اپیندر تیواری نے ملک کے عوام کی بے عزتی کی ہے: ایس پی

مرادآباد کے سابق رکن اسمبلی اے حاجی یوسف انصاری نے اپیندر تیواری کے بیان پر ردعمل ظاہر کرتے ہوئے کہا ہے کہ منتری جی کا یہ کہنا کہ بھارت میں 95 فیصد لوگوں کو ڈیزل اور پیٹرول کی ضرورت نہیں ہے، تو یہ ملک کے عوام کی بے عزتی کرنا ہے۔ بی جے پی کے لیڈروں کے دماغ میں بھوسہ بھرگیا ہے، اس لیے وہ یہ بیان بازی کرتے ہیں۔

ریاست اترپردیش کے ضلع مرادآباد کے سابق رکن اسمبلی اے حاجی یوسف نے گزشتہ روز ریاستی وزیر اپیندر تیواری کے ذریعہ پٹرول اور ڈیزل کی بڑھتی قیمتوں پر متنازعہ بیان دیئے جانے پر ردعمل ظاہر کیا ہے۔

جہاں ایک جانب پٹرول اور ڈیزل کی قیمتوں میں مسلسل اضافہ ہورہا ہے، وہیں اپیندر تیواری کی جانب سے یہ کہا گیا کہ ملک میں مٹھی بھر لوگ ہی چار پہیہ گاڑی چلاتے ہیں، 95 فیصدی لوگوں کو پٹرول نہیں چاہیے۔ ایسے میں پٹرول اور ڈیزل کی قیمت بڑھنے سے زیادہ فرق نہیں پڑے گا۔

اپیندر تیواری کے اس بیان پر ردعمل ظاہر کرتے ہوئے مرادآباد سے سماج وادی کے سابق رکن اسمبلی اے حاجی یوسف انصاری نے کہا کہ 'میں اس بیان کو بھارت کے عوام کی بے عزتی کے نظریہ سے دیکھتا ہوں، یہ بیان دے کر 'منتری جی' نے ملک کے عوام کی بے عزتی کی ہے'۔

حاجی یوسف انصاری نے مزید کہا بھارتی جنتا پارٹی عوام کو بے وقوف بنارہی ہے، بی جے پی کے وزیر ہوں، کابینہ کے وزیر ہوں یا پھر وزیر اعلیٰ ہوں یا پھر کوئی بھی بی جے پی کا لیڈر ہو، ان سب کے دماغ میں بھوسا بھر گیا ہے اور وہ اسی طرح سے بیان بازی کرتے رہتے ہیں۔

انہوں نے کہا کہ بی جے پی نے جھوٹ بول کر اقتدار حاصل کیا ہے۔ میں کہتا ہوں کہ 95 فیصدی لوگوں کو پٹرول کی ضرورت ہوتی ہے اور تمام لوگ پٹرول اور ڈیزل کا استعمال کرتے ہیں۔ عوام پٹرول ، ڈیزل اور گیس کی بڑھتی قیمتوں سے پریشان ہیں۔ مہنگائی کی وجہ سے لوگوں کے گھر کا بجٹ بگڑ خراب ہوچکا ہے۔ اس مہنگائی کی حالت میں ریاستی وزیر اس طرح کے بے تکے بیان دے رہے ہیں، ایسے وزراء کو اپنے دماغ کا علاج کرانا چاہیے، جن کے دماغ میں بھوسا بھرا ہوا ہے۔