ریاست اترپردیش کے ضلع مظفرنگر کے شہر کوتوالی پولیس نے جعلی نوٹ بنانے والے گروہ کا پردہ فاش کرتے ہوئے نقلی نوٹ اور ان کے بنانے کے سازو سامان سمیت 3 ملزمان کو گرفتار کیا۔ بتادیں کہ مظفر نگر کی شہر کوتوالی پولیس نے ہفتے کی صبح نقلی نوٹ بنانے والے گروہ کا انکشاف کرتے ہوئے تین ملزمان انمول، انیکیت اور دیپک کو گرفتار کیا ہے۔
پولیس نے جعلی نوٹ بنانے والے اس گروہ کی جانب سے ایک پرنٹر، ہزاروں روپیے کے نقلی نوٹ اور نقلی نوٹ بنانے کا سازوسامان برآمد کیا۔
مظفرنگر سی او سیٹی کلدیپ سنگھ کا کہنا ہے کہ یہ گروہ گزشتہ کئی مہینوں سے ضلع میں سرگرم تھا جوکہ پرنٹر کی مدد سے گلابی اور ہرے رنگ کے کاغذ پر پانچ سو اور دو سو کے نقلی نوٹ بنانے کے کام کو انجام دے رہا تھا۔
اس طرح کی کافی شکایت موصول ہورہی تھی، جس پر شہر کوتوالی پولیس اس گروہ کو پکڑنے کی مسلسل کوشش کررہی تھی۔
جمعہ کی رات مخبر کی اطلاع پر پولیس نے ایک بند مکان پر چھاپے ماری کرتے ہوئے تین ملزمان کو گرفتار کیا جن کے پاس سے پولیس نے بھاری مقدار میں نقلی نوٹ اور نقلی نوٹ بنانے کا سازوسامان سمیت رنگین کاغذ برآمد کیے۔
ان سبھی ملزمان کے خلاف سنگین دفعات میں مقدمہ درج کرکے جیل بھیجنے کی تیاری کی جارہی ہے۔ پولیس اس بات کی بھی تحقیق کررہی ہے کہ ان کے ذریعہ یہ جعلی نوٹ کہاں کہاں اور کب فراہم کیے گئے ہیں۔
