بانڈی پورہ: جموں و کشمیر کے بانڈی پورہ میں فوج کی ایک گاڑی سڑک سے پھسل کر کھائی میں گرنے سے چار فوجی ہلاک اور متعدد زخمی ہوگئے۔ جائے حادثہ پر ریسکیو آپریشن کیا گیا۔ حکام نے بتایا کہ بانڈی پورہ میں ایس کے پایان کے نزدیک فوج کی ایک گاڑی سڑک سے پھسل کر ایک کھائی میں گر گئی۔ حکام نے بتایا کہ زخمی فوجیوں کو فوری طور پر قریبی طبی مرکز میں علاج کے لیے لے جایا گیا۔
حکام نے حادثے کی وجوہات جاننے کے لیے تحقیقات شروع کر دی ہیں۔ اس بارے میں ڈسٹرکٹ ہسپتال بانڈی پورہ کے میڈیکل سپرنٹنڈنٹ ڈاکٹر مسرت اقبال وانی نے بتایا کہ ’’یہاں 5 زخمی لائے گئے تھے، جن میں سے 2 کی موت ہوگئی، 3 زخمیوں کی حالت تشویشناک ہے اور انہیں مزید علاج کے لیے سری نگر ریفر کردیا گیا ہے۔ ..."
لیفٹیننٹ گورنر منوج سنہا نے ضلع بانڈی پورہ میں المناک سڑک حادثے کے نتیجے میں ہندوستانی فوج کے جوانوں کے جاں بحق ہونے پر تعزیت کا اظہار کیا ہے۔ ایک تعزیتی پیغام میں، لیفٹیننٹ گورنر نے کہا ہے: "بانڈی پورہ میں ایک المناک سڑک حادثے میں ہندوستانی فوج کے جوانوں کے جاں بحق ہونے پر گہرا رنج ہوا۔ قوم ان کی خدمات اور عزم پر تہہ دل سے مشکور ہے۔ سوگوار خاندانوں کے ساتھ میری تعزیت اور زخمیوں کی جلد صحت یابی کے لیے دعا ہے۔
اس سے قبل 24 دسمبر کو پونچھ ضلع میں لائن آف کنٹرول (ایل او سی) کے قریب فوج کی ایک گاڑی سڑک سے پھسل کر 300 فٹ گہری کھائی میں گر گئی۔ اس حادثے میں 5 فوجی ہلاک اور ڈرائیور سمیت 5 دیگر فوجی شدید زخمی ہو گئے۔ فوج نے اس سڑک حادثے کے حوالے سے ایک بیان جاری کیا جس میں کہا گیا کہ '2.5 ٹن وزنی گاڑی، جو چھ گاڑیوں کے قافلے کا حصہ تھی، پونچھ کے قریب آپریشنل ٹریک پر جاتے ہوئے سڑک سے اتر کر کھائی میں گر گئی۔'
#WATCH | Jammu and Kashmir: 2 soldiers died, 3 injured after an Army vehicle veered off the road and plunged into a deep gorge near the Wular Viewpoint in the Bandipora district pic.twitter.com/lQ8MAoY9ca
— ANI (@ANI) January 4, 2025
4 نومبر 2024 کو راجوری ضلع میں ایک گاڑی سڑک سے پھسل کر کھائی میں گرنے سے فوج کا ایک سپاہی ہلاک اور دوسرا زخمی ہوگیا۔ 2 نومبر 2024 کو ریاسی ضلع میں ایک کار پہاڑی سڑک سے پھسل کر گہری کھائی میں گرنے سے ایک خاتون اور اس کے 10 ماہ کے بیٹے سمیت تین افراد ہلاک اور تین دیگر شدید زخمی ہو گئے۔
