ابھی لوگ کورونا کی مار اور خوف سے باہر بھی نہیں نکل پائے ہیں کہ دہلی اور این سی آر کے باشندوں پرفضائی آلودگی کا قہر برپا ہو گیا۔فضائی آلودگی کو دنیا میں صحتِ عامہ کے لیے بہت بڑا خطرہ قرار دیا جا رہا ہے۔
ابھی تک انتظامی سطح پر کورونا اور دیگر متعدی بیماریوں کے حوالے سے آگاہی پروگرام چلایا جا رہا تھا لیکن اب فضائی آلودگی کے حوالے سے بھی منادی اور دیگر ذرائع سے عوام میں بیداری اور آگاہی پیدا کرنے کی کوشش کی جا رہی ہے۔تا کہ عوام متعدد بیماریوں کے ساتھ ساتھ فضائی آلودگی کے مضر اثرات سے محفوظ رہیں۔
اس ایپی سوڈ میں ڈی ایم سہاس ایل وائی کی ہدایت پر پنچایت راج کی محکمہ جاتی صفائی ٹیم نے بلاک دادری کے گرام پنچایت اپرالسی میں وسیع پیمانے پر تشہیر اور منادی کے ذریعہ دیہی عوام کو باخبر کیا۔یہ عمل دیگر دیہی علاقوں میں تسلسل کے ساتھ ساتھ جاری رہے گا۔
واضح رہے کہ گزشتہ ہفتوں سے ضلع گوتم بدھ نگر کی آلودگی کو کم کرنے اور ماحولیات کو خالص بنانے کی سمت میں ضلعی مجسٹریٹ سہاس ایل وائی کی سربراہی میں گاؤں گاؤں آگاہی اور بیداری پروگرام چلایا جارہا ہے۔اس پروگرام کے ذریعہ دیہی علاقوں میں دھان کی پرالی نہ جلانے کی تاکید بھی کر رہی ہے ۔
ایک سرکاری ایجنسی کے مطابق گزشتہ دنوں سے قومی دارالحکومت دہلی اور این سی آر کے علاقے فریدآباد، گروگرام، گوتم بدھ نگر اور غازی آباد میں ہوا کا معیار بدترین رہا ہے ۔مرکزی آلودگی کنٹرول بورڈ کے مطابق دہلی کے چار قریبی پڑوسی اضلاع میں ائیر کوالٹی انڈیکس (اے کیو آئی ) پی ایم 2.5 اور پی ایم 10 رہا ہے۔
