নতুন দিল্লী :ৰাজধানী দিল্লীৰ প্ৰশান্ত বিহাৰ অঞ্চলত বৃহস্পতিবাৰে এক বিস্ফোৰণৰ ঘটনা সংঘটিতহয় । পুৱা প্ৰশান্ত বিহাৰ অঞ্চলৰ পি ভি আৰ চিনেমা হলৰ ওচৰত এই বিস্ফোৰণটো সংঘটিত হয় । জানিব পৰা মতে, বিস্ফোৰণটো সংঘটিত হয় পি ভি আৰৰ ওচৰৰ বংশী ছুইটছৰ সন্মুখত । দিনৰ ১১.৪৮ বজাত এই বিস্ফোৰণৰ খবৰ লাভ কৰা হয় । বিস্ফোৰণ সংঘটিত হোৱা স্থানত মানুহে ধোঁৱাৰ কুণ্ডলী দেখিবলৈ পায় ।
ইফালে লাভ কৰা তথ্যৰ ভিত্তিত অগ্নিনিৰ্বাপক বিভাগ, আৰক্ষী আৰু ফৰেনচিক দল ঘটনাস্থলীত উপস্থিত হয় আৰু অনুসন্ধান আৰম্ভ কৰে । ফৰেনচিক দলটোৱে ঘটনাস্থলীৰ পৰা দেখাত বগা পাউডাৰৰ দৰে এবিধ পদাৰ্থও উদ্ধাৰ কৰে । ফৰেনচিক দলে সেয়া পৰীক্ষা কৰি আছে । এই বিস্ফোৰণ কিয় আৰু কেনেকৈ হৈছিল, ইয়াৰ আঁৰত কোন আছে এই সন্দৰ্ভত আৰক্ষীয়ে অনুসন্ধান কৰি আছে ।
প্ৰত্যক্ষদৰ্শীয়ে জনোৱা মতে, বিস্ফোৰণৰ শব্দ অতি প্ৰচণ্ড আছিল । অৱশ্যে এই বিস্ফোৰণৰ ফলত কোনো ক্ষয়-ক্ষতিৰ তথ্য লাভ কৰা হোৱা নাই । ইফালে তথ্য পোৱাৰ লগে লগে দিল্লী আৰক্ষী আৰু অগ্নিনিৰ্বাপক বাহিনীৰ দল ঘটনাস্থলীত উপস্থিত হয় । দিল্লী অগ্নিনিৰ্বাপক সেৱাই জনায়, "আজি দিনৰ ১১.৪৮ বজাত প্ৰশান্ত বিহাৰ অঞ্চলৰ পৰা এটা বিস্ফোৰণৰ খবৰ পোৱা গৈছে । ঘটনাস্থলীত অগ্নিনিৰ্বাপক বাহিনীৰ গাড়ী উপস্থিত হৈছে । প্ৰশান্ত বিহাৰৰ এখন চি আৰ পি এফ বিদ্যালয়ৰ ওচৰত বিস্ফোৰণ সংঘটিত হোৱাৰ এমাহৰো কম সময়ৰ ভিতৰত এইটো দ্বিতীয় ঘটনা ।"
২০ অক্টোবৰতো এই স্থানত সংঘটিত হৈছিল বিস্ফোৰণ
যোৱা মাহত এই স্থানত চি আৰ পি এফ বিদ্যালয়ৰ ওচৰত হোৱা বিস্ফোৰণত বিদ্যালয়খনৰ দেৱাল ক্ষতিগ্ৰস্ত হৈছিল । ওচৰৰ দোকানবোৰো ক্ষতিগ্ৰস্ত হৈছিল । ঘটনাস্থলীত উপস্থিত লোকসকলে জনাইছিল যে বিস্ফোৰণৰ শব্দ শুনি তেওঁলোক তৎক্ষণাৎ তেওঁলোকৰ ঘৰ আৰু দোকানৰ পৰা ওলাই আহে । ঘটনাটোত কোনো লোক আহত হোৱা নাই । দিল্লী আৰক্ষীয়ে প্ৰশান্ত বিহাৰ অঞ্চলৰ চি আৰ পি এফ বিদ্যালয়ৰ ওচৰত সংঘটিত বিস্ফোৰণৰ সন্দৰ্ভত বিস্ফোৰক আইনৰ অধীনত এখন এজাহাৰ পঞ্জীয়ন কৰে ।