بنگال میں کورونا وائرس کی وجہ سے مرشدآباد جنگی پور سے آر ایس پی کے امیدوار کی موت ہوگئی.
مغربی بنگال میں کورونا وبا نے ایک اور امیدوار کی جان لے لی ہے۔ مرشد آباد ضلع کےجنگی پور اسمبلی حلقہ سے آر ایس پی امیدوار پردیپ نندی کا جمعہ کی شام کو انتقال ہوگیا۔
کچھ دن قبل وہ کورونا سے متاثر ہوگئے تھے اور انہیں مرشد آباد کے مدر ہاؤس اسپتال میں داخل کرایا گیا تھا۔
ایک دن پہلے ہی مرشد آباد کے شمشیر گنج اسمبلی حلقے سے کانگریس کے امیدوار رضا الحق کا انتقال ہوگیا تھا۔ پردیپ کی موت کے ساتھ ہی ، ریاست میں اس وبا کی وجہ سے مرنے والے امیدواروں کی تعداد محض دو دن میں دو گنی ہوگئی ہے۔ بنگال میں کورونا وائرس کے یومیہ تعداد میں تیزی سے اضافہ ہورہاہے ۔آج یومیہ 6,910کورونا کے نئے مریض سامنے آئے ہیں ۔بنگال میں کورونا کے کل مریضوں کی تعداد 643795تک پہنچ گئی ہے۔
کورونا وائرس کے پھیلتے ہوئے دائرہ کے باوجود الیکشن کمیشن نے انتخابی شیڈول میں کوئی تبدیلی کرنے سے انکار کردیا ہے۔تاہم الیکشن کمیشن نے شام 6بجے سے صبح 10بجے تک انتخابی مہم چلانے پر پابندی عاید کردی ہے۔
