کورونا گائیڈ لائنز کی دھجیاں اُڑاتے نظر آئے لوگ، ویڈیو وائرل

ملک میں کورونا وبا تیزی سے بڑھ رہی ہے جس کی وجہ سے ہر طرف افراتفری کا ماحول ہے اور ہر کوئی اس سے چھٹکارا پانے کی کوشش اور دعائیں کر رہا ہے۔ ایسے میں ریاست گجرات کے شہر احمد آباد کے سانند تعلقہ کے نواپور گاؤں کا ایک ایسا ویڈیو سامنے آیا جس میں کورونا وائرس کے خاتمے کے نام پر ایک مذہبی پروگرام میں جلوس کی شکل میں سینکڑوں خواتین کا ہجوم دیکھنے کو ملا جو کورونا گائیڈ لائنز کی دھجیاں اُڑا رہا ہے۔ اس معاملے میں پولیس نے 23 افراد کو کورونا قوانین کی خلاف ورزی کے الزام میں گرفتار کیا ہے۔ گزشتہ روز (3 مئی کی) سانند تعلقہ کے گاؤں نواپورہ کی ویڈیو میں دیکھا جاسکتا ہے کہ کس طرح 500 کے قریب خواتین ایک مندر کا چکر لگارہی ہیں۔ سبھی نے اپنے سروں پر مٹکا لے رکھا ہے جب کہ کچھ مرد بھی مٹکا لئے ہوئے دیکھے جا سکتے ہیں۔ ایک پولیس افسر نے بتایا کہ گاؤں والوں کا ماننا تھا کہ دیو مندر میں جل چڑھانے سے کورونا وائرس کا خاتمہ ہوگا۔