ریاست اترپردیش کے ضلع مظفر نگر کے کلکٹریٹ کے احاطے میں آج آل انڈیا مجلس اتحاد المسلمین کے کارکنان اور عہدے داروں نے مولانا کلیم صدیقی کی گرفتاری کے خلاف زبردست احتجاجی مظاہرہ کرتے ہوئے ان کی رہائی کا مطالبہ کیا۔
مظفرنگر کے گاؤں پھلت کے رہائشی مولانا کلیم صدیقی کو منگل کی دیر شام میرٹھ کے ایک پروگرام سے لوٹتے وقت گرفتار کرلیا گیا۔ اے ٹی ایس نے انہیں تبدیلیٔ مذہب اور غیر قانونی فنڈنگ کے معاملے میں گرفتار کیا ہے۔
وہیں ملک بھر میں ان کی گرفتاری کے خلاف زبردست احتجاجی مظاہرہ کیا جارہا ہے۔ مولانا کی گرفتاری کی مذمت کرتے ہوئے ان کی رہائی کا مطالبہ کیا جارہا ہے۔
یہ بھی پڑھیں: نویئڈا:کسانوں نے اپنے مطالبات کی تکمیل کے پیش نظر احتجاج کیا
اسی اثناء میں آج آل انڈیا مجلس اتحاد المسلمین کے کارکنان اور عہدے داروں نے ضلع صدر انتظار انصاری کی سربراہی میں ضلع کلیکٹریٹ کے احاطے میں ان کی گرفتاری کے خلاف زبردست احتجاجی مظاہرہ کرتے ہوئے رہائی کا مطالبہ کیا۔
اس سے متعلق مزید معلومات دیتے ہوئے اے آئی ایم آئی ایم کے ضلع صدر انتظار انصاری نے بتایا کہ ہم مولانا کی گرفتاری کی مذمت کرتے ہیں، ہم مطالبہ کرتے ہیں کہ ان کو فوری طور سے رہا کیا جائے ان پر لگے سبھی الزام بے بنیاد ہیں۔ اس معاملے کی سی بی آئی جانچ ہو۔
