ریاست اتر پردیش کے ضلع امروہہ کی نوگاوا سادات اسمبلی سیٹ پر ضمنی انتخاب ہورہا ہے۔ اسمبلی حلقہ نوگاوا میں 3 نومبر کو ووٹنگ ہونی ہے۔
مولانا جاوید آبادی نوگاوا سے سماج وادی پارٹی کے امیدوار کی حیثیت سے انتخاب لڑ رہے ہیں۔ بھارتیہ جنتا پارٹی سے تعلق رکھنے والی سنگیتا چوہان بھی میدان میں ہیں۔
اس ضمنی انتخاب کے دوران سماج وادی پارٹی کے سابق کابینہ وزیر کمال اختر اور ایم ایل سی پرویز علی اپنے وفد کے ساتھ امروہہ کلکٹریٹ پہنچے اور انتخابی مبصر سے ملاقات کی اور بتایا کہ ضلع انتظامیہ اور پولیس حکومت کے دباؤ میں کام کر رہی ہے اور پارٹی کے لوگوں کو ہراساں کیا جارہا ہے، ان کے امیدواروں اور ان کے لوگوں کی گاڑیوں کی جانچ کی جارہی ہے اور جان بوجھ کر ان کے انتخاب کو متاثر کرنے کی کوشش کی جارہی ہے۔
انہوں نے پولیس اور انتظامیہ کے عہدیداروں پر سنگین الزامات عائد کیے ہیں۔ اُنہوں نے کہا کہ وہ انتخابات کو اثرانداز کرنا چاہتے ہیں، اسی لئے ہم منصفانہ انتخابات چاہتے ہیں اور وہ تمام افسران جو ماحول خراب کرنا چاہتے ہیں انہیں ہٹا دیا جائے۔
