নেশ্যনেল ডেস্ক, 23 ফেব্ৰুৱাৰী:ৰাছিয়াৰ সেনাবাহিনীত নিযুক্ত চাৰিজনকৈ ভাৰতীয়ক ভাৰতলৈ ঘূৰাই আনিবৰ বাবে প্ৰধানমন্ত্ৰী নৰেন্দ্ৰ মোদীৰ হস্তক্ষেপ বিচাৰিছে যুৱকৰ পৰিয়ালকেইটাই ৷চাকৰি পোৱাৰ বাবে ৰাছিয়ালৈ যোৱাৰ পিচত ভাৰতীয়কেইজন বৰ্তমান দেশখনত বিপদত পৰিছে বুলি পৰিয়ালে জনায় ৷
উত্তৰ প্ৰদেশৰ কাছগঞ্জৰ এজন যুৱকৰ লগতে কৰ্ণাটকৰ তিনিজনকে ধৰি কমেও চাৰিজন ভাৰতীয়ক এজেণ্টে প্ৰতাৰণা কৰি ৰাছিয়ান সেনাবাহিনীত "নিযুক্ত" কৰিছিল বুলি পৰিয়ালৰ লোকে জানিবলৈ দিয়ে । বিপদত পৰা যুৱকসকলক ভাৰতলৈ ঘূৰাই অনাৰ বাবে তেওঁলোকৰ আত্মীয়ই নৰেন্দ্ৰ মোদী নেতৃত্বাধীন কেন্দ্ৰীয় চৰকাৰখনক আহ্বান জনাইছে ।
উত্তৰ প্ৰদেশৰ কাছগঞ্জৰ এজন যুৱক আৰবাব হুছেইনে এজেণ্টৰ জৰিয়তে সহায়কৰ চাকৰি ল’বলৈ ৰাছিয়াত উপস্থিত হয় । কিন্তু তেওঁৰ পিতৃয়ে দাবী কৰে যে তেওঁৰ পুত্ৰই তেওঁক ডেৰ-দুমাহ পূৰ্বে ফোনযোগে অৱগত কৰিছিল যে তেওঁক সহায়কৰ চাকৰিৰ পৰিৱৰ্তে ৰাছিয়াৰ সেনাবাহিনীত নিযুক্তি দিয়া হৈছে ।
তেওঁৰ পিতৃয়ে প্ৰধানমন্ত্ৰী নৰেন্দ্ৰ মোদীক তেওঁৰ পুত্ৰক ভাৰতলৈ ঘূৰাই আনিবলৈ আহ্বান জনাইছে । কাছগঞ্জ জিলাৰ গঞ্জডুণ্ডৱাৰা চহৰৰ বাসিন্দা আশ্ৰফ হুছেইনে কয় যে তেওঁৰ পুত্ৰ আৰবাবে (Arbab) 2023 চনৰ 11 নৱেম্বৰত ব্যক্তিগত সংস্থাৰ জৰিয়তে সহায়কৰ চাকৰিৰ বাবে মস্কোলৈ গৈছিল ।
আশ্ৰফৰ মতে, যেতিয়া তেওঁৰ পুত্ৰই এই সন্দৰ্ভত আপত্তি দৰ্শাইছিল, তেতিয়া তেওঁৰ পাছপ’ৰ্ট আৰু ভিছা কাঢ়ি লোৱা হৈছিল আৰু তেওঁক ৰাছিয়ান ভাষাত যিকোনো কাগজত চহী কৰিবলৈ নিৰ্দেশ দিয়া হৈছিল । আশ্ৰফে লগতে দাবী কৰে যে তেওঁৰ পুত্ৰই ৰাছিয়া-ইউক্ৰেইন যুদ্ধত অংশ লৈছিল ।
আশ্ৰফে আৰু কয়, "মোৰ ল'ৰাটোক ৰাছিয়ালৈ পঠিয়াবলৈ বেংকৰ পৰা তিনি লাখ টকাৰ ঋণ লৈছিলো । মোৰ ল'ৰাটোৱে এজেন্সীক 3.80 লাখ টকা দিছিল । মোৰ ল'ৰাটোক সহায়কৰ চাকৰি আৰু উন্নত পাৰিশ্ৰমিকৰ প্ৰতিশ্ৰুতি দিয়া হৈছিল ৷ কিন্তু তেওঁক ৰাছিয়াৰ সৈন্যবাহিনীত নিযুক্তি দিয়া হয়’’ ৷
পুত্ৰক ভাৰতলৈ ঘূৰাই অনাৰ বাবে প্ৰধানমন্ত্ৰী নৰেন্দ্ৰ মোদীক আবেদন জনাইছে ভুক্তভোগী পিতৃ আশ্ৰফে । ইফালে ৰাছিয়াত নিৰাপত্তাৰক্ষী হিচাপে কাম কৰিবলৈ যোৱা কৰ্ণাটকৰ কালাবুৰাগীৰ তিনিজন যুৱকক তাত সেনাবাহিনীত নিযুক্তি দিয়া হৈছে আৰু তেওঁলোক বিপদত পৰিছে বুলি যুৱককেইজনৰ পিতৃ-মাতৃয়ে জানিবলৈ দিয়ে ।
ৰাছিয়াত আবদ্ধ হৈ আছে কালাবুৰাগী জিলাৰ আলন্দ তালুকৰ নৰোনা গাঁৱৰ চৈয়দ ইলিয়াছ হুছেইনী, মহম্মদ সমীৰ আহমেদ আৰু ছফিয়া মহম্মদ । এটা ভিডিঅ' প্ৰেণ কৰি যুৱকসকলে কয়, "মুম্বাইৰ বাবা নামৰ এজন এজেণ্টে আমাক ইয়ালৈ পঠিয়াইছিল আৰু পিচত আমাক সেনাবাহিনীত যোগদান কৰোৱায়’’ ৷
চৈয়দ ইলিয়াছ হুছেইনৰ পিতৃ হেড কনিষ্টবল নৱাজ কালাগীয়ে কৰ্ণাটকৰ মন্ত্ৰী প্ৰিয়ংক খাৰ্গেক সাক্ষাৎ কৰি ঘটনাৰ বিষয়ে ব্যাখ্যা কৰি কৰ্ণাটক চৰকাৰক শিশুসকলক সুৰক্ষা দিবলৈ অনুৰোধ জনায় ।
নৱাজে কয়, "মোৰ ল'ৰাকে ধৰি কেইটামান ল'ৰাই আগতে ডুবাইত কাম কৰিছিল । দুবছৰৰ পিচত চহৰলৈ উভতি আহিছিল । ইয়ালৈ অহাৰ পিচত তেওঁলোকে কেনেবাকৈ ইউটিউব ব্ল’গ কৰি থকা মুম্বাইৰ এজন এজেণ্টৰ সৈতে যোগাযোগ কৰিছিল । মোৰ ল'ৰাকে ধৰি বহু লোকে ভিছা আৰু পাছপ'ৰ্ট প্ৰস্তুত কৰি চেন্নাই হৈ ৰাছিয়াৰ মস্কোলৈ ৰাওনা হৈছিল’’ ৷
নৱাজে লগতে কয়, "তেওঁলোকেও ফোন কৰি ক'লে যে আমি পাঁচ-ছয় দিনৰ পিচত উক্ত স্থানত উপস্থিত হৈছে । অৱশ্যে 15 দিনৰ পিচত তেওঁলোকে আমাক পুনৰ ফোন কৰি ক'লে যে তেওঁলোকে তেওঁলোকক ইউক্ৰেইনৰ সীমান্তলৈ লৈ গৈছে । প্ৰতাৰণাৰ বলি হৈ ইউক্ৰেইন সীমান্তত আমাৰ ল'ৰা-ছোৱালীবোৰ এতিয়া বিপদত পৰিছে পৰিছে’’ ।
নৱাজে প্ৰিয়ংক খাৰ্গে, সাংসদ উমেশ যাদৱ, কংগ্ৰেছৰ সভাপতি মল্লিকাৰ্জুন খৰ্গে, জিলা উপায়ুক্তক লগ কৰি তেওঁলোকক সুৰক্ষিতভাৱে ভাৰতলৈ আনিবলৈ দিহা কৰিবৰ বাবে অনুৰোধ জনাইছে বুলি জানিবলৈ দিয়ে । এই ক্ষেত্ৰত সকলোৱে সহযোগ কৰা বুলি উল্লেখ কৰি কেন্দ্ৰক যুৱককেইজনক সুৰক্ষিতভাৱে ঘূৰি অহাত সহায় কৰিবলৈ আহ্বান জনায় ৷
বিপদত পৰা আন এজন যুৱকৰ ভাতৃ মাহমাদা পাছাই অভিযোগ কৰি কয়, “তেওঁলোকে তেওঁলোকক সামৰিক ইউনিফৰ্ম পিন্ধি ইউক্ৰেইনৰ সীমান্তত থিয় কৰাইছিল ৷ তেওঁলোকৰ জীৱন বিপদত পৰিছে আৰু অতি সোনকালে তেওঁলোকক ভাৰতলৈ অনাৰ প্ৰচেষ্টা চলোৱা উচিত’’ ।
কৰ্ণাটক চৰকাৰে ৰাজ্যখনৰ তিনিজন যুৱকক উদ্ধাৰৰ বাবে বৈদেশিক পৰিক্ৰমা মন্ত্ৰণালয়লৈ পত্ৰ প্ৰেৰণ কৰিছে বুলি বৃহস্পতিবাৰে মন্ত্ৰী প্ৰিয়ংক খাৰ্গে জনায় । কেন্দ্ৰীয় চৰকাৰক এই বিষয়টোক গুৰুত্বসহকাৰে লৈ অনতিপলমে তেওঁলোকৰ প্ৰতি সহায়ৰ হাত আগবঢ়াবলৈ আহ্বান জনায় ।
সাংবাদিকৰ সৈতে হোৱা এক সাক্ষাৎকাৰত প্ৰিয়ংকে এই সন্দৰ্ভত মল্লিকাৰ্জুন খৰ্গেৰ সৈতে কথা পতাৰ লগতে তেওঁক বৈদেশিক পৰিক্ৰমা মন্ত্ৰী এছ জয়শংকৰৰ বিষয়টো দৃষ্টিগোচৰ কৰিবলৈ অনুৰোধ জনাইছে ৷ খাৰ্গেই বৈদেশিক পৰিক্ৰমা দপ্তৰৰ মন্ত্ৰীগৰাকীৰ সৈতে কথা পাতিব আৰু লগতে চিঠিও লিখিব বুলি আশ্বাস প্ৰদান কৰিছে ৷
প্ৰিয়ংক খাৰ্গেই কয়, "এয়া (এনেধৰণৰ চাকৰিৰ জালিয়াতি) কেইবা ঠাইতো সংঘটিত হৈছে বুলি তথ্য পোৱা গৈছে ৷ তেলেংগানা, কৰ্ণাটক, উত্তৰ ভাৰতৰ কেইবা ঠাইতো । যিয়েই নহওক, কাৰোবাক প্ৰতাৰণা কৰি বা প্ৰৱঞ্চনাৰ মাধ্যমেৰে যুদ্ধলৈ লৈ যোৱাটো (ভুল) । কেন্দ্ৰই এই কথাটো গুৰুত্বসহকাৰে ল’ব লাগিব আৰু তৎক্ষণাত তেওঁলোকৰ প্ৰতি সহায়ৰ হাত আগবঢ়াব লাগিব’’ ৷
লগতে পঢ়ক:মহাৰাষ্ট্ৰৰ প্ৰাক্তন মুখ্যমন্ত্ৰী মনোহৰ যোশীৰ মৃত্যু
