لکھنؤ: مکان مالک پر کورونا پھیلانے کا الزام، ایف آئی آر درج

خاتون نے الزام لگایا ہے کہ اس کا مکان مالک گجندر کورونا متاثر تھا جس کی وجہ سے اسے چندن اسپتال میں داخل کرایا گیا تھا جبکہ ان کی اہلیہ کا علاج گھر پر ہی کیا جارہا تھا۔ اس دوران گجندر کا بیٹا ہرشت کرائے دار کے باتھ روم کو استعمال کرتا تھا اور اکثر اس سے چائے بھی مانگ کر پیتا تھا۔

ریاست اتر پردیش کے دارالحکومت لکھنؤ کے وبھوتی کھنڈ پولیس اسٹیشن میں کورونا انفیکشن پھیلانے کو لے کر مقدمہ درج کرانے کا معاملہ سامنے آیا ہے۔

دراصل واستوکھنڈ میں کرائے دار گیتا نے اپنے مالک مکان اور اس کے بیٹے کے خلاف ایف آئی آر درج کروائی ہے۔ متاثرہ خاتون نے مکان مالک کے بیٹے پر یرغمال بنائے جانے کا الزام بھی عائد کیا ہے۔

خاتون نے الزام لگایا ہے کہ اس کا مالک مکان گجندر کورونا متاثر تھا جس کی وجہ سے اسے چندن اسپتال میں داخل کرایا گیا تھا جبکہ ان کی اہلیہ کا علاج گھر پر ہی کیا جارہا تھا۔

اس دوران گجندر کا بیٹا ہرشت کرائے پر رہ رہی گیتا کے کمرے میں داخل ہو کر باتھ روم استعمال کرتا تھا اور اکثر اس سے چائے بھی مانگ کر پیتا تھا۔

کرایہ دار خاتون گیتا بھی مکان مالک کے بیٹے کے ذریعہ زبردستی باتھ روم استعمال کرنے کی وجہ سے کورونا کی گرفت میں آگئی۔ اس کے بعد اس کے بچے اور شوہر بھی کورونا سے متاثر ہو گئے۔ کورونا سے متاثر ہونے کے بعد گیتا کے شوہر کو بھی اسپتال میں داخل کرایا گیا تھا، جہاں اس کی حالت سنگین ہوگئی تھی۔

متاثرہ خاتون گیتا کا کہنا ہے کہ اس کے مالک مکان کے بیٹے ہرشیت کمار نے ان کے کمرے کو باہر سے بند کردیا تھا۔ جس کی وجہ سے وہ اپنے کنبے کے کسی ممبر کی دوا لینے بھی نہیں جاسکتی تھی۔

اس معاملے میں گیتا نے یرغمال بنائے رکھنے کے ساتھ ساتھ پورے خاندان میں کورونا انفیکشن پھیلانے جیسے سنگین الزامات عائد کرتے ہوئے ایک رپورٹ درج کرواتے ہوئے ہرشیت کے خلاف کارروائی کا مطالبہ کیا ہے۔

وبھوتی کھنڈ پولیس نے خاتون کی شکایت پر مقدمہ درج کر لیا ہے۔ فی الحال پولیس اس پورے معاملے کی تفتیش کر رہی ہے۔