عالمی وبا کورنا وائرس کے دوران جہاں دنیا بھر میں آکسیجن کی کمی کے باعث کئی جانیں تلف ہوئیں وہیں آکسیجن کی فراہمی کی ضرورت کو پورا کرنے کے لیے جنوبی کشمیر کے شوپیاں ضلع کے ٹکرو علاقے میں قائم پرائمری ہیلتھ سینٹر جموں وکشمیر کا پہلا ایسا ہیلتھ سینٹر بن گیا ہے جہاں او ایم ایس ٹیکنالوجی یعنی ملٹی فیڈ آکسیجن مینفولڈ سسٹم نصب کیا گیا ہے۔
او ایم ایس کی مدد سے کئی مریضوں کو بیک وقت آکسیجن فراہم کی جاسکتی ہے۔
اسپتال انتظامیہ کے مطابق پرائمری ہیلتھ سینٹر ٹکرو میں آکسیجن مینیفولڈ سسٹم میں 24 سیلنڈر نصب کیے گئے ہیں جس کی مدد سے بیک وقت 40 مریضوں کو آکسیجن فراہم کی جاسکتی ہے۔
مقامی لوگوں نے انتظامیہ کی سراہنا کرتے ہوئے بتایا کہ اس سے قبل ٹکرو اور اس کے ملحقہ علاقوں کے لوگوں کو ضلع اسپتال شوپیاں یا دیگر اسپتالوں کا رخ کرنا پڑتا تھا جس کے سبب نہ صرف مریضوں بلکہ تیمارداروں کو بھی دقتوں کا سامنا کرنا پڑتا تھا۔
