سماجوادی پارٹی کے قدآور رہنماء اعظم خاں کی تقریباً تمام معاملوں میں ضمانت کے باوجود مشکلیں کم ہونے کا نام نہیں لے رہی ہیں۔ اعظم خان کی مشکلوں میں اضافہ کرتے ہوئے رامپور کی ایم پی، ایم ایل اے والی کورٹ نے اعظم خاں کی اہلیہ سابق ممبر اسمبلی ڈاکٹر تزئین فاطمہ اور بیٹے رکن اسمبلی عبداللہ اعظم کے خلاف غیر ضمانتی وارنٹ جاری کیا ہے۔ دو برتھ سرٹیفیکیٹ، دو پاسپورٹ اور دو پین کارڈ والے معاملے میں تاریخوں پر عدالت میں حاضر نہیں ہونے پر کورٹ نے یہ وارنٹ جاری کیا ہے۔ Non Bailable Warrant Against Azam's Family
موصولہ اطلاعات کے مطابق اس معاملہ کے گواہ سینٹ پالس اسکول کے پرنسپل منگل کے روز رامپور کی ضلع عدالت پہنچے تھے، لیکن عبداللہ اعظم کے غیر حاضر ہونے کی وجہ سے جرح نہیں ہو سکی تھی۔ عبداللہ کے وکیل نے اپنے موکل کی غیر حاضری کی معافی کے لیے درخواست بھی دی تھی، لیکن کورٹ نے اسے نامنظور کرتے ہوئے عبداللہ اعظم اور ان کی والدہ تزئین فاطمہ کے خلاف غیر ضمانتی وارنٹ جاری کر دیا۔ عدالت کی ناراضگی اس بات کو لے کر تھی کہ عبداللہ اعظم اور ان کی والدہ کئی تاریخوں سے عدالت نہیں پہنچ رہے ہیں۔
واضح رہے کہ بی جے پی رہنما آکاش سکسینہ نے عبداللہ اعظم کے پاس الگ الگ تاریخ پیدائش کے دو برتھ سرٹیفیکیٹ، دو پاسپورٹ اور دو پین کارڈ بنانے کے معاملے میں تین الگ الگ مقدمے درج کرائے تھے۔ ان معاملوں میں عبداللہ اعظم کے علاوہ ان کے والد اعظم خاں اور والدہ تزئین فاطمہ کو بھی ملزم بنایا تھا۔
یہ بھی پڑھیں: جماعت اسلامی ہند کے وفد کی تزئین فاطمہ سے ملاقات
