رامپور: کیا کورونا ویکسین لینے والوں کو ہی راشن دیا جائے گا؟

رامپور کے سیجنی نانکار کے راشن ڈیپو سے ایک معاملہ سامنے آیا ہے جہاں کنٹرول ریٹ پر حکومت کی جانب سے ملنے والے راشن کو اب راشن ڈیلروں نے راشن کارڈ ہولڈرز کو بغیر ویکسینیشن کے راشن دینے سے منع کرنا شروع کر دیا ہے، راشن ڈیلروں کا کہنا ہے کہ راشن کے لیے ویکسینیشن کروانا ضروری ہے۔

ملک کے دیگر اضلاع کے ساتھ ہی اترپردیش کے ضلع رامپور سے بھی کورونا ویکسین کی عدم دستیابی کے مسائل سامنے آ رہے ہیں، لیکن پھر بھی انتظامیہ کی جانب سے کورونا ٹیکہ کاری کے لیے متعدد اقدامات کیے جارہے ہیں۔

اس دوران رامپور کے سیجنی نانکار کے راشن ڈیپو سے ایک معاملہ سامنے آیا ہے جہاں کنٹرول ریٹ پر حکومت کی جانب سے ملنے والے راشن کو اب راشن ڈیلروں نے راشن کارڈ ہولڈرز کو بغیر ویکسینیشن کے راشن دینے سے منع کرنا شروع کر دیا ہے، راشن ڈیلروں کا کہنا ہے کہ راشن کے لیے ویکسینیشن کروانا ضروری ہے۔

اس تعلق سے جب ای ٹی وی بھارت کے نمائندہ نے رامپور کے ضلع مجسٹریٹ رویندر کمار ماندڑ سے سوالات کئے تو انہوں نے ویکسین کی عدم دستیابی کو قبول کیا۔ لیکن جب ان سے سوال کیا گیا کہ کچھ لوگ غریبوں اور مستحق افراد کو کنٹرول ریٹ پر ملنے والے راشن کو بھی ویکسین کے نام پر روکنے کی کوشش کر رہے ہیں۔ اس کے جواب میں ضلع مجسٹریٹ نے کہا کہ ویکسین کے لئے کسی بھی غریب اور مستحق افراد کو راشن سے محروم نہیں کیا جا سکتا۔

ضلع مجسٹریٹ رویندر کمار نے کہا کہ لوگوں کو کورونا سے بچانے کے لئے اس جانب متوجہ کرنا ضروری ہے اس لئے تمام ادارے اور محکمے ویکسین کی ترغیب ضرور دیں تاکہ ملک کی عوام کو کورونا سے محفوظ رکھا جا سکے۔