میلبورن: آسٹریلوی کپتان پیٹ کمنز اور فاسٹ بولر جوش ہیزل ووڈ آئی سی سی چیمپیئنز ٹرافی 2025 سے باہر ہو گئے جب کہ آل راؤنڈر مارکس اسٹونیس نے آج اچانک ون ڈے کرکٹ سے ریٹائرمنٹ کا اعلان کر کے سب کو حیران کر دیا۔ اس سے قبل آل راؤنڈر مچل مارش فٹنس مسائل کے باعث پہلے ہی ٹیم سے باہر ہو چکے ہیں۔
آسٹریلوی کرکٹ ٹیم کے چیف سلیکٹر نے کیا کہا؟
آسٹریلیا نے بھی باضابطہ طور پر اعلان کیا کہ کپتان پیٹ کمنز اور ساتھی فاسٹ باؤلر جوش ہیزل ووڈ کو آئندہ چیمپئنز ٹرافی اور سری لنکا کے خلاف دو ون ڈے میچوں کے لیے ٹیم سے باہر کر دیا گیا ہے۔
آسٹریلوی کرکٹ ٹیم کے چیف سلیکٹر جارج بیلی نے ایک بیان میں کہا، "بدقسمتی سے پیٹ کمنز، جوش ہیزل ووڈ اور مچل مارش کچھ انجریز سے نبرد آزما ہیں اور چیمپئنز ٹرافی کے لیے وقت پر مکمل فٹنس حاصل نہیں کر سکے، اگرچہ یہ مایوس کن ہے، لیکن یہ دوسرے کھلاڑیوں کے لیے عالمی مقابلوں میں آسٹریلیا کے لیے پرفارم کرنے کا بہترین موقع فراہم کرتا ہے۔"
چیمپئنز ٹرافی کے لیے 4 تبدیلیاں
آپ کو بتاتے چلیں کہ اب آسٹریلیا کو چیمپئنز ٹرافی کے لیے اپنی ابتدائی ٹیم میں 4 تبدیلیاں کرنا پڑی ہیں۔ پیٹ کمنز ابھی تک ٹخنے کی انجری سے صحت یاب نہیں ہوئے جبکہ جوش ہیزل بھی انجری کا شکار ہیں۔ دونوں آسٹریلوی فاسٹ باؤلرز کو مکمل فٹ ہونے کے لیے وقت درکار ہے۔
مارکس سٹوئنس ون ڈے سے ریٹائر
دوسری جانب مارکس اسٹوئنس نے حیران کن طور پر ون ڈے سے ریٹائرمنٹ لے کر ٹی ٹوئنٹی کرکٹ پر توجہ مرکوز کر لی ہے۔ اس حوالے سے کرکٹ آسٹریلیا کا کہنا ہے کہ مارکس اسٹونیس ٹی ٹوئنٹی سلیکشن کے لیے دستیاب ہوں گے۔ مارکس اسٹوئنس چیمپئنز ٹرافی کے لیے آسٹریلوی ٹیم کا حصہ تھے، ان کی جگہ اب ایک اور کھلاڑی کو چیمپئنز ٹرافی کے لیے ٹیم میں شامل کیا جائے گا۔
فائنل ٹیم کو آئی سی سی میں جمع کرانے کی آخری تاریخ کیا ہے؟
کرکٹ آسٹریلیا کا کہنا ہے کہ قومی سلیکشن پینل چیمپئنز ٹرافی کے اسکواڈ کو سری لنکا کے خلاف ٹیسٹ سیریز کے اختتام پر حتمی شکل دے گا۔ ٹیموں کے پاس 12 فروری تک ٹورنامنٹ کے لیے 15 کھلاڑیوں کا حتمی سکواڈ آئی سی سی کو جمع کرانے کا وقت ہے۔ آسٹریلیا کو 2025 کی چیمپئنز ٹرافی کے گروپ بی میں افغانستان، انگلینڈ اور جنوبی افریقہ کے ساتھ رکھا گیا ہے۔
چیمپئنز ٹرافی کا آغاز 19 فروری سے ہوگا۔
پاکستان کی میزبانی میں ہونے والا یہ ٹورنامنٹ 19 فروری کو کراچی کے نیشنل اسٹیڈیم میں شروع ہوگا جہاں افتتاحی میچ پاکستان اور نیوزی لینڈ کے درمیان کھیلا جائے گا۔ ہندوستان اپنے تمام میچ دبئی میں کھیلے گا۔ ٹورنامنٹ کا فائنل میچ 9 مارچ کو کھیلا جائے گا۔
