰ পৰা বিনামূলীয়া কল কৰিব পাৰে আৰু চিএএ-২০১৯ সম্পৰ্কীয় তথ্য লাভ কৰিব পাৰে । মন্ত্ৰালয়ে কয়, "পুৱা ৮ বজাৰ পৰা সন্ধিয়া ৮ বজালৈ হেল্পলাইন উপলব্ধ হ'ব ।"

উল্লেখ্য যে কেন্দ্ৰীয় চৰকাৰে চিএএ-ৰ নিয়ম সন্দৰ্ভত জাননী জাৰিৰ পিছৰে পৰা ছাত্ৰ সংগঠন আৰু বিৰোধী দলবোৰে এই আইনৰ বিৰুদ্ধে প্ৰতিবাদ কৰিবলৈ আৰম্ভ কৰে । চিএএ-য়ে 31 ডিচেম্বৰ, 2014 তাৰিখে বা তাৰ আগতে আফগানিস্তান, বাংলাদেশ আৰু পাকিস্তানৰ পৰা অহা নিৰ্যাতিত হিন্দু, পাৰ্চী, শিখ, বৌদ্ধ, জৈন আৰু খ্ৰীষ্টানসকলৰ ভাৰতীয় নাগৰিকত্বৰ আবেদন ত্বৰান্বিত কৰিব ।

লগতে পঢ়ক :CAA ৰূপায়ণ বিজেপিৰ লেতেৰা ভোট বেংকৰ ৰাজনীতি: কেজৰিৱাল