سوشل میڈیا کے ذریعہ اتر پردیش کی خواتین سے تبادلہ خیال کے دوران پوچھے گئے ایک سوال کے جواب میں پرینکا نے کہا کہ 'ہم نے اس مہم کا آغاز اتر پردیش سے کیا ہے لیکن اسمبلی انتخابات کی تکمیل کے بعد ہم اسے ملک گیر سطح پر لانچ کریں گے۔ Ladki Hoon Lad Sakti Hoon
پرینکا نے کہا کہ 'خواتین کے لیے مساوات ایک اہم مسئلہ ہے اور اسے کسی بھی صورت نظر انداز نہیں کیا جاسکتا‘۔
کانگریس لیڈر نے مزید کہا کہ 'گزشتہ کچھ دنوں سے بی جے پی، سماج وادی پارٹی اور عام آدمی پارٹی نے خواتین کے بارے میں بات کرنا شروع کیا ہے اور اس کا سہرہ بذات خود خواتین کے سر بندھتا ہے۔
انہوں نے کہا کہ 'خواتین کو صرف گیس چولہے تک محدود کر دینا مناسب نہیں ہے، وہ ہر سطح پر مساوات چاہتی ہیں۔ میں اس مہم کو کمزور نہیں ہونے دوں گی بلکہ اسے ملکی سطح پر لانچ کروں گی۔
خواتین کی بااختیاری کی تعریف کرتےہوئے پرینکا گاندھی نے کہا کہ کچھ روپے اور گیس سلینڈر فراہم کرنا ان کے حقوق کی حصولیابی نہیں ہیں۔ کیا خواتین کو سیاسی طور سے باختیار بنایا گیا ہے؟ ہمیں خواتین کو برابری کادرجہ دینے کی ضرورت ہے۔
سیاست میں مردوں کے دبدبہ کے بارے میں سوال کے جواب میں پرینکا واڈرا نے کہا کہ 'اسی آغاز میں، میں 50 فیصدی ٹکٹ انہیں دینا چاہتی تھی لیکن کافی غور و خوض کے بعد ہم نے 40 فیصدی ریزرویشن دینے کا فیصلہ کیا۔
