کولکاتا پورٹ اسمبلی حلقے میں کانگریس کے امیدوار محمد مختار نے انتخابی مہم کے دوران گھر گھر پہنچ کر ووٹرز سے ملاقات کی۔ انتخابی مہم کے دوران مغربی بنگال پردیش کانگریس کے نائب صدر اور امیدوار محمد مختار نے ای ٹی وی بھارت سے گفتگو کی۔
اس دوران کانگریس کے امیدوار محمد مختار نے کہا کہ کولکاتا پورٹ اسمبلی حلقہ کے ووٹرز کی حمایت اور محبت دیکھ کر دلی خوشی ہوئی۔ انہوں نے کہا کہ عوام میرے ساتھ ہیں اور اسی بنیاد پر مجھے اپنی جیت کی پوری امید ہے۔ عوام ترنمول کانگریس سے اوب چکے ہیں۔ اسی وجہ سے وہ کانگریس کی حمایت کررہے ہیں۔
کانگریس رہنما کا کہنا ہے کہ کولکاتا پورٹ اسمبلی حلقے کے لوگ گزشتہ دس برسوں سے ترقی اور بنیادی سہولیات سے محروم ہیں۔ ان کا کہنا ہے کہ اس کی سب سے بڑی وجہ یہ ہے کہ ترنمول کانگریس کے موجودہ رکن اسمبلی نے عام لوگوں کے لئے کچھ کیا بھی نہیں ہے۔ ان کی عدم دلچسپی کے سبب کولکاتا پورٹ اسمبلی کے لوگوں کا برا حال ہے۔
محمد مختار کے مطابق ہماری جیت ہو گی۔ الیکشن جیتنے کے بعد کولکاتا پورٹ اسمبلی حلقے میں نکاشی نظام کو بہتر بنانے کی کوشش کریں گے۔ ابتر نکاشی نظام کے سبب مانسون میں نصف درجن لوگ اپنی جان گنواتے ہیں۔
مزید پڑھیں:
مغربی بنگال اسمبلی انتخابات کی دوسرے مرحلے کی پولنگ، سکیورٹی انتظامات سخت
واضح رہے کہ مغربی بنگال کے کولکاتا پورٹ اسمبلی حلقے سے ترنمول کانگریس کے سینئر رہنما اور وزیر فرہاد حکیم کا کانگریس کے امیدوار محمد مختار سے دلچسپ مقابلہ ہوگا۔ دونوں پارٹیوں کے امیدواروں نے اپنی اپنی جیت کا دعویٰ کرتے ہیں۔ دونوں ووٹرز کی توجہ اپنی طرف مبذول کرانے کی ہر ممکن کوشش کرتے ہیں۔
