آئی جی پی کشمیر وجے کمار نے ای ٹی وی بھارت سے خصوصی بات چیت کے دوران کہا پلوامہ پولیس، سی آر پی ایف اور فوج کی بروقت کارروائی کی بدولت آئی ای ڈی دھماکہ کرنے کے ایک منصوبے کو ناکام بنایا گیا ہے۔
وجے کمار نے بتایا کہ مصدقہ اطلاعات ملنے پر پلوامہ کے راجپورہ آئین گنڈ علاقے میں جمعرات کی صبح 44 آرآر، سی آر پی ایف اور پولیس کی ایک ٹیم نے ایک سینٹرو گاڑی کی تلاشی کی اور اس سے ایک آئی ای ڈی بم برآمد کیا۔
انہوں نے بتایا کہ ابتدائی تحقیقات سے معلوم ہوا کہ گاڑی کا نمبر پلیٹ نقلی ہے اور اس کے ڈرائیور جو غالباً حزب المجاہدین سے وابستہ ہے، نےعلاقے میں ایک ناکے کو توڑ کر گاڑی کو آئین گنڈ کے نزدیک چھوڑ دیا ہے۔
ذرائع نے بتایا کہ عسکریت پسند گاڑی کو وہیں چھوڑ کر اندھیرا کا فائدہ اٹھا کر فرار ہوگیا ہے۔ انہوں نے کہا کہ بم ناکارہ بنانے والی ایک ٹیم کو فوری طور پر جائے موقع پر طلب کیا گیا جنہوں نے برآمد شدہ آئی ای ڈی کو نا کارہ بنا دیا۔
اطلاعات کے مطابق آئی ای ڈی کو ناکارہ بناتے وقت ہوئے دھماکے سے کئی نزدیکی مکانوں کے شیشے چکنا چور ہوگئے اور کھڑکھیوں و دروازوں کو بھی نقصان پہنچا ہے۔
دریں اثنا آئی جی پولیس وجے کمار نے واقعے کی تصدیق کرتے ہوئے کہا کہ سیکورٹی فورسز کی بر وقت کارروائی سے گاڑی سے ایک آئی ای ڈی کو برآمد کرکے ایک بہت بڑی مصیبت کو ٹالا گیا ہے۔
