جموں و کشمیر لیفٹینینٹ گورنر انتظامیہ نے جموں و کشمیر میں نئے صنعتی کارخانے قائم کرنے کے لیے آسانیاں فراہم کرنے کی غرض سے متعدد ضوابط کو منسوخ کر کے تین کمیٹیاں تشکیل دی ہیں۔
محکمہ صنعت و حرفت کے ایک حکمنامے کے مطابق نئے کارخانے قائم کرنے کے عمل کو آسان بنانے کی غرض سے کمیٹیاں تشکیل دی گئیں ہیں، یہ کمیٹیاں معینہ مدت کے اندر این او سی جاری کر کے صنعتی کارخانے قائم کرنے کو منظوری دیں گی۔
نئی انڈسٹریل پالیسی کے مطابق جو کوئی شخص جموں و کشمیر میں صنعتی یونٹ قائم کرنے کی خواہش رکھتا ہو اسے اب کسی رجسٹریشن یا این او سی کی ضرورت نہیں پڑے گی، جو یونٹوں کے قیام کے لیے پہلے کرنا لازمی تھا۔
ایک کمیٹی میں انڈسٹریل اسٹیٹ لیول سنگل ونڈو کمیٹی مختلف صنعتی علاقوں میں این او سی جاری کرے گی اور اس کمیٹی میں جنرل منیجر ڈی آئی سی، منیجر اسٹیٹس اور انڈسٹریل ڈیولپمنٹ کارپوریشن کے افسران شامل ہوں گے۔
دوسری کمیٹی میں صنعتی علاقوں سے باہر ضلع سطح کے 5 ارکان پر مشتمل سنگل ونڈو کمیٹی ہوگی جو کہ این او سی اور منظوری نامہ مقررہ وقت پر جاری کرنے کے عمل پر نظر رکھی گی۔ جبکہ ڈویژنل سطح کی کمیٹی وقفے وقفے پر صنعتی علاقوں میں کام کاج پر نظر رکھنے کے علاوہ این او سی جاری کرنے کو یقینی بنائے گی۔
ڈویژنل سطح کی کمیٹی میں ڈائریکٹر صنعت و حرفت اور سکریٹری لیول کے صوبائی انتظامیہ کے نمائندے بھی شامل ہوں گے۔ واضح رہے کہ پانی اور ہوا میں آلودگی کی روک تھام سے متعلق قوانین کے تحت این او سی الگ سے جاری کی جائی گی۔
واضح رہے کہ جموں و کشمیر میں معاشی ترقی کو فروغ دینے کے لیے مرکزی حکومت نے نئی صنعتی اسکیم کو منظور کیا ہے جس کے لیے 28400 کروڑ روپے مختص کیے گئے ہیں۔
