جنوبی کشمیر میں ضلع پلوامہ کے ترال علاقے میں لاک ڈاؤن اور کوروناوائرس کے پھیلاؤ کو روکنے کے لیے جہاں انتظامیہ کی جانب سے سنجیدہ اقدامات اٹھائے جا رہے ہیں وہیں بعض سماجی اور غیر سرکاری تنظیمیں بھی اپنا کردار ادا کر رہی ہیں۔
نمائندے کے مطابق قصبہ ترال میں ایک مقامی رضاکار تنظیم نے جراثیم کُش ادویات کا چھڑکاؤ کیا اور مذہبی رواداری اور آپسی بھائی چارے کی فضا کو قائم رکھتے ہوئے بلا لحاظ مذہب وملت، رنگ ونسل اس دور میں بھی ایک انوکھی مثال قائم کی ہے۔
سنی میموریل ٹرسٹ نامی اس رضاکار تنظیم کے افراد نے کوروناوائرس کے قہر کے بیچ ترال کے مضافاتی علاقے میں صفائی ستھرائی اور سینٹائزیش کا عمل جاری رکھتے ہوئے گلی کوچوں، بازاروں، مندروں، مسجدوں اور گردواروں کی صفائی کرکے آپسی ہم آہنگی کی قندیل کو زندہ رکھا ہے۔
سبھی مذاہب سے وابستہ افراد ٹرسٹ کی اس پہل، اور رضاکارانہ جذبے کی داد دے دہے ہیں، وہیں ٹرسٹ کے سربراہ مولانا بلال رضا ہمدانی نے ای ٹی وی بھارت کے ساتھ بات کرتے ہوئے بتایا کہ ’’اس وقت دیگر اداروں کو بھی انتظامیہ کا تعاون دینا چاہیے۔‘‘
قابل ذکر ہے کہ کوروناوائرس کے تیزی سے پھیلائو کے سبب ملک بھر میں لاک ڈاؤن کا نفاذ ہے، تاہم کشمیر میں خدمت خلق، خیرخواہی اور مذہبی رواداری کی مثالیں لاک ڈائون میں بھی دیکھی جا سکتی ہیں۔
