مغربی بنگال کے دارالحکومت کولکاتا سے 60 کیلو میٹر کے فاصلے پر واقع ندیا ضلع کے کلیانی میونسپل اسٹیڈیم میں محمڈن اسپورٹنگ اور ریلوے ایف سی کی ٹیمیں نبرد آزما ہوئیں۔
کلکتہ فٹبال لیگ 2021 پرئمیر ڈویژن گروپ اے کے اس اہم میچ میں محمڈن اسپورٹنگ اور ریلوے ایف سی کی ٹیمیں جیت کے حصول کے لئے اس میچ میں اتریں تھی۔
دونوں ٹیموں نے لیگ کے میچ کی شروعات سے ہی ایک دوسرے پر سبقت بنانے کی کوشش کی تھی۔
محمڈن اسپورٹنگ اور ریلوے ایف سی کی ٹیموں کے کھلاڑیوں کے درمیان دلچسپ اور سنسنی خیز مقابلہ دیکھنے کو ملا۔ دونوں میں سے کوئی بھی ٹیم ایک دوسرے کے لیے ایک انچ زمین چھوڑنے کے لئے تیار نہیں تھی۔
پہلے ہاف کے ایکسٹرا ٹائم میں شیخ فیض نے شاندار کھیل کا مظاہرہ کرتے ہوئے خوبصورت گول کرکے محمڈن اسپورٹنگ کو ایک صفر کی سبقت دلائی۔
کھیل کے دوسرے ہاف میں بھی دونوں ٹیموں کی جانب سے جارحانہ کھیل دیکھنے کو ملا۔ شروعات سے ہی ایک دوسرے پر دبدبہ بنانے کی کوشش کی گئی۔
ریلوے ایف سی ایک گول کے خسارے کو ختم کرنے کے لیے حریف ٹیم پر تابڑ توڑ حملے کئے۔ اسکور برابر کرنے کی ہر ممکن کوشش کی گئی۔
کھیل کے 63ویں منٹ پر اظہرالدین ملک نے ایک اور گول کرکے محمڈن اسپورٹنگ کو دو صفر سے آگے کردیا۔
مزید پڑھیں:اے ٹی کے موہن بگان اور ایس سی ایسٹ بنگال نے، نہ کھیلنے کا فیصلہ کیا
سیاہ سفید جرسی کی ٹیم محمڈن اسپورٹنگ 0-2 کی سبقت بنانے کے باوجود میچ پر اپنی گرفت مضبوط بنائے رکھی اور حریف ٹیم کے تمام حملوں کو ناکام بنادیا۔
کھیل کے اختتام تک محمڈن اسپورٹنگ 0-2 کی سبقت برقرار رکھتے ہوئے ریلوے ایف سی کو یکطرفہ مقابلے میں شکست دے کر لیگ ٹیبل میں پہلی پوزیشن پر پہنچ گئی۔
