بصیر احمد خان نے کہا کہ ترقیاتی پروجیکٹ لوگوں کو اعتماد میں لئے جانے کے بعد ہی شروع کیے جائیں گے۔
جموں و کشمیر کے لیفٹیننٹ گورنر منوج سنہا کے مشیر بصیر احمد خان نے کہا ہے کہ لیفٹیننٹ گورنر موصوف نے ہمیں لوگوں کے مسائل سننے کی خصوصی ہدایت دی ہے۔ انہوں نے کہا کہ ترقیاتی پروجیکٹ لوگوں کو اعتماد میں لئے جانے کے بعد ہی شروع کئے جائیں گے۔
بصیر خان نے پیر کے روز جنوبی کشمیر کے ضلع اننت ناگ کے ایک روزہ دورے کے دوران نامہ نگاروں کو بتایا: 'لیفٹیننٹ گورنر صاحب نے ہمیں جگہ جگہ پر جانے اور وہاں لوگوں کو سننے کی خصوصی ہدایت دی ہے۔ ہم سے کہا گیا ہے کہ لوگوں کو اعتماد میں لینے کے بعد ہی ترقیاتی پروجیکٹ شروع کئے جانے چاہئیں'۔
انہوں نے کہا: 'ہم ترقی یقینی بنانے پر گامزن ہیں۔ لوگوں کے تمام مطالبات رجسٹر کئے جاتے ہیں۔ جو میرے حد اختیار میں ہوتا ہے میں موقع پر ہی اس کا اعلان کرتا ہوں۔ کچھ ایسے مسائل ہوتے ہیں جن کا گورنر صاحب کی نوٹس میں لانا ضروری ہوتا ہے وہ مسائل ان کی نوٹس میں لاتے ہیں'۔
مشیر موصوف نے مزید کہا کہ تمام لٹکے ہوئے پروجیکٹوں اور بیک ٹو ولیج پروگراموں کے بعد ہاتھوں میں لئے گئے تمام پروجیکٹوں پر جنگی بنیادوں پر کام جاری ہے۔
