عآپ کارکنان نے پیٹرول ڈیزل کی قیمتوں کو واپس لینے کا مطالبہ کرتے ہوئے ضلع انتظامیہ کے ذریعہ صدر جمہوریہ کے نام ایک میمورنڈم بھی دیا۔
ملک بھر میں عوام پیٹرول اور ڈیزل کی قیمتوں میں اضافہ کے خلاف سراپا احتجاج ہیں۔ رامپور میں عام آدمی پارٹی کی جانب سے احتجاج کیا گیا۔
اس دوران صدر جمہوریہ کے نام ایک میمورنڈم ضلع انتظامیہ آنجنئے کمار سنگھ کو دیکر مطالبہ کیا گیا کہ پیٹرول ڈیزل کی بڑھتی قیمتوں کو فوری واپس لیا جائے۔
عآپ کے ضلعی صدر انصار احمد نے کہا کہ بھارت کی تاریخ میں ایسا پہلی مرتبہ ہوا ہے جب ڈیزل کی قیمتیں پیٹرول کے داموں سے بھی زیادہ ہوگئی ہے۔
انہوں نے کہا کہ ڈیزل کی ضرورت زیادہ تر کسانوں کو کاشتکاری کے لیے ہوتی ہے۔ اس لیے ڈیزل مہنگا کرکے حکومت نے کسانوں کی روزی روٹی چھین لی ہے۔
وہیں عام آدمی پارٹی کے ضلعی جنرل سکریٹری ذوالفقار علی ترک نے مودی حکومت پرنکتہ چینی کرتے ہوئے کہا کہ بھارت پہلے سے ہی بھکمری کی راہ پر ہے اور مرکز کی بی جے پی حکومت لگاتار پیٹرول اور ڈیزل کی قیمتوں میں اضافہ کرکے ثابت کر رہی ہے کہ وہ سرمایہ داروں کی حکومت ہے نہ کہ غریب اور کسانوں کی۔
