مغربی بنگال بھارتیہ جنتاپارٹی کے صدر اور رکن پارلیمان دلیپ گھوش نے ترنمول کانگریس کی سربراہ اور وزیراعلیٰ ممتابنرجی کو تنقید کا ہدف بناتے ہوئے کہاکہ وہ پاگل ہوگئیں ہیں۔ذہنی توازن بگڑجانے کے سبب وہ چیختی چلاتی ہیں۔
کیتھو گرام میں شہریت ترمیمی ایکٹ کی حمایت میں نکالی گئی ریلی کی قیادت کرتے ہوئے بھارتیہ جنتاپارٹی کے صدر دلیپ گھوش نے کہاکہ ممتابنرجی کے پاس کہنے کے لیے کچھ رہ نہیں گیا ہے۔ اس لیے جلسہ اور جلوس میں وہ چیختی چلاتی ہیں۔
انہوں نے کہاکہ ان کی بات سننے والا کوئی نہیں ہے۔ شہریت ترمیمی ایکٹ سے متعلق لوگوں کو جتنا گمراہ کرسکتی تھی کرچکی ہیں۔ لوگوں کو ان کی سازش سمجھ میں آچکی ہے۔
بی جے پی کے رکن پارلیمان کاکہنا ہے کہ ترنمول کانگریس کی سربراہ نہیں چاہتی ہیں کہ بنگال کے ہندؤں کو فائدہ ہو۔ وہ بنگال کے ہندو مخالف وزیراعلیٰ ہیں۔ اس لیے نئے قانون کی مخالفت کرتی ہیں۔
بھارتیہ جنتاپارٹی کے رہنما کاکہنا ہے کہ آزادی کے بعد بنگلہ دیش جانے والے بنگالی ہندوؤں کو وہاں بربریت کاسامنا کرنا پڑا ہے۔ بی جے پی کی قیادت والی مرکزی حکومت نے ان بنگالی ہندوؤں کو بھارتی شہریت دینے کے لئے نیا قانون بنایا ہے لیکن وزیراعلیٰ کو پسند نہیں ہے۔
انہوں نے مزیدکہاکہ بنگلہ دیش میں ظلم کاسامناکرنے والے ہندوں کوہم مغربی بنگال میں جگہ دیں گے ۔ لیکن ممتابنرجی کو اپنا ووٹ بینک کی فکر پڑی ہے۔وہ اپنا ووٹ بینک بچانے کے لیے لنگی پہننے والوں کی حمایت کررہی ہیں۔
