গুৱাহাটী : হিংসাজৰ্জৰ মণিপুৰৰ প্ৰশাসনত কেইবাটাও গুৰুত্বপূৰ্ণ ৰদবদল কৰা হৈছে । হিংসা আৰম্ভ হোৱাৰ পিছত প্ৰশাসনৰ প্ৰথম বৃহৎ ৰদবদল হিচাপে চৰকাৰে আৰক্ষী আৰু অসামৰিক প্ৰশাসনকে ধৰি কমেও ৭০ গৰাকী আমোলাক ৰদবদল কৰিছে ।
এই ৰদবদলত ১০ গৰাকী আইপিএছ আৰু মণিপুৰ আৰক্ষী সেৱাৰ বিষয়া অন্তৰ্ভুক্ত আছে । বাকীসকলৰ ভিতৰত কেন্দ্ৰীয় সেৱাৰ ৬০ গৰাকী আমোলা আৰু মণিপুৰ ৰাজ্যিক সেৱাৰ কেডাৰ অন্তৰ্ভুক্ত আছে ।
শীৰ্ষ পৰ্যায়ৰ প্ৰশাসনীয় বিষয়াক ৰদবদল
যোৱা মাহত প্ৰাক্তন গৃহ সচিব অজয় কুমাৰ ভাল্লাক মণিপুৰৰ ৰাজ্যপাল হিচাপে নিযুক্তি দিয়াৰ পিছতে এই ৰদবদল কৰা হৈছে । উত্তৰ-পূবৰ ৰাজ্যখনত ২০২৩ চনৰ ২ মে'ৰ পৰা সংখ্যাগৰিষ্ঠ মেইটেই আৰু সংখ্যালঘু কুকি সম্প্ৰদায়ৰ মাজত জাতিগত হিংসা দেখা গৈছিল । যাৰ ফলত এতিয়ালৈ ২৫০ ৰো অধিক লোক নিহত হৈছে আৰু ৬৫,০০০ ৰো অধিক লোক গৃহহীন হৈ পৰিছে বুলি জানিব পৰা গৈছে ।
হাজাৰ হাজাৰ ভুক্তভোগী লোক এতিয়াও ৰাজ্যখনৰ বিভিন্ন আশ্ৰয় শিবিৰতে আছে । এনে হিংসাই ৰাজ্যখনক সাম্প্ৰদায়িক ভিত্তিত বিভক্ত কৰাও দেখা গৈছে । আনকি প্ৰশাসন আৰু আৰক্ষীৰ মাজতো এনে সাম্প্ৰদায়িক প্ৰভাৱ দেখা গৈছে বুলি অভিযোগ আছে ।
মণিপুৰৰ মুখ্য সচিবে জাৰি কৰা পৃথক জাননীত কোৱা হৈছে যে জনস্বাৰ্থত পৰৱৰ্তী নিৰ্দেশ নোপোৱালৈকে ৬০ গৰাকী বিষয়া (আইএএছ/আইআৰএছ/আইপিএছ/এমচিএছ) আৰু ১০ গৰাকী আৰক্ষী বিষয়াৰ বদলি আৰু নিযুক্তি প্ৰভাৱিত হৈছে ।
আইএএছ পৌদুনথাং বৈফেইক (বৰ্তমানৰ পদ/সঞ্চালক প্ৰধান/ছেট) অতিৰিক্ত মুখ্য সচিব আৰু মহানিৰ্দেশক/ছেট, অৰুৰাক বাজপাই, আইএফএছ (বৰ্তমান পিচিচিপি/এইচঅ'এফএফ) অতিৰিক্ত মুখ্য সচিব (বস্ত্ৰ, বাণিজ্য আৰু উদ্যোগ/পিচিচিএফ) হিচাপে নিযুক্তি দিয়া হৈছে ।
জাননীখনত আইপিএছ ৰাকেশ বলৱালক (বৰ্তমানৰ এছপি থৌবাল জিলা) বদলি কৰা হৈছে আৰু ইম্ফল পূৱৰ আৰক্ষী অধীক্ষক হিচাপে দায়িত্ব দিয়া হৈছে ।
