مغربی بنگال کے جنوبی 24 پرگنہ کے بھانگوڑ اسمبلی حلقے میں ترنمول کانگریس کے رہنما نے متنازع بیان دیتے ہوئے کہا کہ ترنمول حامیوں کو ہی سو روزہ روزگار منصوبے کے تحت کام ملے گا۔
بھانگوڑ کے بھاگول پنچایت کے پردھان اور ترنمول کانگریس کے رہنما مدثر حسین نے پارٹی دفتر کی افتتاحی تقریب کو خطاب کرتے ہوئے سو روزہ روزگار منصوبے کو لے کر متنازع بیان دیا تھا۔
حکمراں جماعت کے رہنما مدثر حسین نے سابق رکن اسمبلی عرب الاسلام کی موجودگی میں کہا کہ ترنمول کانگریس کی حمایت کرنے والوں کو ہی سو روزہ روزگار منصوبے کے تحت کام ملے گا۔
انہوں نے کہا کہ دوسری سیاسی جماعتوں کی حمایت کرنے والے لوگ جب تک ترنمول کانگریس کے سامنے خود سپردگی نہیں کریں گے اس وقت تک انہیں کام نہیں دیا جائے گا۔ ترنمول کانگریس کے رہنما مدثر حسین کے متنازع بیان کے منظر عام پر آنے کے بعد دوسری سیاسی جماعت کے رہنماؤں نے پُرزور مذمت کی۔
بھانگوڑ سے انڈین سیکولر فرنٹ کے رکن اسمبلی نوشاد صدیقی کا کہنا ہے کہ سیاسی جماعت کی بنیاد پر کسی بھی مزدور کے ساتھ امتیازی سلوک نہیں ہونا چاہئے۔
انہوں نے کہا کہ ترنمول کانگریس کے رہنما مدثر حسین اور عرب الاسلام کے کہنے سے کچھ نہیں ہوتا ہے۔ بھانگوڑ میں رہنے والے تمام لوگوں کو سو روزہ روزگار منصوبے کے تحت کام ملے گا۔ اگر ایسا نہیں ہوا تو انڈین سیکولر فرنٹ کی جانب سے تحریک چلائی جائے گی۔
