پہاڑی ضلع رام بن کے دینی بلاک کی پنچایت کنٹھی میں پینے کے پانی کی شدید قلت کے سبب لوگوں کو سخت مشکلات کا سامنا کرنا پڑ رہا ہے۔
پنچایت کنٹھی کے وارڈ نمبر 2 کے رہائشیوں نے بتایا کہ محکمہ جل شکتی کے ملازمین کی عدم توجہی کے سبب کثیر آبادی پینے کے صاف پانی سے محروم ہے۔
انہوں نے الزام عائد کرتے ہوئے کہا کہ محکمہ جل شکتی کے ملازمین کی غفلت شعاری اور اپنے فرائض کو خوش اسلوبی کے ساتھ انجام نہ دینے کی وجہ سے لوگ پینے کے پانی سے محروم ہیں۔
مقامی باشندوں کا کہنا ہے کہ انہیں ہر روز تقریباً 5 کلومیٹر پُر خطر پہاڑی راستہ عبور کر کے پانی حاصل کرنا پڑتا ہے۔ انہوں نے کہا کہ ’’سخت سردی ہو یا جھلسا دینے والی گرمی، ہمیں روزانہ پانی حاصل کرنے کے لیے میلوں کا سفر طے کرنا پڑتا ہے۔‘‘
مزید پڑھیں: رامبن: انتظامیہ کو راج گڑھ- کاستی گڑھ روڈ پر توجہ دینے کی ضرورت
انہوں نے محکمہ جل شکتی سمیت منتخب عوامی نمائندوں کو تنقید کا نشانہ بناتے ہوئے کہا کہ ’’سیاسی رہنما محض ووٹ حاصل کرنے کے لیے علاقے کا رخ کرتے ہیں، بجلی، پانی اور سڑک کا وعدہ کرکے ووٹ حاصل کرتے ہیں۔ انتخابات میں کامیابی کے بعد کوئی سیاسی رہنما پلٹ کر دوبارہ نہیں دیکھتا۔‘‘
لوگوں نے انتظامیہ سمیت محکمہ جل شکتی کے اعلیٰ افسران سے علاقے میں پینے کا صاف پانی مہیا کرانے کی اپیل کی۔
