راجستھان: اجمیر شریف میں محرم کی روایات و تقریبات کے پیش نظر ضلع انتظامیہ نے مسلم علاقوں سمیت درگاہ شریف کا دورہ کیا۔ اجمیر پولیس کیپٹن چونارام جاٹ اور ضلع کلکٹر انشدیپ کے ساتھ درگاہ کمیٹی اور انجمن کے عہدیداروں نے تمام روایتی مقامات کا جائزہ لیا۔ Ajmer Dargah
اس موقع پر درگاہ انجمن کے رکن حاجی سید عمران چشتی، درگاہ کمیٹی کے رکن سید بابر اشرف بھی موجود تھے۔ بابر اشرف نے کہا کہ میونسپل کارپوریشن سمیت ضلع انتظامیہ کے تمام اعلیٰ افسران نے ایس پی چونارام جاٹ اور ضلع کلکٹر انشدیپ کی قیادت میں درگاہ اور اس کے اطراف کا جائزہ لیا اس دوران درگاہ کے نظام گیٹ سے دس نمبری گیٹ تک کی پوری جگہ کا معائنہ کیا گیا اور خادمین سے سالانہ عرس یعنی حضرت بابا فرید چشتی رحمتہ اللہ علیہ کے عرس کے انتظامات کے بارے میں جانکاری حاصل کی۔ بابا فرید کا چلّا درگاہ حضرت خواجہ غریب نواز رحمتہ اللہ علیہ میں ہے جہاں 5 محرم کو بابا فرید کا عرس منایا جاتا ہے۔ اس موقع پر ملک بھر سے کثیر تعداد میں زائرین اجمیر آتے ہیں۔
ضلع انتظامیہ نے زائرین کی رہائش، کھانے پینے اور پارکنگ سمیت مختلف انتظامات کیے ہیں۔ درگاہ علاقے میں امام بارگاہ، اندر کوٹ ہٹائی اور مسلم علاقوں میں محرم کی روایات کا بھی جائزہ لیا گیا۔ خاص طور پر اندر کوٹ پنچایت سے محرم کے تعزیہ جلوس کے روٹ اور رسومات کے بارے میں جانکاری لی گئی۔
