ছ'পোৰ: উত্তৰ কাশ্মীৰৰ ছ'পোৰৰ পানীপোৰা অঞ্চলত বৃহস্পতিবাৰে নিশা সংঘটিত গুলীয়াগুলীৰ ঘটনাৰ ফলত শুকুৰবাৰে দুটা অচিনাক্ত সন্ত্ৰাসবাদী নিহত হয় । সেনাৰ সূত্ৰত এই কথা প্ৰকাশ । চৰকাৰী সূত্ৰ অনুসৰি, বৃহস্পতিবাৰে সন্ধিয়া আৰম্ভ হোৱা এক অভিযানৰ ফলত সন্ত্ৰাসবাদী দুটা নিহত হয় আৰু অভিযান এতিয়াও চলি আছে ।
লগতে কয় যে অন্ধকাৰৰ কাৰণে অভিযান স্থগিত কৰা হৈছিল আৰু শুকুৰবাৰে পুৱতিনিশা অভিযান পুনৰ আৰম্ভ কৰা হয় । এই অভিযানতে উগ্ৰপন্থী দুটা নিহত হয় । অৱশ্যে মৃতদেহ দুটা এতিয়াও উদ্ধাৰ হোৱা নাই ।
এই সন্ত্ৰাসবাদ-বিৰোধী অভিযানটো সেনাৰ ২২ ৰাষ্ট্ৰীয় ৰাইফলছ, বিশেষ অভিযান গোট আৰু ছ'পোৰ আৰক্ষীয়ে যুটীয়াভাৱে চলাই আছে ।
উল্লেখ্য যে বুধবাৰে বান্দিপোৰা আৰু লোলাব বনাঞ্চলত পৃথক গুলীয়াগুলীৰ ঘটনাত দুটা পাকিস্তানী সন্ত্ৰাসবাদী নিহত হোৱাৰ পিচত ২৪ ঘণ্টাৰ ভিতৰত উত্তৰ কাশ্মীৰত তৃতীয়টো সন্ত্ৰাসবাদ-বিৰোধী অভিযানত এই সফলতা লাভ কৰা হয় ।
নৱেম্বৰৰ প্ৰথম সপ্তাহতে সমগ্ৰ কাশ্মীৰ উপত্যকাত ছয়টা সন্ত্ৰাসবাদ-বিৰোধী অভিযান আৰম্ভ হয় । এই অভিযানৰ ফলত এতিয়ালৈকে পাঁচ সন্ত্ৰাসবাদীৰ মৃত্যু হৈছে ।
আনহাতে, অক্টোবৰ মাহত কাশ্মীৰত সন্ত্ৰাসবাদমূলক হিংসাত্মক ঘটনাত ৯ জন নাগৰিক নিহত হয় । ইয়াৰ ভিতৰত আছে সাতজন বহিঃৰাজ্যৰ শ্ৰমিক, এজন সেনা জোৱান আৰু এজন চিকিৎসক ।
এই আক্ৰমণৰ ঘটনাবোৰ এক দশকৰো অধিক সময়ৰ পিচত কেন্দ্ৰীয়শাসিত অঞ্চলটোত অনুষ্ঠিত প্ৰথম বিধানসভা নিৰ্বাচনৰ পিচতে সংঘটিত হৈছে । অনুচ্ছেদ 370-ৰ অধীনত জম্মু-কাশ্মীৰৰ বিশেষ মৰ্যাদা প্ৰত্যাহাৰ কৰাৰ পিচত এই নিৰ্বাচন এক গুৰুত্বপূৰ্ণ ৰাজনৈতিক পৰিৱৰ্তন হিচাপে বিবেচিত হৈছে ।
