তেজপুৰ, 21 জানুৱাৰী : মণিপুৰৰ মুখ্যমন্ত্ৰী এন বীৰেন সিঙে কেন্দ্ৰীয় বাহিনীক সমালোচনা কৰি অসন্তুষ্টি প্ৰকাশ কৰি কয় যে, বৰ্তমানৰ সংকটে মণিপুৰক আগুৰি ধৰাৰ সময়ত কেন্দ্ৰীয় নিৰাপত্তা বাহিনীসমূহৰ ভূমিকাই আহুকালৰ সৃষ্টি কৰিছে ৷ তেওঁলোকৰ ভূমিকা পৰ্যবেক্ষণৰ বাহিৰেও জীৱন আৰু সম্পত্তিৰ সুৰক্ষালৈকে বিস্তৃত বুলি সিঙে কয় ৷ তেওঁ কয় যে, কেন্দ্ৰীয় সুৰক্ষা বাহিনী সমূহ ৰাজ্যখনত হিংসাক নিয়ন্ত্ৰণ কৰাত সহায় কৰিবলৈহে আছে, কেৱল পৰ্যবেক্ষণ কৰিবলৈ নহয় ৷
তেওঁ কয় যে, মণিপুৰত কি চলি আছে তাক পৰ্যবেক্ষণ কৰিবলৈ কেন্দ্ৰীয় বাহিনীক নিমন্ত্ৰণ কৰা হোৱা নাই ৷ ৰাষ্ট্ৰৰ অখণ্ডতা আৰু নিৰীহ জনসাধাৰণৰ জীৱন আৰু সম্পত্তি ৰক্ষা কৰিবলৈ তেওঁলোকক আমন্ত্ৰণ জনোৱা হৈছে বুলি কয় মুখ্যমন্ত্ৰীজনে ৷ আজি ইম্ফলৰ 1 নং বেটেলিয়ন মণিপুৰ ৰাইফলছৰ পেৰেড খেলপথাৰত অনুষ্ঠিত 52 সংখ্যক মণিপুৰ ৰাজ্যিক দিৱসৰ পেৰেডত ভাষণ প্ৰদান কৰে মুখ্যমন্ত্ৰীয়ে ৷
তেওঁ ভাষণ প্ৰসংগত প্ৰত্যাহ্বানমূলক নিৰাপত্তা পৰিস্থিতিৰ প্ৰতি সঁহাৰি জনাই ৰাজ্যিক বাহিনীসমূহৰ মাজত সতৰ্কতা বৃদ্ধিৰ বাবে আহ্বান জনায় ৷ শেহতীয়াকৈ ম'ৰেহ চহৰ আৰু বিষ্ণুপুৰ জিলাকে ধৰি ৰাজ্যখনৰ বিভিন্ন স্থানত সন্দেহযুক্ত কুকি উগ্ৰপন্থীয়ে নিৰাপত্তাৰক্ষী আৰু সাধাৰণ নাগৰিকৰ ওপৰত তীব্ৰ আক্ৰমণ চলোৱাৰ পিছত এই কথা প্ৰকাশ পাইছে ৷
1949 চনত ৰাজকীয় ৰাজ্যৰ পৰা মণিপুৰ ভাৰতত একত্ৰিত হয় আৰু 1972 চনত এখন পূৰ্ণাংগ ৰাজ্যৰ স্বীকৃতি লাভ কৰে ৷ ৰাজ্যখনৰ অস্থিৰ পৰিস্থিতিৰ প্ৰতি লক্ষ্য ৰাখি তেওঁ সকলো ৰাজ্যিক বাহিনীক সকলো সময়তে সজাগ হৈ থাকিবলৈও আহ্বান জনায় ৷
প্ৰধানমন্ত্ৰী নৰেন্দ্ৰ মোদী আৰু কেন্দ্ৰীয় গৃহমন্ত্ৰী অমিত শ্বাহৰ শেহতীয়া আশ্বাস- আন্দোলনৰ অন্ত পেলোৱা, ভাৰত-ম্যানমাৰ সীমান্ত বেৰ দিয়া, এন আৰ চি (ৰাষ্ট্ৰীয় নাগৰিকপঞ্জী) কাৰ্যকৰী কৰাৰ বাবে শলাগ লৈ বীৰেন সিঙে কয় যে এই আশ্বাসসমূহ ৰাইজৰ বাবে আটাইতকৈ ডাঙৰ উপহাৰ ৷